Read lugbara Isaya 55 Bible Online

Isaya 55 - lugbara bible

Isaya 55

¹’Ba dria yi avijoni fule ’diyi la! Emi emu yia; emi ’ba silingi kokoru ’diyi, emi emu nyaka je, emi nya! Ada, emi emu patiefi ma su je lesu be silingi kokoru, aje kokoru indi.

²Emi silingi emini eza afa ovupi nyakaru kuri jezu a’disi ya? Emi azi emini eza afa ’bani ani trazu kurisi a’di e’yosi ya? Emi eri e’yo mani asi driasi, emini ma nya ani afa ovupi onyiruri, emi fe emi asi ma ovu ayikosi oso nyalerisi indi.

³Emi co emi bile, emi emu ma vu; emi eri e’yo, emi orindi yi nga ovu idriru ani; te ma nga aziza ’dani ’daniri azi emi be, yiki yi ojapi ku Daudiniri.

⁴Mi ndre, ma fe eri ’ba e’yo eti nzepiriru suru ndu ndu dri, ovuzu ’ba dri cepiri, azini ’ba azita azipiriru suru ndu ndu dri indi.

⁵Mi ndre, mi nga suru mini nile kuri omve, azini suru mi nipi drio kuri nga enzu mi vu, Yehova Mungu mini ma e’yosi, aziru. Mungu Alatararu Israeliniri ma e’yosi, erini diza fele mi dri ’borisi.

⁶Emi nda Yehovani de emi eco te eri isuzaru, emi omve eri de eri ogogo;

⁷’ba azi onzi ’yepiri ma ku geri ini, azini ’ba e’yo onzi beri ma ku egata ini onziri; eri ma mvi ani Yehova vu, eri nga di ovu eri vu yikisi, eri ma mvi Mungu amani vu, a’disiku eri nga di eri ma e’yo onzi wu dria dria.

⁸A’disiku asisile mani ovuni asisile emini ku, azini vini geri emini ovuni geri mani ku, Yehova ’yo ra.

⁹Te ekile ’buni ovule uru tu nyaku agazurile, ’dini indi geri mani ovu uru tu aga geri emini ’diyi ra, asisile mani indi aga asisile emini ra.

¹⁰Te ekile ozooni i osule va engazu ’bua si be, asipi mvipi uru dika ku, te erini yi osule nyakua nyakuni efi kazu ani ti sozu indirile, ori fezu ’ba ori ripiri dri, azini anya fezu ’ba enya nyapiri dririle,

¹¹e’yo mani efupi ma tiliari nga ovu i trotro ’dini; eri ngani emvi ma vu toko ku, te eri nga e’yo mani leleri ’ye, eri nga ovu drilebasi e’yo nde mani eri ma ti pezu aleniari ma alia ra.

¹²A’disiku emi nga fu amve ayikosi, ’ba nga vini emi dri ce amve asi anzurusi; oni amboru, oni were ’diyi be nga e’do ongo ngo emi drilia, pati asea ’diyi dria nga yi ma dri sa ayikosi ani.

¹³Oci paria marioni nga engani; azini oli ma paria kumarani nga engani; e’yo ’diri nga Yehova ma ru ece, eri nga ovu eceta ’dani ’dani ngapi asipi kuriru.