Read lugbara Isaya 6 Bible Online

Isaya 6 - lugbara bible

Isaya 6

¹Eli opi Uziani drazurisi ma ndre Opi erini riria oguna dria, uruleru azini ’ba i uru tu; te diza eri ma ageiari ga hekalua tre.

²’Ba serafini so pa eri ma drilesi uru; yi alu alu ovu opile be azia azia: opile irisi yi a’bu yi ma mile, opile irisi yi a’bu yi ma pa, te opile irisi yi sa uru.

³Te serafi yi nga oyu uru yi agyi vu, nga ’yo ra: Alatararu, alatararu, alatararu, Yehova asikari ongulumuruni eri alatararu; nyaku dria ga tre diza erinirisi.

⁴Te jobile ma eti okporu ’diyi oya yi ’ba ’yopiri ma o’dukosi, azini jo ga tre acikasi.

⁵Te ma nga di ’yo ra, Candi ma dri! E’yoni ma ndelerisi; mani ovule ’ba tile onzikanyaru berisi, azini mani adrile ’ba tile onzikanyaru be ’diyi ma eseliarisi; a’disiku ma ndre Opi amboro, Yehova asikari ongulumuruni, ma milesi ’bo

⁶Serafi alu nga di esa ma vu, eri ma dria aciolu indi, erini e’dule akpasi engazu pari edeta edezuria.

⁷Eri elo ma tile aciolu ndesi, nga di ’yo ma tia kini, Mi ndre, afa ’diri elo mi tile ’bo; te e’yo onzi mini ovu nzezaru ’bo, ezata mini ovu wuzaru indi.

⁸Azini ma eri o’duko Opini ’yozu kini, Ma nga a’di ma ti pe ya, azini a’dini nga mu ama drini ya? Ma nga di ’yo tinia, Ma ’do! Mi pe ma ti’i fo!

⁹Te eri ’yo ra, Mi mu, mi olu suru ’diri ma tia: Erizaruni, emi ma eri ra ada, te emi va ku; nezaruni, emi ma ne ada, te emi ama afa kilili ku.

¹⁰Mi ’ba suru ’diri ma asi osoru, mi ’ba yi ma bile dirinyaru, mi opi yi ma mile indi; yi kazu ndrezu yi ma milesi ku, yi kazu erizu yi ma bilesi ku, yi kazu e’yo vazu yi ma asisi ku, yi kazu yi ojazu dika yi ma ovu atizaru ani ku.

¹¹Ma nga di ’yo ani, Opi, o’du ngopi ya? Te eri omvi e’yoni: De nga aku ovuni ezazaru andruru ’ba ovupi alenia ’diyi kokoru ku, de nga jo ovuni ’ba kokoru ku, de nga vini angu ovuni ezazaru teketeke ku,

¹²de nga Yehova jini ’ba nde ’diyi ziri ku, azini pari ’bani kule ’bo ’diyi ovuni karakarau angu ma alia ku.

¹³Te esele mudri ma azi aluri ka ace nga eri ma alia, acini nga eri eve dika, ekile pati masani kani kumarani, yi ma olani adrile indi ’bani yi gazu ’boriarile. ’Dinile indi ori alatararuri ovu ola erini,