Read lugbara Isaya 57 Bible Online

Isaya 57 - lugbara bible

Isaya 57

¹’Ba onyi be ’diyi dri ja ra, te ’ba aluni yo asi ’bapi e’yo ’diri ma driari; ’ba wu ’ba yiki be ’diyi, te ’ba aluni egani ku kini, onze ’ba onyi be ’diyi, e’yo onzi ,ngapi ecapiri kazu yi rua elozu ku.

²Eri fi asi anzuru ma alia; yi ava li gbolo yini ma dria, yi dria alu alu acipi e’yo kililiru yini ma alia ’diyi.

³Te emi oku oleru ma anzi, emi ’ba ali o’bapiri ma ori, oku saaru mile aci be ’diyini, emi esi ogogo fo.

⁴Emi a’dini ogu ya? Emi zi emi tile walaru andre esuzu a’di ma asi ofuzu ya? Emi ovuni anzi ezataniri, ori e’yo inzoruniri’i ku ya?

⁵Emi’i emi engapi liru pati kumarani ma eselia, pati ibiru dria ma etia ’diyi; emi anzi nyiri ofupi e’bu ma alia, oni ojia indi ’diyi,

⁶Awita mini ovu oni ’bara ’bara e’bu ma alia ’diyi ma eselia; yi’i, yi ovu awita mini; ada, mi osu ndra afa mvuza edetaru oni nde ma dria, azini mi fe ndra afa feza mini edele edetaruri yi dri. Ma nga adra mani ku ja e’yo nde ’diyisi ra ya?

⁷Mi ’ba gbolo mini oni izuru uruleru turi ma dria, mi tu ndra ’dale edeta edezu.

⁸Azini mi ’ba egata mini jotile pi ma ngukua pati i’diza be; mini mi rua ecele ’ba azini dri ra, te ma dri kurisi, mi tu uru ’bo, mi ’ba gbolo mini amboru tu; mi azi aziza mini yi be indi, mi le gbolo yini tu, mi ka ndra eri ndre ra.

⁹Mi mu ndra opi vu odu ’bani yi ma rua efizuri be, mi ’ba afa arikariru mini kakau; mi pe ojio mini ma ti ziri, mi ’ba mi va kpere Pari ’ba draza ’diyiniri vu.

¹⁰Mi ande geri minini ovule izururisi, te mi ’yoni, E’yo ’diri ovu orodri kokoru, ’dini ku; te mi isu okpo mini dika, e’yo ’disi ecimakoru ’beni ndra miku.

¹¹Te mi ru ndra a’di’i ya? Mi ovu urisi a’di ma e’yosi ya? mini inzo lile, mini ma egale ku, mini asi ’bale e’yo ’diri ma dria kurisi ya? Ma adrini ciri drio o’du izuru ku ya, te mi runi ma ku?

¹²Ma nga onyi mini ma e’yo ece ra, te azi mini’diyi, yi ngani orodri fe mini ku.

¹³O’du mini wuzurisi, afa mini okule ’diyi ma pa mi ra! Te olini nga yi ’du, avani nga yi ’du ji dria, Te ’ba asi ’bapi ma vu a’itasiri nga angu nya awitaru, eri nga oni mani alatararu a’i awurusoru.

¹⁴Eri di nga ’yo ra, Emi ofa angu, emi ofa angu, emi ede geri, emi nze kumu suru mani ma geriarisi fo!

¹⁵A’disiku eri ovupi ’bua uru tu adripi ’dani ’daniri, runi Alatararu’i, ’yo ’dini: Ma ri pari uruleru azini alatararu ma alia, te ma adri ’ba ovupi asi nyoza be, azini orindi e’yereruri beri be indi, ’dini ma ma fe ’ba orindi e’yereri be ’diyi ma asi ma enga dika, ma ma fe asi o’diru ’ba asi nyozaru be ’diyi dri.

¹⁶A’disiku ma ngani agata ga ’dani ku, ma ngani vini ovu adrasi ’dani ku; ka’dini ku orindi ’bani eco te de ma drilia, ’ba mani ’bale idriru ’diyi be.

¹⁷Li erini onziri ma e’yosi ma ovu adrasi, ma co eri ra, ma zi ma mile, ma ovu di adrasi; te eri mu drile aka geri i ma asini leleriasi.

¹⁸Ma ndre geri erini ’bo, te ma nga eri ati ra; ma nga eri dri ce indi, ma nga asi omiza omvi eri dri, ’ba wupi eri ma drasi ’diyi dri indi.

¹⁹Ma ’ba eli ’yaza ’ba ma tiliari ma’i Asi anzuro, asi anzuro ’ba ovupi reri dri, azini ’ba ovupi ogogori dri indi, Yehova ’yo ra; te ma nga eri ati ra.

²⁰Te ’ba azi onzi ’yepi ’diyi yi ovuli ekile miri olini drolerile; eri econi ovuzaru li ku, azini eri ma yini enga oritaru okurunya be.

²¹Asi anzuru ’ba azi onzi ’yepi ’diyi dri yo, Mungu mani ’yo ra.