Read lugbara Isaya 62 Bible Online

Isaya 62 - lugbara bible

Isaya 62

¹Zioni ma e’yosi ma ngani adri ciri ku, azini Yerusalemu ma e’yosi ma ngani di ava li ku, de nga onyi erini efuni dizale ku, de nga para erini efuni ekile tala dipi dirile ku.

²Suru ndu ndu yi nga onyi mini ndre ra, opi yi dria nga diza mini ndre; azini yi nga mi omve ru o’diru Yehovani ngale ’dale i ma ngulupi ma tisirisi.

³Mi nga ovu ekilaza ndrizaru Yehova ma dri ma agelia, oku opiniri Mungu mini ma dri ma alia indi.

⁴Yi ngani mi ru ’da Kuzaru Toko’i dika ku, yi ngani vini angu mini ma ru ’da Andrua’i dika ku; te ’ba nga mi omve, Hefiziba’i azini angu mini ma ru, Beula’i; Yehovani ovule ayikosi misirisi, azini ’ba nga angu mini bi ’bani oku bilerile.

⁵A’disiku ekile karilauni amurua bilerile, ’dinile anzi mini nga mi bi, azini ekile izioni ovule ayikosi amurua ma e’yosirile, Mungu mini nga ovu ayikosi misi ’dinile trotro.

⁶Ma ’ba ’ba angu ndrepi ’diyi kali mini ma abi dria, Yerusalemu la; yinganiadriciri etusi, inisi ku. Emi’i, emi ’ba fepi Yehova ma ega e’yo ’diyi, emi li ava ku fo,

⁷azini emi fe eri ma li ava ku ecazu kpere erini Yerusalemuni fezu pa sozu ku, de nga eri ’bani Yerusalemuni ovuzu inzitaru nyaku ma alia ku.

⁸Yehova so oyo dri ini ndiri ma rusi, azini wu okpo ini ecepiri ma rusi ’bo, kini: Ada ada ma ngani anya mini fe ari’ba mini dri enyaru dika aluni ku, azini ani’ba ngani patiefi su mini, mini azi ngale aleniari, mvu dika ku;

⁹te ’ba eri lopi ’diyi nga eri nyani, yi nga di Yehovani inzi ra, azini ’ba eri tipi ’diyi nga patiefi ma su nde mvu’i pari alatararu mani ma irii dria.

¹⁰Emi aga, emi aga kalitilesi, emi ofa geri ’ba suruni dri; emi ede, emi ede gboko, emi onze oni, emi ’du bendera uru suru ndu ndu dri.

¹¹Mi ndre, Yehova olu e’yo kpere angu ma kalatini asizuria ’bo, kini: Emi ’yo Zioni zi ma tia, Mi ndre, pata mini emu emu; mi ndre, orodri erini ovu eri be, azini andemana erini ovu eri ma milia.

¹²Azini yi nga yi omve, Suru alatararu’i, ’Ba Yehovani onzele ’diyi; azini yi nga mi omve, Aku Ndaru’i, Kuniku’i.