Read lugbara Isaya 61 Bible Online

Isaya 61 - lugbara bible

Isaya 61

¹Opi Yehova ma Orindi ovu ma cina, Yehovani odu osule ma dria ma ma olu e’yo bari ’ba alioru ’diyi ma tia anirisi; eri pe ma ti ’ba asi nyozaru be ’diyi atizu, truza ma e’yo azizu ’ba ati’baru ’diyi ma tia, ’ba truzu arujoari ma e’yo oluzu ’ba o’ile ’diyi ma tia indi;

²eli Yehovani ’ba a’izuri ma e’yo ekuzu indi, o’du Mungu amanini arioti ofezuri be; ’ba dria owupi imvosi ’diyi ma asi omizu;

³e’yo azizu ’ba owupi imvosi Zionia ’diyi dripatifu ’bani ekilale onyiafaruri fezu yi dri of uta ma paria, odu ayikoni awu ma paria, afa suza inzitaniri orindi nzizaru ma paria; ba ma omve yi ani pati onyini, afa saza Yehovani saleri, eri ma ovu dizaru ani.

⁴Yi nga di pari andruru drio ’diyi si dika, yi nga aku ezale drio ’diyi enga uru dika; azini yi nga aku amboru kule ezazaru a’bipi drio ’diyini kule toko ’diyi ede dika.

⁵’Ba emuza yi nga pa so kabilo emini ocezu, ani’ba yi nga amvu ’ya emi dri, zabibu pati emini ma rua ede indi;

⁶te emi’i, yi nga emi omve ’ba edeta edepi Yehovani ’diyi, yi nga emi omve ’ba azi ngapi Mungu amaniri dri ’diyi; emi nga ’ba suru ndu nduni ma lonyi nya, te emi nga emi enya diza yini ma alia.

⁷Drinza emini ma paria emi nga orodri isu pale iri, azini e’yo yini ndra ovuzu abazaruri ma paria yi nga ovu ayikosi awita yinisi; e’yo ’disi angu yini ma alia yi nga angu nya pale iri; ayiko ’dani ’daniri nga ovu yini.

⁸A’disiku ma’i Yehova, ma le e’yo liza kililiruri, ma ngu afa ’ba azinini opazuri onzi, e’yo kililiru kuri be; ma nga arioti ofe yi dri e’yo adasi, ma nga vini aziza ’daniri azi yi be indi.

⁹’Ba nga ori yini ni ce ce ’ba jururu ma eselia, yi nga a’bianzi yini vile ’diyi ni suru ndu ndu ma eselia; ’ba yi ndrepi ’diyi dria nga yi a’i ra kini yi ovu ori Yehovani asi ndriza fele driniari’i.

¹⁰Ma nga ovu ayikosi tu Yehova ma alia, orindi mani nga ovu ayikosi Mungu mani ma alia; erini afa suza pataniri sule ma ruaarisi, erini ma a’bule bongo onyinisirisi, ekile izioni i osule patifu ekilazarisirile, ekile amuruani i osule ndrizaru nyoro inisirile.

¹¹Te ekile nyakuni fele afa ibiru ma egbirile, ekile amvuni fele afa ’bani sale aleniari ma engarile, ’dinile indi Opi Yehovani nga fe onyi pi ma enga suru dria ma milia inzita be.