Read lugbara Isaya 9 Bible Online

Isaya 9 - lugbara bible

Isaya 9

¹Te angu biza nga ovu yo suru ndra ovupi candisiri dri. Andra drio eri fe drinza angu Zebulonini pi dri angu Nafutalini be ra, te o’du vilerisi eri ’ba eri dizaru geri miri tiarisi, Yoridania ’aa’dasi, Galili ’ba juruniri.

²Suru ndra acipi angu biza ma: alia’diyi ndre diza amboru ’bo; ’ba ndra ’a’api angu dra ma endrilendriaria’diyi, diza di yi ma dria ’bo.

³Mi fe suru nde ezu kakau ’bo, mi fe ayiko yini aga ra; yi ovu ayikosi mi milia ekile ayiko o’du anya lozurisirile, ekile ’bani ovule ayiko be yini afa opale ombaa ’diyi awariarile.

⁴A’disiku mi nyo teri erini ma arofe, kulumbu eri ma ombeleari pie,kali ’ba eri inzapirini be, ekile o’du Midianisirile.

⁵Afa ombani ’ba omba ’dipi ’diyini sule omba ma alia ’diyi dria, bongo ’bani otrole arisi ’diyi be, yi nga yi ve acisi ejale.

⁶Te mva osi amani ’bo, fe agimva ama dri ’bo; dri cezani nga ovu eri ma ombetia, runi yi nga ’da Osuta’i, ’Ba e’yo Amapiri’i, Mungu okpo E’i’i, Ata ’Dani ’Daniri’i, Opi Asi Anzuruniri’i.

⁷Dri ceza erini pi nga ovu ’dani eti cekokoru asi anzuru be, ogula Daudini ma dria azini suru erini ma dria, eri ’bazu okporu azini eri edrezu uru e’yo liza kililiruri pisi e’yo onyiru be engazu curu’do kpere ’dani ’dani. Ava Yehova asikari ongulumurunini nga e’yo ’diri ’ye ra. Adra Yehovani Israeli vuri

⁸Opi pe e’yo ma ti Yakoboa, eri esi Israeli ma dria ’bo;

⁹te ’ba dria nga e’yo ’diri ni ra, ’ba Efiraimuni ’diyi pi ’ba Samariaa ’diyi be, yi’i ’yopi afusi asi mbazasi ’diyi, kini:

¹⁰Biriki asu yi va, te ama nga jo si oni ’bani osile osi ’diyisi; ’ba oga pati elioru ’diyi va, te ama nga mario o’ba yi paria.

¹¹E’yo ’disi Yehovani nga ari’ba Rezinini enga eri ma ruaa, azini eri nga ari’ba erini enga ra.

¹²’Ba Suriaa ’diyi yi nga ovu drile, ’ba Filisitiaa ’diyi nga ovu vile; yi nga Israelini nya ti walasi. Te ti, adra erini ojani nga i ku, te eri eju nga i ma dri ’dani.

¹³Te ti, ’ba nde ojani nga yi ’ba yi copiri vu ku, yi ndani nga vini Yehova asikari ongulumuruni ku.

¹⁴E’yo ’disi Yehovani nga dri oli va sobi be Israeli ma eseliasi, o’du alu ma alia pati ituni ma arakala omi yiari be-

¹⁵’ba ’wara pi ’ba inzita beri be eri drini, azini nabi e’yo inzoru imbapiri eri sobini;

¹⁶a’disiku ’ba suru ’diri ma dri cepi ’diyi fe yi aba ra, te ’ba yini drini cele ’diyi ovu dri jazaru.

¹⁷E’yo ’disi Opi ngani ovu ayikosi karile yini ma e’yosi ku, eri ngani vini ovu yikisi ’ba yini atakokoru ’diyi vu awuzi yini be ku; te yi dria alu alu ’ba o’da, yi azi onzi ’ye, yi dria alu alu e’yo azazaru ’yo yi ma tisi. Te ti, adra erini ojani nga i ku, te eri eju nga i ma dri ’dani,

¹⁸A’disiku e’yo onzi ve acile, eri oci pi nya afa si be ocile ’dini ’diyi be; ada, eri ti ko pari pati be tu angu oceruri ma alia, eri tu uru acika iniru be.

¹⁹Adra Yehova asikari ongulumurunirinisi angu ve teketeke ’bo, ’ba nde indi yi ovu ekile acinirile; ’ba aluni ovupi asi ndriza be adripi vuni yo.

²⁰Te ’ba azini nga afa ari dri ndia, te ti, abirini eri fu, ’ba azini nga afa nya dri ejia, te ti, yi ti trani ku; yi dria alu alu nga kalanya yi ma ngulupi ma wuari nya’i,

²¹Manaseni nga Efiraimuni nya, te Efiraimuni nga Manaseni nya, te yi iri tro nga omba ’ba Yuda be. Te ti, adra erini ojani nga i ku, te eri eju nga i ma dri ’dani.