Read lugbara 'Ba Levini 1 Bible Online

'Ba Levini 1 - lugbara bible

'Ba Levini 1

¹Te Yehova omve Musani, o’duko erini efu hema ti ecizaniri ma alia, ’yo kini,

²Mi ’yo anzi Israelini ma tia kini, ’Ba alu emi eselia ka afa feza edetaru fe Yehova dri, ma fe eri anyapa ma eselia, kani tini, kani kabiloni.

³Afa edetaru erini feleri ka ovu anyapa ’wara ma eselia, ma ovu tiago onyiru nyebile kokoruri’i; ma fe eri hema ti ecizaniri ma tilea, ’dini Yehova ma a’i agu nde i drilia ani;

⁴eri ma ti i dri edeta vezaruri ma dria, te eri nga ovu a’izaru eri dri eri ma e’yo onzi edezu.

⁵Eri ma so tiago nderi Yehova ma drilia; Aroni anzipi kuhaniru ’diyi nga ari nde ji fezu, oyazu pari edeta edezu hema ti ecizaniri ma tileari ma dria ageiniasi kuru.

⁶Eri ma wu enyiriko edeta vezaru nderini, zani opizu indi;

⁷kuhani Aroni ma anzipi ma edu aci pari edeta edezuri ma dria, ma oti eja aci nderi ma dria;

⁸Aroni anzipi kuhaniru ’diyi ma oti za nde ma esele, drini pi osoni pie, eja ovupi aci pari edeta edezuri ma driari ma dria;

⁹te ma oji aleni pi pa be yisi. Kuhanini nga eri ve dria pari edeta edezuri ma dria, edeta vezaru, edeta edele acisi, aji arikariru Yehova vuriru.

¹⁰Afa erini fele edeta vezaruri ka enga anyapa nyiri ma eselia, kani kabiloni kani ndrini, eri ma fe agoni rua be onyiru nyebile kokoruri’i;

¹¹eri ma li eri pari edeta edezuri ma kala andraleruria Yehova drilia, Aroni anzipi kuhaniru ’diyi nga di arini oya pari edeta edezuri ma dria ageiniasi kuru.

¹²Eri ma opi zani, drini pi osoni pie, te kuhanini nga di yi oti aci pari edeta edezuri ma driari ma dria ra;

¹³te ma oji aleni pi pa be yisi. Kuhanini nga eri fe dria, vezu pari edeta edezuri ma dria; eri edeta vezaru, edeta edele acisi, aji arikariru Yehova vuriru.

¹⁴Afa erini fele Yehova driri ka ovu edeta vezaru ariasiri, eri ma fe di a’balau angarakaru ’diyi, kani a’balau o’buru ma anzi, i ma edetaru’i.

¹⁵Kuhani nga eri ji pari edeta edezuria, nga drini vi kpi, nga eri ve pari edeta edezuri ma dria; ari erini ma ra pari edeta edezuri ma kalaa;

¹⁶eri nga anyawio pi nze, zeni be, nga yi ’be pari edeta edezuri ma ageia, kala etuni efurialeruria, pari ofuta dazuria;

¹⁷eri ma bi opileni eri asizu, te ma ali aleni iri ku. Kuhanini nga di eri ve pari edeta edezuri ma dria, eja aci driari ma dria; eri edeta vezaru, edeta edele acisi, aji arikariru Yehova vuriru.