Read lugbara Isaya 66 Bible Online

Isaya 66 - lugbara bible

Isaya 66

¹Yehova ’yo ’dini: ’Buni oguna mani, nyakuni pari mani ma pa ’bazu driniari; emi nga di jo ngoniri si ma dri ya? Ma nga di ava li pari ngori ma alia ya?

²A’disiku ma dri ’ba afa ’diyi driani, yi indi ani, Yehova ’yo ra. Te ma nga agu ’diri lu, ’ba ovupi e’yere asi ojaza afu kokoru beri, ’ba ovupi rua yaza be e’yo manisiri’i.

³’Ba ti sopi ovu ekile ’ba ’ba fupirile; ’ba kabilo lipi edetaruri ovu ekile ’ba oce ma ombele nyopirile; ’ba afa feza edepiri, ekile ’ba ezo ma ari osupi edetarurile; ’ba obiese vepiri, ekile ’ba afa awa’diforu fepi wura onzi dririle. Ada, yi pe geri yini ’bo, te asi yini le afa yini onzikanyaru ’diyi,

⁴Ma’i, ma nga inzata pe yi dri indi, ma nga afa yini ovuzu ani urisi ’diyi eji yi ruaa; a’disiku ma ka ndra yi omve, ’ba aluni omvini e’yo ku, ma ka ndra e’yo ’yo, yi erini ku; te yi ’ye e’yo ovupi onzi ma miliari, yi pe yini afa ayiko fepi ma dri kuri’i.

⁵Emi eri e’yo Yehovani, emi ovupi rua yaza be e’yo erinisi ’diyi: Adripi emini emi ngupi onzi emi ’bepi amve ru mani ma e’yosi’diyi yi ’yo, Yehova ma ovu diza be, ama ma ndre ayiko emini ka; te yi nga ovu drinzasi ra.

⁶O’duko otrezani engapi aku ma aliari! O’duko engapi hekalu ma aliari! Eri Yehova arioti ofepi ari’ba ini ma ruaari ma o’duko’i!

⁷De nga mvaazo e’duni oku ’diri ku, eri osi ra; de nga rua suza erini ecani ku, eri osi agupimvani.

⁸A’di eri e’yo ’dinirini ya? A’di ndre e’yo yi sipi ’dini ’diyini ya? ’Ba nga angu osi o’du alu ma alia ra ya? ’Ba nga suru osi coti ra ya? Te mvaazo ka Zionini e’du ’bo, coti eri osi anzi erini mbele.

⁹Ma nga anzi eli cazu o’du osisuria, te ma ngani fe ’ba ma osi indi ku ya? Yehova ’yo ra; Ma’i fepi ’ba ma osiri, ma nga opojo opi ci ra ya? Mungu mini ’yo ra.

¹⁰Emi ma ovo di ayikosi Yerusalemu be tualu, emi ma ovu ayikosi erisi, emi dria eri lepi ’diyi; emi ovu ayikosi e’yo erinisi nyona be, emi dria ovupi candisi e’yo erinisi ’diyi;

¹¹emi ma ndru, emi ma tra, ba erini asi omizani ’diyisi; emi ma ndru basu, Femi ma ovu ayikosi diza erini amboru turisi.

¹²A’disiku Yehova ’yo ’dinile: Emi ndre, ma nga asi anzuru aja eri dri ekile yi arale, ma nga diza suru ndu nduni fe ekile yi tipi tirile; azini emi nga eri ndru, ’ba nga emi atra ejea, nga avi emi be eli dria.

¹³Ekile mva andrini mva ma asi omilerile, ma nga emi asi omi ’dinile; nga emi asi omi Yerusalemua.

¹⁴Te emi nga ndre ra, asi emini nga ovu ani ayikosi; fala emini nga zo ibiru, ase ibiruni zolerile; azini ’ba nga ni kini dri Yehovani ovu ati’ba ini vuleru, azini eri nga aoko ’ba ari’ba ini ma ruaa,

¹⁵Te mi ndre, Yehovani nga emu aci be, gari ombani erini ’diyi nga ovu: olirikole, eri ma ’ye adra erini okporuri vusi, eri ma ega ’ba dria aci andre dipi dirisi ani.

¹⁶A’disiku Yehovani nga die’yo eti nze ’ba rua ari be ’diyi be dria, acisi azini sei inisi; azini ’ba Yehovani ofule ’diyi yi nga ovu kakau.

¹⁷Te ’ba yi ’bapi alatararu azini yi ma rua ’bapi alaru yi ma mu amvua ’diyi, pati alu ma ngukua angu ma eselia, yini ezo ma za nyaria, afa ’dale ’da ’diyi pie, edro pie dria ’diyi, yi dria nga asi tualu, Yehova ’yo ra.

¹⁸Mani ’yeta yini nile asisile yini berisi; o’du mani ngazu suru dria okuzu tualu, ti ’yoza ndu ndu dria beri emu emu; yi nga emu, yi nga di diza mani ndre ani,

¹⁹te ma nga eceta ’ba yi ma eselia. Azini ma nga ’ba apapi yi ma eselia ’diyi ma ti pe suru ndu ndu ’diyi ma eselia, Tarisisi pia, Fu piu, Ludi pie, yi ’ba osu onzopi ’diyi, Tubali pie, Yavani pie, angu ziri miri tia ’diyi pie, e’yo kuza mani eripi ku kani diza mani ndrepi ku ’diyi; te yi nga diza mani ma e’yo olu suru ndu ndu ma eselia,

²⁰Azini yi nga adripi emini eji engazu suru ndu ndu dria ma eselia edetaru Yehova dri dria ra; yi nga yi eji akanya dria, kani gari ma dria, kani tiko ’bani ’dule ’du ’diyi ma alia, kani akanya farasiru ’diyi ma dria, azini ngamia ongu be tu ’diyi ma dria indi, kpere oni mani alatararu Yerusalemuari vu, Yehova ’yo ra, ekile anzi Israelinini edeta yini ejile Yehova ma jo ma alia afazu alaru ma aliarile,

²¹Ma nga vini ’ba azini ope yi ma eselia ovuzu ’ba edeta edepi ’diyiru, azini ’ba Levini ’diyiru, Yehova ’yoni.

²²Te ekile ’bu o’diru, azini nyaku o’diru mani ngale ’balerini ngale acele ’dani ma miliarile, Yehova ’yo ra; ’dinile indi ori emini nga ace ’dani ’dani ru emini be.

²³Te eri nga di eca ’dini, mba o’diru vusi mba o’diru vusi, azini sabato vusi sabato vusi indi, ’ba rua ari be ’diyi dria nga emu inzi ma drilia, Yehova ’yoni.

²⁴Te yi nga fu ’ba ezapi ma vu ’bo ’diyi ma avu ndre; a’disiku o’bu yini ngani odra ku, aci yini vini ngani i inyu ku, azini ’ba rua ari be ’diyi dria nga yi ngu onzi afa onzikanyarule.