Read lugbara 'Ba Levini 14 Bible Online

'Ba Levini 14 - lugbara bible

'Ba Levini 14

²’Ba ofu beri ma azita, o’du yini eri ’bazu alarurisiri eri ’di. Ma eji eri kuhani vu;

³kuhani ma fu pari ’bani hema asozuriasi amve, te kuhani ma ndre ra, te mi ne, azo ofuni ka ati ra ’ba ofu beri ma ruaa,

⁴kuhani ma azi aria alaru iri idriru ’diyi pi o’duzu ’ba yini ngale ’bale alaruri dri, mario pati ma bidrile pie, baka ekaruri pie, edikobi pie;

⁵kuhani ma azi aria ’diyi ma azi alu lizu imvu sile odrisiri ma alia, yi ara ma dria.

⁶Eri nga aria idriruri pi o’du, mario pati ma bidrile pie, baka ekaruri pie, edikobi pie, nga yi osu aria idriruri be, aria yini lile yi ara ma driari ma ari ma alia;

⁷eri nga arini oya pale aziri ’ba yini ngale ’bale alaru ofu ma e’yosiri ma ruaa; eri nga di ’yo eri alaru, nga aria idriruri tru ku sazu asea.

⁸’Ba yini ngale ’bale alaruri ma oji bongo ini, ma fa dribi ini dria, ma oji i rua yisi, eri nga ovu ani alaru; di ma vutia eri ma eli pari ’bani hema asozuria, te eri ma fi hema ini ma alia ku, ma ovu amve o’du aziri.

⁹O’du aziririsi eri ma fa dribi ini i ma driari pi dria, tibi ini pie, mileogu ini be, ada biko i ma ruaari dria. Eri ma oji di bongo ini, ma oji i ma rua yisi, eri nga ovu ani alaru.

¹⁰O’du arorisi eri ma o’dukabiloanzi agoru nyebile kokoru ’diyi iri, kabilo aroniru nyebile kokoru alu eli be aluri pie, anyafura inikiniru afazu abakaru alu ma esele na mudriniri osale odusi ovuzu edeta edele anyafurasiriruri pie, odu okelea alu ma aliari pie.

¹¹Te kuhani eri ’bapi alaruri ma ’ba agu erini ngale ’bale alaruri tualu afa ’diyi be Yehova ma drilia hema ti ecizaniri ma tilia.

¹²Kuhani ma ’du kabilomva alu, ma ede eri edeta ezata edezuriru odu nde okelea aliari be, ma oya yi Yehova drilia edeta oyale oyariru;

¹³eri ma li kabilomva nderi pari yini adrizu edeta e’yo onzi edezuri pi olizu edeta vezaruri beria, pari alatararuri ma alia; a’disiku edeta ezata edezurini ovu kuhani ma afaru trotro ekile edeta e’yo onzi edezurilerisi; eri ovu alatararu tu.

¹⁴Kuhani ma ebe edeta ezata edezuri ma ari ma azi, ma ’ba eri ’ba yini ngale ’bale alaruri ma bidrile dri ndiaria, azini eri ma driago dri ndiari ma dria, eri ma paago dri ndiari ma dria indio

¹⁵Kuhani ma ’du odu okelea aliari ma azi, ma osu eri i ma dri agele dri ejiaria,

¹⁶ma su i drileju dri ndiari odu ovupi i ma dri agele dri ejiariari ma alia, ma oya odu nderi ma azi i drilejusi Yehova ma drilia pale aziri.

¹⁷Kuhani ma ’ba odu acepi i ma dri agele dri ejiari ma aliari ma aziniri ’ba yini ngale ’bale alararuri ma bidrile dri ndiaria, azini eri ma driago dri ndiari ma dria, eri ma paago dri ndiari ma dria indi, ari teka edeta ezata edezurini ma dria;

¹⁸kuhani ma ’ba odu ma joloko acepi i ma dri ageliari ’ba yini ngale ’bale alaruri ma dria. Kuhani nga di e’yo onzi erini ede Yehova ma drilia ani.

¹⁹Kuhani ma ede edeta e’yo onzi edezuri, ’ba yini ngale ’bale alaruri ma e’yo onzi edezu e’yo ’onzi erinisi. Vutinia eri ma nga edeta vezaruri li ndo;

²⁰kuhani ma ede edeta vezaruri pi pari edeta edezuri ma dria, edeta edele anyafurasiri be. Kuhani ma ede e’yo onzi erini, eri nga ovu ani alaru beni.

²¹Te ’ba nde ka ovu alioni, alio ka eri oga afa fe ko ’dipini, ka’dini eri ma ’du kabilomva alu edeta ezata edezu oyale oyariru, e’yo onzi erini edezu, ma ’du vini anyafura inikiniru afazu abakaru esele alu mudriniri osale odusi ovuzu edeta edele anyafurasiriruri pie, odu okelea alu ma aliari pie;

²²azini vinila’balau angarakaru iri, kani a’balau o’buru ma anzi iri, ekile erini ecole isulerile; aluri ma ovu edeta e’yo onzi edezuriru, aziniri edeta vezaruriru.

²³O’du arorisi eri ma eji yi kuhani vu, i ’bazu alaru, hema ti ecizaniri ma tilia Yehova ma drilia;

²⁴kuhani ma ’du kabilomva edeta ezata edezurini pi odu okelea ma aliari be, kuhani ma oya yi edeta oyale oyariru Yehova ma drilia.

²⁵Eri ma li kabilomva edeta ezata edezurini; kuhani ma ebe ari nderi ma azi, ma ’ba eri ’ba yini ngale ’bale alaruri ma bidrile dri ndiaria, azini eri ma driago dri ndiari ma dria, eri ma paago dri ndiari ma dria indio

²⁶Kuhani ma osu odu nderi ma azi i ma dri agele dri ejiaria;

²⁷ma oya odu ovupi i ma dri agele dri ejiari ma aliari ma aziniri i drileju dri ndiarisi pale aziri Yehova ma drilia;

²⁸kuhani ma ’ba odu ovupi i ma dri ageliari ma aziniri ’ba yini ngale ’bale alaruri ma bidrile dri ndiaria, azini eri ma driago dri ndiari ma dria, eri ma paago dri ndiari ma dria indi, pari teka yini ari edeta ezata edezurini ’bazuria;

²⁹kuhani ma ’ba odu ma joloko acepi i ma dri ageliari ’ba yini ngale ’bale alaruri ma dria, e’yo onzi erini edezu Yehova ma drilia.

³⁰Eri ma ede a’balau angarakaru kani a’balau o’buru ma anzi ekile erini ecole isulerile,

³¹aluri edeta e’yo onzi edezuriru, aziniri edeta vezaruriru, ada ekile erini ecole isulerile, edeta edele anyafura siri be tualu; kuhani ma ede ’ba yini ngale ’bale alaruri ma e’yo onzi Yehova ma drilia.

³²’Diri azita ’ba ovupi dra ofuni be i ruaa, ecopi afa i ’bazu alaru ’diyi isupi kuri ma e’yosiri’i.

³³Yehova ’yo Musa pi ma tia Aroni be kini,

³⁴Emi ka nga fi angu Kanani mani fele emi dri i ovuzu angu eminiruri ma alia ’bo, ma ka nga dra ofuni ’ba jo azini ovupi angu emini ma aliari ma alia,

³⁵ka’dini jo e’i ma emu e’yo ece kuhani dri, ’yozu kini i ma milia ekile dra ovu jo ma ruaa indile.

³⁶Kuhani nga di azi afa dria joa ’diyi ofuzu amve, de nga kuhani fini dra nderi ndrezu ku, afa dria jo alia ’diyi kazu ovuzu alatara kokoru ku; vutinia kuhani ma fi di jo ale ndrezu ndo.

³⁷Eri ma ndre dra nderi; dra nde ka ovu jo abi ma ruaa ci, ka e’da osizaru guruguru iribiru kani ekaru were, azini ’eri ka e’da ’ba ma milia ekile eri fi abi alia guru,

³⁸ka’dini kuhani nga fu joasi amve jotilia, tini opizu kuzu ci o’du aziri.

³⁹Kuhani ma nga di emu dika o’du aziririsi, ndrezu; te mi ne, dra nderi ka i ere jo abi ma ruaa ’bo,

⁴⁰ka’dini kuhani ma azi oni ovupi dra nderi be yi ma ruaa ’diyi onzezu, yi o’bezu pari okurunyaru aperitiaria amve;

⁴¹azini eri ma fe yini jo ale fazu kalaniasi dria, te yi ma da odri yini faleri pari okurunyaru aperitiaria amve;

⁴²te yi ma o’du oni azini, yi osuzu teka ’diyi ma paria, eri ma ’du vini odri azini,ma e’bura jo nderi.

⁴³Te azo nde ka emudika, ka efu jo nderi ma ruaa, erini oni onzezu, odri fazu, jo e’burazuri pieri ma vutia,

⁴⁴ka’dini kuhani ma fi di ndre; te dra nderi ka i ere jo alia ra, eri ofu i erepi ere jo nderi ma ruaari’i; eri alatara kokoru.

⁴⁵Eri ma asu jo nderi va, onini pie, patini pie, odri jo abi ruaari pie dria; ma oji yi pari okurunyaru aperitiaria amve,

⁴⁶Azini vini ’ba fipi jo nde ma alia, de opi eri ’bori, nga ovu alatara kokoru cazu kpere ondresi;

⁴⁷’ba lapi jo ndeari ma oji i ma bongo ra; azini ’ba nyaka nyapi jo nde ma aliari ma oji vini i ma bongo indio

⁴⁸Te kuhani ka nga fi, ka ndre ra, te mi ne, dra nderi ereni i jo ma ruaa yini jo e’burazu ’bori ma vutia ku, ka’dini kuhani nga di ’yo jo nderi ovu alaru, a’disiku dra nde ati ’bo.

⁴⁹Eri ma o’du aria iri pi, mario pati ma bidrile pie, baka ekaruri pie, edikobi pie, jo nderi ’bazu alaru,

⁵⁰ma li aria ’diyi ma azi alu imvu sile odrisiri ma alia, yi ara ma dria,

⁵¹ma o’du mario pati ma bidrile pi, edikobi pie, baka ekaruri pie, aria kule mile beri pie, ma osu yi aria lileri ma ari ma alia, nga yi osu vini yi ara ma alia, oyazu jo ruaa paleko aziri.

⁵²Eri ma ’ba ani jo nderi alaru aria ma ari pisi, yi ara pie, aria mile beri pie, mario pati ma bidrile pie, edikobi pie, baka ekaruri pie;

⁵³eri ma tru aria mile beri, ma ku eri ma sa akuarisi asea; eri ma ede jo nderi ma onzi ’dini, eri ma ovu ani alaru beni.

⁵⁴’Diri azita dra ofuru dria ’diyiniri: azo otipi otiri pi,

⁵⁵ofu bongo ruaari pie, joari pie,

⁵⁶apipi pie, bileofa pie, pari i alipi ali e’dapi dizaruri pie,

⁵⁷ecezu kani eri alatara kokoru, kani eri alaru. ’Diri azita dra ofunisiri’i.