Read lugbara Isaya 63 Bible Online

Isaya 63 - lugbara bible

Isaya 63

¹’Ba engapi Edomua bongo edele wura ekarusi Boziraa ’diyi supiri, eri a’di’i ya? Eri’i ovupi dizaru afa suza inisi, acipi agupiru okpo ini amborurisiri ya? Eri ma’i, e’yo ’yopi onyi ma alia, ovupi okpo be ’ba pazuri yo ya?

²Bongo mini ovu ekaru a’disi ya? Afa suza mini ovu ekaru ekile ’ba pari zabibu ma efi ma su nzizuri tupirile a’disi ya?

³Ma tu pari zabibu ma efi ma su nzizuri ma’i a’dule, azini engazu suru ndu ndu ma eselia ’ba azini tupi ma beni yo; ada, ma otu yi aoko manisi, ma otu yi ma dria adra mani acirurisi; idri yini ma ari da i bongo mani ma ruaa, tro afa suza mani dria.

⁴A’disiku o’du arioti ofezuri ovu ma asia, azini ’ba mani onzele ’diyi ma eli eca ’bo.

⁵Ma ndre ra, te ’ba ’ba aza kopiri yo; te ma osu tu ’ba ’ba edrepi ururini ovule yorisi; e’yo ’disi ma ngulupi ma wu eji pata ma drini, azini asi veza mani edre ma uruni,

⁶Ma otu ’ba suru ndu ndu ’diyi va aoko manisi, ma fe yi ati adra mani acirurisi ewani ’ba fulerile, ma osu di yi ma idri ma ari va nyakua.

⁷Ma nga asi ndriza ale be Yehovani i pi ma e’yo olu, inzita Yehovani ’diyi be, afa dria Yehovani fele ama dri avasiri vusi, ma nga vini asi ndriza erini amboru tu ori’ba Israelini vuri erini fele yi dri avasi yiki erini vusi, azini asi ndriza erini ale beri vusiri ma e’yo olu indio

⁸A’disiku eri ’yo ra, Yi ovu suru mani ada, anzi ngapi ’yepi lokirisi ku ’diyi; ’dini eri ovu di ’ba yi Papiri’i.

⁹Inzata yini ma alia dria, eri ovu inzazaru alu indi, azini erini ovule indirisi malaika erini pa yi ra; leta erini ma alia yiki erini be, eri onze yi ra; te eri o’du yi uru, eri ji yi ewu drio ’diyi ma alia dria.

¹⁰Te yi mbu ruaniasi amve, yi ecandi Orindi erini Alatararuri; e’yo ’disi eri oja i ovuzu ari’bo yiniru, eri ma ngulupi ’ba omba yi beni,

¹¹’Ba erini nga di o’du drio Musani ’diyi ma e’yo ega. Eri’i ndra yi ofupi engazu miri ma aliasi ’ba kabilo o’biru erini ocepi ’diyi beri, eri ngoa ya? Eri’i ndra i ma Orindi Alatararu ’bapi yi ma eseliari eri ngoa ya?

¹²Eri’i fepi wu ini dizaru ma efu Musa ma dri ndiriari; eri’i ndra yi mirini ma esele awapi yi ma drilia eri ma ’ba i dri ru ’dani ’daniruri aniri;

¹³eri’i ndra yi ma dri cepi miri aliru ma aliari ekile akanya angu roko driarile, yi ma aba ku ani.

¹⁴Ekile tini esile va e’bu ma aliarile, ’dinile Orindi Yehovani fe yini ava lizu ani; ’dinile mi ce ndra suru mini ma dri, ru mini ’bazu dizaru aniri’i.

¹⁵Mi lu engazu ’bua, mi ndre engazu pari mi alatarani ovuzu alenia diza mini beria. Ava mini ngoa ya, ’yeta mini okporu ’diyi be? Ava mi asiari, yiki miniri be oga yi ma dri si.

¹⁶Te mi ovu Ata amani, ka tro Iburahimu nini ama ku, ka tro Israeli a’ini ama ku ti; Yehova la, mi ovu Ata amani, Mungu ama Onzepi engazu driori ovu ru mini.

¹⁷Yehova la, mi fe ama avi geri mini kuzu a’disi ya? Mi fe asi amanini mba mi ruzu ku ’dini a’disi ya? Mi emvi, ati’ba mini enyati mi yilani ’diyi ma e’yosi.

¹⁸’Ba mini alatararu nya awita nde o’du were a’dule; ari’ba amani ’diyi otu pari mini alatararuri yi pasi va ’bo.

¹⁹Ama oja ama ekile suru mini adrile nga opiru drilenia kurile, ekile ’ba ’bani omvele nga ru minisi kurile indi.