Read lugbara Isaya 64 Bible Online

Isaya 64 - lugbara bible

Isaya 64

¹Mi ka te ’bu asi ra, mi ka te asi ra, oni ka te aka menemeneru mini ovule indirisi, ’yeke--

²ekile acini ti kozu eja a’wisirile azini aci nde fe yi ma a’di a’di’dini fezu mi ru ma ovu nizaru ari’ba mini dri, suru ndu ndu ma rua ma ya mini ovule indirisi ani

³Ewu mini ndra ’yeta uriuriru amani lule ku ’diyi ’yezurisi, mi esi ndra va, oni aka yiru mini ovule indirisi,

⁴A’disiku engazu drio ’ba erini ku, ’ba erini vini e’yo nde yi ma bilesi ku, azini mile ’bani ndreni Mungu andini azi ngapi ’ba eri tepi ’diyi driri ku, pe lu kiri mi’i a’dule.

⁵Mi adri dri fu ’ba ovupi ayikoru onyi ’yepiri be, ’ba e’yo mini egapi geri mini ma alia ’diyi. Mi ndre, mi ovu ndra aokosi, te ama eza ra; ama adri ezata nde ma alia ewu izuru, te ama nga ama paraya?

⁶A’disiku ama oja ama dria alu alu ekile ’ba alata kokorule, ’yeta amani onyiru ’diyi dria ovu ekile bongo ondirule. Ama dria onyu ekile pati bikole, e’yo onzi amani ’du ama ekile olini afa ’ dulerile.

⁷’Ba aluni yo mi ru omvepiri, kani i ma asi engapi mi bizuri; mini mi mile zile amasirisi, mi ja ama dri ’bo e’yo onzi

⁸Te di, Yehova la, mi ovu Ata amani, ama odrini, mi’i, mi ama sipi imvuleri; ama dria dri mini ma azi.

⁹Yehova la, aoko ma nya mi tu ku fo! Mi ma ega vini e’yo onzi ’dani ’dani ku. Mi ndre, mi lu, ama mare ’ba mi vu, ama dria ovu ’ba mini.

¹⁰Aku mini alatararu ’diyi oja yi angu didiru, Zioni oja i angu roko driariru, Yerusalemu ofu golokoru.

¹¹Jo amani alatararu ndrizaru tu, ama atapini mi inzizu aleniari, ’ba ve eri acisi ’bo, afa amani ayiko fepi tu ’diyi ja dri dria ra.

¹²Yehova la, mi nga ovu ndi e’yo ’diyisi ya? Mi nga adri ciri, azini mi nga ama inza onzi tu ya?