Read lugbara 'Ba Levini 10 Bible Online

'Ba Levini 10 - lugbara bible

'Ba Levini 10

¹Te Aroni anzipi Nadabu pi Abihu be, yi alu alu nga ajikoa yini aciolu ’bazu ’diyi ’du, nga aci ’ba alenia, nga vini obiese vele veri ’ba drinia, nga aci ndu Yehovani azile kuri fe eri ma drilia.

²Te aci nga di ibi enga Yehova ma driliasi, nga efu yi vezu, yi nga mira ani Yehova ma drilia ra.

³Musa nga di e’yo ’yo Aroni tia kini, E’yo ’diri bani Yehovani ndra ’yoleri kini, Ma nga ma e’da alatararu ’ba esipi ma vu ogogo ’diyi ma alia, azini ma nga inzita isu ’ba dria ’diyi ma milia. Te Aroni adri ini ciri.

⁴Musa nga di Aroni ati ma adri Uzieli ma anzipi Misaeli pi omve Elizafani be, nga ’yo yi tia kini, Emi esi ogogo, emi ji emi adripi ma avuyi engazu pari alatararu ma driliasi kpere pari ’bani hema asozuri ma tia amve.

⁵’Dini yi esi ogogo, nga yi ji koti yini be yi ma ruaa ’dani, pari ’bani hema asozuri ma tia amve, ekile Musani ’yolerile.

⁶Te Musa nga ’yo Aroni pi ma tia anzipi be, yi Eleazari pi tamari be kini, Emi’i emi ku dribi emini guraru ku, emi osi bongo emini ku indi, emi kazu drazu ku, adra erini kazu efuzu ’ba ongulumuru dria ’diyi ma dria ku beni; te emi ku emi adripi, ada suru Israelini ’diyi dria, ma owu aci Yehovani edule vepi ’dirini.

⁷Te emi ma fu hema ti ecizaniri ma tiliasi amve ku, emi kazu odrazu ku; a’disiku odu osule osu Yehovaniri ovu emi dria. Yi ’ye ekile Musani ’yolerile.

⁸Yehova nga di ’yo Aroni tia kini,

⁹Emi ma mvu patiefi su, kani ewa okaru aluni ku emini firia hema ti ecizaniri ma aliaria, kani mi’i, kani mi anzipi, emi kazu odrazu ku; eri ma ovu azita ’dani ’daniriru a’bianzi emini vusi dria.

¹⁰Emi ma co ani afa alatararuri pi ma esele afa alatara kokoruri be, ma co vini afa alaruri pi ma esele afa ondiruri be;

¹¹emi ma imba anzi Israelini ’diyini azita dria Yehovani ’yole yi tia geri Musa ma tiasi ’diyi onizu.

¹²Musa nga ’yo Aroni pi ma tia, anzipi acepi ’diyi be, yi Eleazari pi tamari be, kini, Emi ’du edeta edele anyafurasi acepi jolokoru edeta edele acisi Yehova dri ’diyi ma eseliari, emi ma nya eri akufi kokoru pari edeta edezuri ma ageia, te eri alatararu agapi turi;

¹³emi ma nya eri pari alatararua, a’disiku eri ovu afa azile miniru mi anzipi beri engazu edeta edele acisi Yehova dri ’diyi ma eselia; a’disiku azi ma tia ’dini.

¹⁴Te emi ma nya agati oyale oyari pi o’du ’dule ururi be pari alarua, mi’i, mi anzipi pie, mi ezopi pie tualu; a’disiku yi ovu afa azile eminiru mi anzipi beri, engazu edeta edele asi anzuruni anzi Israelini ’diyini ’diyi ma eselia.

¹⁵Yi ma eji o’du ’dule ururi pi agati oyale oyari be, tualu oso fele edetaru evele acisi ’diyi be, ma oya eri edeta oyale oyariru Yehova drilia; te eri ma ovu mini, mi anzipi be, afa azile eminiru ’dani ’daniri’i; ekile Yehovani azilerile.

¹⁶Te Musa nga ndri edeta e’yo onzi edezuriniri nda okposi, te mi ne, eve eri ’bo! Eri ngaovu ani aokosi Aroni ma anzipi acepi ’diyi vu, yi Eleazari pi tamari be, kini,

¹⁷Emi nyani edeta e’yo onzi edezuri pari alatararu turia ku a’disi ya? A’disiku eri ovu afa alatararu agapi turi, te eri fe eri emi dri e’yo onzi ’ba ongulumuruni ’duzu ani, e’yo onzi yini edezu Yehova ma drilia.

¹⁸Emi ne, ejini arini pari alatararu tu alealeruria ku. Onyiruni emini te nyazu ecekokoru pari alatararu turia, ekile mani azilerile.

¹⁹Te Aroni nga ’yo Musa tia kini, Mi ne, o’du andru ’dorisi yi ede edeta yini e’yo onzi edezuri pi Yehova drilia edeta yini vezaruri be; te ti, e’yo ’dinile ’diyi ’ye yi ma vu ra! Ma ka te edeta e’yo onzi edezuri nya andru ra, e’yoni te nga ovu onyiru Yehova ma milia ra ya?

²⁰Te Musani e’yo ’diri eriria, eri ovu eri ma milia onyiru.