Read lugbara Isaya 58 Bible Online

Isaya 58 - lugbara bible

Isaya 58

¹Emi oyu uru, emi ma ku ku, emi enga emi o’duko uru gukale; emi olu suru mani ma tia ezata yini ma e’yo, emi olu e’yo onzi yini ma e’yo ori’ba Yakoboni ma tia.

²Te ti, yi ma nda o’du vusi o’du vusi, yi ovu ayikosi geri mani nizu; ekile suru onyi ’yepirile, ekile suru Mungu yini ma azita avipi kurile, yi nda azita kililiru ma vu, yi ovu ayikosi esizu Mungu vu ogogo.

³Yi ’yo ra, Ama ’da nyaka ra, te mi ndreni ku a’di e’yosi ya? Ama inza orindi amani ra, te mi nini e’yoni ku a’di e’yosi ya? Mi ndre, o’du emini nyaka ’dazurisi, emi isu ayiko emini, emi omi ’ba azi emini ngapi ’diyi dria okposi.

⁴Emi ndre, emi nyaka ’da e’yo agata gaza pinisi awata be, emini ’ba sizu dri otuza e’yo onzinirisi. Emi ’dani nyaka andre ’dini emi o’duko ma ovu di erizaru ’bua ani, ’dinini ku.

⁵Nyaka ’daza mani pele ’bori eri ’dini ra ya? O’du ’bani i ma orindi inzazuri eri ’dini ya? Yini yi dri eluzu va ekile omi yiarile, yini koliba ajazu yi ma etia of uta beri ya? Emi nga e’yo ’diri omve nyaka ’dazani ya? Emi nga eri omve o’du Yehovani a’le rari’i ya?

⁶Nyaka ’daza mani pele ’bori ovuni ’dinile ku ya: ’bani afa ombeza e’yo onzini ’diyi otruzu, afa ombeza kulumbuniri ayuzu, ’ba ’bani inzale ’diyi otruzu, kulumbu dria onyozu?

⁷Nyaka ’daza adaruri ovuni mini enya mini awazu ’ba abiri be ’diyi ma eselia, emini ’ba alioru ’bani drole amve ’diyi ejizu mi vile joari ku ya? Mi ka ’ba rua be pililiruri ndre, mi ma su afa eri ma ruaa ci, azini mi ma zi mi ’ba rua be mile ’diyisi ku?

⁸Ka’dinile etu ’dasi diza mini nga di di ekile o’bitile, rua atiza mini nga efu mbeleru tu; onyi mini nga mu mi drilia, diza Yehovaniri nga ovu mi ngukualeru.

⁹Etu ’dasi mi nga eri omve, azini Yehovani nga e’yo omvi ani; mi nga wu, te eri nga di ’yo, Ma’do’i. Mi ka kulumbu nze mi eseliarisi amve, azini mi ka eceta e’yo onzini ecezu drilejosiri nze, e’yo onzi ’yoza be dria,

¹⁰mi ka afa mi asini leleri fe yikisi ’ba abiri be ’diyi dri, mi ka fe ’ba ’bani inzaleri ma tra ra, ka’dini diza miniri nga di ini ma alia, angu biza miniri nga ovu ekile etu dipi etu agaduarile.

¹¹Azini Yehovani nga mi dri ce etuzu, eri nga fe orindi mini ma tra angu a’wiru ma alia, eri nga fala mini fe mba okporu; mi di nga ovu ekile amvu anzulerurile, ekile yi a’di yinini nzuzu kurile.

¹²Azini ’ba engapi mi eselia ’diyi nga pari oku drio andruru ’diyi si dika; mi nga jo si dika jo ndu a’bianzi kakauni sile drio ’diyi ma dria; ’ba nga mi ru ’da, ’Ba pari asupi vari edepiri’i, ’Ba geri ’bani adrizu alenia ’diyi ofapi dikari.

¹³Mi ka mi pa oja kalaa e’yo sabatonirisi, ’dini mi ma ku ’yezu mini lelerile o’du alatararu manirisi la, mi ka sabato omve o’du ayikoni, mi ka o’du alatararu Yehovani omve o’du inzita beri’i; mi ka eri inzi, geri mi ngulupini ’diyi ’yezu ku, kani ayiko mi ngulupini isuzu ku, e’yo toko ’yozu ku indi;

¹⁴ka’dinile mi di nga ovu mini ayikosi Yehova ma alia, azini ma nga fe mi ma tu uru angu nyakuni uruleru ’diyi ma alia; te ma nga fe mi ma nya mi a’bi Yakobo ma awita, Yehovani e’yo ’diri ’yole i ma tisirisi.