Read lugbara Isaya 56 Bible Online

Isaya 56 - lugbara bible

Isaya 56

¹Yehova ’yo ’dini: Emi mba e’yo ilia kililiruri ma ta, emi ’ye e’yo onyiruri, pata manini ’yele emulerisi, azini onyi manini ’yele ecelerisi.

²’Ba e’yo ’diri ’yepiri ovu drilebaru, azini mvi ’bani afa ’diri ma ta mbapiri ovu drilebaru, ’ba sabato ma ta mbapi eri eza eri ku, i ma dri ma ta mbapi eri ’ye azi onzi ku aniri.

³Ani’bo i ecipi Yehova be ’bori ma ’yo ku kini, Yehovani nga ma esele co suru erini be ada; ’ba ranyaru ma ’yo vini ku kini, Mi ndre, ma pati a’wiruri.

⁴A’disiku Yehova ’yo ’dinile ’ba ranyaru sabato mani ma agei tepi ’diyi, afa mani lele ’diyi pepi, aziza mani ma ta mbapi ma e’yosi, kini:

⁵Ma nga yi dri egata pi fe ru be jo mani ma alia azini jo abi mani ma alia, ru nde nga ovu onyiru aga ’ba agianzi tipi ezoanzi beriniri ra; ma nga ru ’dani ’dani asipi kuri fe’i.

⁶Azini, ani’ba yi ecipi Yehova be, azi ngazu eri dri, ru Yehovani lezu avasi, ovuzu ati’ba erini, yi alu alu ’ba sabato ma agei tepi yi ma eza eri ku ani, azini aziza mani ma ta mbapi ’diyi-

⁷yi’i ma nga yi eji oni mani alatararu vu, ma nga yi ’ba ovuzu ayikosi mani ’bani ma zizuri ma alia; ma nga edeta yini vele ma dri, edeta yini sole ma dri ’diyi be a’i pari mani edeta edezuri ma dria; a’disiku ’ba nga jo mani ma ru ’da jo Mungu zizu suru drianiri.

⁸Opi Yehova Israeli ’bani drole amve ’diyi omvipi dikari ’yo ra kini, Ma nga ’ba azini oku eri vu ereniru ’ba erini yi okule ’bo ’diyi be.

⁹Emi anyapa asea ’diyi dria, emi emuza ociemi anyapa oce talaa ’diyi pie.

¹⁰’Ba erini angu ndrepi ’diyi ovu mile kokoru, yi dria alu alu ovu nita kokoru; yi ovu alu alu oce ndindiru ecopi egbepi ku ’diyi; orobi obi yini, yi la va, yi le o’du ko tu.

¹¹Ada, oce nde ovu li be tu; yi econi trazaru ku. ’Diyi ovu ’ba kabilo ocepi e’yo vapi ku ’diyi; yi oja yi dria kalaa, yi alu alu yi ma ngulupi ma geria, yi oja yi dria orodri yini ndruzu kala vusi dria.

¹²Emi emu di, yi ’yo ra, ma nga ewa eji, ama nga tra afa mvuza okporurisi; te o’du druri nga ovu trotro o’du andrurile, o’du amboru turi.