Read lugbara Isaya 65 Bible Online

Isaya 65 - lugbara bible

Isaya 65

¹’Ba ndra ma zipi ku ’diyi zi e’yo ma tia ra; ’ba ndra ma ndrupi ku ’diyi isu ma ra Ma ’yo, Mi ndre ma, mi ndre ma, suru mani omvele ndra ru manisi kuri ma tia.

²Ma aja ma dri o’du dria suru mbupi ma ruaasi amveri dri, acipi geri onyiru kuri ma alia asisile yiniri vusi;

³suru ’yepi aka fepi aoko mani ma enga o’du driari, yi ede edeta amvua, yi ve afa arikariru biriki ma dria;

⁴yi ri nyadri ma eselia, yi ’a’apari zizaru ’diyi ma alia; yi ezo za nya, azini afa onzikanyaru ma a’isu ovu oteku yini ma alia;

⁵’ba ’diyi ’yo ’dini, Mi so pa a’dulesi, mi esi ma vu ogogo ku, mani ovule alatararu aga mi rarisi, ’Ba ’diyi ovu ekile acika ma omvule arile, aci vepi etuzurile.

⁶Mi ndre, eri ovu sizaru ma drilia: Ma ngani adri ciri ku, te ma nga arioti ofe, ada, ma nga arioti ofe yi ma agatia ma’i

⁷e’yo onzi eminisi, ’ba emi atapiru ’diyi ma e’yo onzi ma e’yosi indi, Yehova ’yo ra; ’ba ndra afa aji be arikariru vepi oni amboru ma dria ma ru o’dapi oni were ’diyi ma dria ’diyi, e’yo ’disi ma nga azi yini ’yeleri o’bi yi ma agatia oko.

⁸Yehova ’yo ’dini:Ekile ’bani patiefi ma su isule zabibu pati ma efi kapi ngulururi ma alia, te ’ba azinini ’yole, Mi eza eri ku fo, asi ndrizani ovule eri ma aliarisi-rile, ma nga ’ye ’dinile ati’ba mani ma e’yosi, ’dini ma ma ja yi dria ma dri ku ani.

⁹Ma nga di ori eji engazu Yakobo ma alia, azini ma nga ’ba ngapi oni mani nyapi awitaruri eji engazu Yudaa; ’ba mani peleri nga di eri nya awitaruni, ati’ba mani nga di adri ’daleni.

¹⁰Saronini nga ovu lico anyapa were ’diyi dri, azini e’bu Akoriari nga ovu pari anyapani lazu va aleniariru, suru mani ma ndapi ’bo ’diyi dri.

¹¹Te emi Yehovani kupi, oni mani alatararuri avipi, mesa edepi Drileba dri azini kerea gapi patiefi ma su osazarurisi Drileba dri ’diyi;

¹²ma nga drileonzi fe emini ’dinile, ma nga emi fe sei sia, emi dria nga avu va pari ’ba fuzuria; a’disiku ma ka ndra emi omve, emi omvini e’yo ku, ma ka ndra e’yo ’yo, emi erini ku, te emi ’ye e’yo ovupi onzi ma miliari, emi pe afa ayiko fepi ma dri kuri.

¹³E’yo ’disi Opi Yehova ’yo ’dini: Emi ndre, ati’ba mani nga nyaka nya, te emi nga ovu abirisi; emi ndre, ati’ba mani nga afa mvuza mvu ra, te emi nga ovu yi avijosi; emi ndre, ati’ba mani nga ovu ayikosi, te emi nga ovu drinzasi;

¹⁴emi ndre, ati’ba mani nga ongo ngo ayiko yi ma asiarisi, te emi nga owu candi emi asiarisi, emi nga lulu ga okposi emi asini otile turisi.

¹⁵Emi nga ru emini ku atriaru ’ba mani pele ’diyi dri, azini Opi Yehovani nga mi fu ra eri nga di ati’ba ini omve ru andinisi.

¹⁶Ka’dini ’ba asi ndriza fepi i dri nyakuari nga asi ndriza fe i dri Mungu e’yo adaniri ma rusi, te ’ba oyo sopi nyakuari nga oyo so Mungu e’yo adaniri ma rusi; ’ba ma drini candi drio ’diyi ma e’yo avile ’borisi azini yini ovule zizaru ma miliarisi.

¹⁷Te mi ndre, ma ’ba ’bu o’diru pi nyaku o’diru be; te yi ngani e’yo drio ’diyi ega dika ku, ngani asisile ’ba drinia ku.

¹⁸Te emi ovu di ayikosi nyona be ’dani afa mani ’balerisi; te mi ndre, ma ’ba Yerusalemuni afa ayiko fepiriru, azini ma ’ba ’ba erini ayiko fepi ’diyiru indio,

¹⁹Te ma nga ovu ayikosi e’yo Yerusalemunisi, ma nga ovu nyona be suru mani ma e’yosi; yi ngani asi o’duko awuni eri eri ma alia dika ku, yi ngani vini asi o’duko lulu gazani eri alenia dika ku indi.

²⁰Te eri ma alia mva azini ngani dra odekua gaarile dika ku, kani ’ba ’wara ngani dra ku de nga eli erini deni yi dria ku, a’disiku mvani dra de isu eli erini ca turu alu ’bo, azini ’ba azi onzi ’yepiri, eli erini ka ca turu ale, yi nga eri tri ra.

²¹Yi nga jo si, yi nga di la alenia yi’i; yi nga vini amvu ’ya zabibu sazu, yi nga efi ’yazaniri nya yi’i.

²²Yi ngani jo si de isu ’ba azini nga la aleniani, ’dinini ku; yi ngani afa sa amvu alia de isu ’ba azini nga afa nde nyani, ’dinini ku; a’disiku suru mani ma o’du nga ovu kakau pati ma o’dule, azini ’ba mani pele ’diyi nga ri azi yi ma drini ’yeleri ma ayiko nya ewu izuru.

²³Yi ngani di azi nga oye ku, yi ngani anzi osi ocoko dri ku; a’disiku yi ovu ’ba Yehovani asi ndriza fezu yi dri ’diyi ma ori, anzi yini tile ’diyi be.

²⁴Te eri nga di eca ’dini, kini, de nga yi omveni ma ku, ma nga e’yo omvi yi tia, azini de nga yi kiri e’yo ’yo, ma nga eri ra.

²⁵’Balau pi kabilo be nga nya tualu, kamini nga ase nya moniole; urini nga vini irifura mbe’i. Yi ngani di rua suza fe ku, ngani vini yi ma agyi ma dri ja oni mani alatararuri ma kalaa dria ku, Yehova ’yo ’dini.