Read lugbara 'Ba Levini 13 Bible Online

'Ba Levini 13 - lugbara bible

'Ba Levini 13

¹Yehova ’yo Musa pi ma tia Aroni be kini,

²’Ba azini ka ovu apipi be i ma rua ma enyirikoa, kani bile of ani, kani pari i alipi ali e’dapi dizaruri, eri ka eca agu nde ma rua enyirikoa azo ofururiru, ka’dini ma ji eri kuhani Aroni vu, kani anzipi erini kuhaniru ’diyi ma azi alu vu,

³kuhani ma ndre azo rua erini ma enyirikoari; ’bi pari azoru nderi ma alia ’diyi ka yi oja emveru ’bo, azini azo nde ka i e’da ekile eri ’ba ali ’di za enyiriko ma etiaria ’bole, ka’dini eri ovu azo ofuni; kuhani ka eri ndre ’boria, eri ma ’yo ’ba nderi ovu alatara kokoru.

⁴Te pari i alipi ali e’dapi dizaruri ka ovu emveru rua erini ma enyirikoa, azini azo nde ka i e’da ekile eri ’dini ali za enyiriko ma etiarile kule, azini ’bi alenia ’diyi ojani yi emveru ku, ka’dini kuhani ma oga ’ba azo be ’diri fuzu ku o’du aziri;

⁵te kuhani ma ndre eri o’du aziririsi, te mi ne, eri ma milia azo nderi ka asi enyiriko mbe drile drile ku, ka’dini kuhani ma oga di eri fuzu ku o’du aziri dika;

⁶te kuhani ma ndre eri dika o’du aziririsi, te mi ne, azo nderi ka ’ba afi ra azini azo nde ka enyiriko mbe drile drile ku, ka’dini kuhani ma ’yo eri ovu alaru; eri kiri azo otipi otiri’i, eri ma oji bongo ini, ma ovu alaru.

⁷Te otiza nderi ka e’do enyiriko mbe drile drile erini i ecezu kuhani milia i ’bazu alaruri ma votia, eri ma e’da i dika kuhani ma milia;

⁸azini kuhani ma ndre, te mi ne, otiza nderi ka enyiriko mbe drile ’bo, ka’dini kuhanini nga di ’yo eri alatara kokoru; eri ofuni.

⁹’Ba azini ka ovu azo ofuni be, ma ji ’ba nderi kuhani vu;

¹⁰kuhani ma ndre, te mi ne, apipi emveru ka ovu enyirikoa, ’bi ka yi oja emveru, azini pari ekaru bileru ka ovu apipi nde ma alia,

¹¹ka’dini eri ovu azo ofuni okuri rua erini ma enyirikoa, kuhani ma ’yo ani eri alatara kokoru; eri ma oga eri fu kosi ku, a’disiku eri alatara kokoru.

¹²Te ofu ka eri ma enyiriko nya kurubu ’bo, ’dini ofu ka ’ba azo beri ma enyiriko nya dria ’bo engazu dria cazu paa, ekile erini e’dale kuhani ma miliarile,

¹³kuhanini nga di eri ndre ra, ka isu ofu ere i eri ma ruaa dria ’bo, eri ma ’yo ani ’ba azo be ’diri ovu alaru; azo nde oja i dria emveru ’bo, agu nderi ovu alaru.

¹⁴Te pari ekaru bileruni nga i e’daria eri ruaaria, eri nga ovu alatara kokoru.

¹⁵Kuhani ma ndre pari ekaru bileruri, ma ’yo eri alatara kokoru; pari ekaru bileruri ovu alatara kokoru, eri ofuni.

¹⁶Te pari ekaru bileru nderi ka i oja dika ecazu emveru, eri ma emu di kuhani vu,

¹⁷kuhani ma ndre eri, te mi ne, azo nderi ka i oja emveru ’bo, kuhani ma ’yo ’ba azoru nderi ovu alaru; eri alaru.

¹⁸Apipi japi ’bori ka ovu enyiriko ’ba ma ruaaria,

¹⁹te pari apipi nderini ka pi emveru, kani ka i ali dizaru ekaru were, ma e’da eri kuhani milia;

²⁰kuhani ma ndre ra, te mi ndre, ka i e’da ekile eri ’di ali enyiriko ma etia ’bole, azini ’bi alenia ’diyi ka yi oja emveru ’bo, ka’dini kuhani ma ’yo eri alatara kokoru; eri ovu azo ofuni, eri e’do eri nya apipi nde ma alia.

²¹Te kuhani ka eri ndre, te mi ne, ’bi emveru ’diyi alenia yo, ’dini ali enyiriko ma etia ku, te eri e’do afi ra, ka’dini kuhani ma oga eri fuzu ku o’du aziri;

²²te eri ka enyiriko mbe drile drile, kuhani ma ’yo eri alatara kokoru; eri azoni.

²³Te pari i alipi dizaruri ka i ere ku, eri ovu apipi ma nyebileko; kuhani ma ’yo eri alaru.

²⁴Te enyiriko ’ba ma ruaari ka ovu aciove be, azini pari ekaru bileru aciove nderini ka i oja pari i alipi dizaru ekaru were, kani emveruri,

²⁵ka’dini kuhani ma ndre di eri, te mi ne, ’bi pari i alipi dizaruri ma alia ’diyi ka yi oja emveru ’bo, azini eri e’da i ekile eri ’di ali enyiriko ma etia ’bole, ka’dini eri ofuni; eri e’do eri nya aciove nderi ma alia, kuhani ma ’yo ani eri alatara kokoru; eri azo ofuni.

²⁶Te kuhani ka eri ndre ra, te mi ne, ’bi emveru ovuni pari i alipi dizaruri ma alia ku, azini ’dini vini ali enyi ma etia ku, te eri e’do afi ra, ka’dini kuhani ma oga eri fuzu ku o’du aziri,

²⁷te kuhani ma ndre eri o’du aziririsi; te azo nde ka enyiriko mbe drile drile ’bo, kuhani ma ’yo eri ovu alatara kokoru; eri ovu azo ofuni.

²⁸Te pari i alipi dizaruri ka ovu ’dani i paria, ka enyiriko mbe drile drile ku, te e’do afi ra, eri kiri aciove nderi ma oli efuni, te kuhani ma ’yo ani eri alaru; a’disiku eri aciove nderi ma nyebilekoni.

²⁹Agupi kani oku ka ovu azo be dria, kani tiembilembia,

³⁰kuhani ma ndre azo nderi; te mi ne, ka i e’da ekile eri ’di ali enyiriko ma etia ’bole, azini ’bi alenia ’diyi ka ovu fororu opekuperu, ka’dini kuhani ma ’yo eri alatara kokoru; eri azo otipi otiri, eri ovu ofu driari kani tibiari’i.

³¹Te kuhani ka azo otipi otiri ndre, eri ka i e’da ekile ’dini ali enyiriko ma etia kule, azini ’bi iniru ovuni alenia ku, ka’dini kuhani nga ’ba azo otipi otiri beri oga fu kosi o’du aziri,

³²te o’du azirisi kuhani ma ndre azo nderi; te mi ne, azo otipi otiri ka i ere drile ku, azini dribi fororu ka ovu alenia ku, azini azo otipi otiri ka i e’da ekile ’dini ali enyiriko ma etia kule,

³³ka’dini eri ma fa dribi kani tibi erini ra, te ma fa pari otipi otiri ku; kuhani ma oga ’ba azo otipi otiri beri fu kosi o’du aziri dika;

³⁴o’du aziririsi kuhani ma ndre azo otipi otiri ra, te mi ndre, azo otipi otiri ka enyiriko mbe drile drile ku, ka i e’da ekile ’dini ali enyi ma etia kule, ka’dini kuhani nga ’yo eri alaru; eri ma oji bongo ini, ma ovu alaru.

³⁵Te azo otipi otiri ka enyiriko robe drile drile yini eri ’bazu alaruri ma vutia,

³⁶kuhani ma ndre di eri, te mi ndre, azo otipi otiri ka enyiriko mbe drile ’bo, kuhani ma nda dribi fororu ku; eri ovu alatara kokoru.

³⁷Te eri ma milia azo otipi otiri ka i ere drile ku, azini vini ’bi iniru enga alenia ’bo, ka’dini azo otipi otiri ati ’bo, eri ovu alaru; kuhani ma ’yo eri alaru.

³⁸Te agupi kani oku ka ovu pari alipi ali dizaru ’diyi be enyiriko yi ma ruaaria, ada pari alipi ali dizaru emveru ’diyi,

³⁹kuhani ma ndre ra, te mi ne, pari alipi ali dizaru enyiriko yi ma ruaaria ’diyi ka ovu emve pura puraru, eri elindi efupi enyirikoari; eri ovu alaru.

⁴⁰Agupi ma dribi ka yi mbe i ma driasi, eri dri be tuaru, te eri ovu alaru.

⁴¹Te eri ma dribi ka yi robe andretialeru, mboasi, eri ’ba dri be tuaru mbo beri, te eri alaru.

⁴²Te azo ekaru wereri ka ovu eri ma dri tuaria, kani eri ma andreti tuaru mbo beria, eri azo ofuni efupi dri erini tuaria, kani eri ma andreti tuaru mbo beria.

⁴³Kuhani ma ndre di eri, te mi ne, azo nderi ma oli ka efu ekaru were eri ma dri tuaria, kani eri ma andreti tuaru mbo beria, ekile azo ofuni i e’dale enyiriko ’ba ma ruaariarile,

⁴⁴eri ’ba ofu beri, eri alatara kokoru; kuhani ma ’yo ecekokoru eri alatara kokoru; azo erini ovu erima dria.

⁴⁵’Ba ovupi azo ofuni beri ma asi i ma bongo ra, ma ku dribi i ma driari ombe kokoru ’dani, eri ma a’bu i ma ti uruleruri ci, ma oyu kini, Ma alaru yo! Ma alaru yo!

⁴⁶Eri ma ovu alatara kokoru ’dani o’du dria erini ovuzu azo nderi berisi; eri ovu alatara kokoru; eri ma ovu a’dule, pari erini ovuzuri ma ovu pari ’bani hema asozuri ma tia amve.

⁴⁷Bongo azo ofuni ovuzu aleniari, ka ovu bongo cale kabilo ’bikosiri kani bongo mile be nyiriari ti,

⁴⁸azo nde ka ovu baka izu agoferu ’diyi ma alia, kani alamaru ’diyi ma alia, kani bongo mile be nyiriari ma alia, kani cale kabilo ’bikosiri ma alia, kani enyi ma alia, kani afa dria edele enyisi ’diyi ma alia,

⁴⁹azo nde ka i e’da iribi ma wurale, kani emu were bongo ma ruaa, kani enyi ma ruaa, kani baka izu agoferu ’diyi ma alia, kani alamaru ’diyi ma alia, kani afa edele enyisi ’diyi ma azi ma alia ti, eri azo ofuni, ma ece eri kuhani dri.

⁵⁰Kuhani ma ndre azo nderi, ma opi afa ovupi azo nde be ’diri o’du aziri;

⁵¹o’du aziririsi eri ma ndre azo nderi. Azo nderi ka i ere bongo nderi mbezu drile drile ’bo, kani baka izu agoferu ’diyi ma alia, kani baka alamaru ’diyi ma alia, kani enyi ma alia, enyi nderi ka adri azi ngoni ngori ’ye ti, ka’dini azo nderi ovu ofu i erepi mbeleri’i; eri alatara kokoru.

⁵²Eri ma eve bongo nde, azoni ka ovu baka izu agoferu ’diyi ma alia, kani baka alamaru ’diyi ma alia, kani bongo cale kabilo ’bikosiri ma alia, kani bongo mile be nyiriaruri ma alia, kani afa ngoni ngori edele enyisiri ti, a’disiku eri ofu i erepi mbeleri’i; ma eve eri acisi.

⁵³Te kuhani ka eri ndre, te mi ne, azo nderi ereni i bongo mbezu drile drile ku, kani baka izu agoferu ’diyi ma alia ku, kani baka alamaru ’diyi ma alia ku, kani afa ngoni ngori edele enyisiri ma alia dria ku,

⁵⁴kuhani ma azi di yi ma oji afa azoni ovuzu ruaniari ra, ma opi di eri o’du aziri dika;

⁵⁵te kuhani ma ndre, yini azoni ojizu ’bori ma vutia. Te mi ne, azo nde ka i ma wura oja ku, ka tro i ere ku ti, eri alatara kokoru; mi ma eve eri acisi, eri azo i erepi mbeleri, pari i nyapi nyari ka ovu alialeru kani amveleru ti,

⁵⁶Te kuhani ka eri ndre ra, te mi ne, azo nde ’ba i de ra ojiza ma vutia, eri ma esi pari nde bongo ma ruaasi, kani enyi ma ruaasi, kani baka izu agoferu ’diyi ma aliasi, kani alamaru ’diyi ma aliasi;

⁵⁷te eri ka nga i e’da dika bongo ruaa, kani baka izu agoferu ’diyi ma alia, kani alamaru ’diyi ma alia, kani afa ngoni ngori edele enyisiri ma alia, eri efu i erezu; mi ma eve afa nde azo be ruaari acisi ra.

⁵⁸Te bongo, kani baka izu agoferu ’diyi, kani alamaru ’diyi, kani afa ngoni ngori edele enyisiri ti, mini ojile ’diyi, azo ka fu yi ruaarisi ra, ma oji eri pale irisi dika, eri ma ovu alaru ani.

⁵⁹’Diri azita dra ofuruniri’i, ka ovu bongo cale kabilo ’bikosiri ma alia, kani bongo mile be nyiriari ma alia, kani baka izu agoferu ’diyi ma alia, kani alamaru ’diyi ma alia, kani afa ngoni ngori edele enyisi ’diyi ma alia dria ti, nizu ’yozu kani eri alaru kani alatara kokoru.