Read lugbara 'Ba Levini 17 Bible Online

'Ba Levini 17 - lugbara bible

'Ba Levini 17

¹Te Yehova ’yo Musa tia kini,

²Mi ’yo Aroni pi ma ria anzipi be, anzi Israelini ’diyi pie dria, mi ’yo yi tia kini; ’Diri e’yo Yehovani azileri’i.

³’Ba ngoni ngori suru Israelini ma eselia ka ri so, kani kabilo li, kani ndrini, pari ’bani hema asozuri ma alia, kani ka eri li pari ’bani hema asozuri ma tia amve,

⁴te isu ejini eri hema ti ecizaniri ma tilia eri fezu fetaru Yehova dri hema Yehovani ma drilia oko ku, yi nga agu nderi la avutia; eri ada ari ’bo; yi nga ’ba nderi dri ja o’dipi ma eseliasi ra.

⁵E’yoni ’dini, ’ba Israelini ’diyini anyapa yini olile asea ’diyi ejizu Yehova vu ani beni, ’dini ma eji yi hema ti ecizaniri ma tilia kuhani vu, ma oli yi ani edeta asi anzuru Yehova vu ’diyiru;

⁶kuhani ma oya ari nderi pari edeta ’edezu Yehova dri hema ti ecizaniri ma tiliari ma dria, ma eve osoniri aji arikari Yehova dririru.

⁷’Dini yi ma ede edeta yini adrou yini yi ma vuti bizu ali o’bazasi ’diyi dri dika ku. ’Diri ma ovu yi dri azitaru ’dani ’dani a’bianzi yini vusi.

⁸Te mi ma ’yo yi tia kini, ’Ba dria alu alu suru Israelini ma eselia, kani ani’ba ovupi yi ma eselia ’diyi ma eselia, edeta vezaru vepi kani edeta edepi,

⁹te eri ejipi oko hema ti ecizaniri ma tilia eri edezu Yehova dri kuri; yi nga ’ba nderi dri ja o’dipi ma eseliasi ra.

¹⁰’Ba azini suru Israelini ma eseliari, kani ani’ba ovupi yi ma eselia ’diyi ma eseliari, ka afa ngonini ma ari nya, ma nga ma mile ’ba ’ba nde ari nyapiri ma ruaa ombaru, drini jazu o’dipi eseliasi ra.

¹¹A’disiku rua ma idriri ari ma alia; azini ma fe eri emi dri ’bo pari edeta edezuri ma dria e’yo onzi edezu emi orindi dri; a’disiku arini e’yo onzi ede idri ma e’yosini.

¹²E’yo ’disi ma ’yo anzi Israelini ma tia kini, ’Ba aluni emi eseliari ma nya ari ku, azini vini ani’bo aluni emi eseliari ma nya ari ku indio

¹³’Ba dria alu alu anzi Israelini pi ma eselia ani’ba ovupi yi ma eselia ’diyi be, anyapa kani aria ’bani ecole nyale rari gbipi erini za ndariari, ma osu arini ra, ma ku nyaku drinia ci.

¹⁴A’disiku rua dria ma idriri ari eriniri’i; e’yo ’disi ma ’yo anzi Israelini ma tia kini, Emi ma nya ari afa rua ari beri vileri aluni ku, a’disiku rua dria ma idriri ari eriniri’i; yi nga ’ba dria alu alu eri nyapiri a dri ja ra.

¹⁵’Ba dria afa drapi ceniri kani afa nguruni cileniri nyapiri, ka kari’bani kani ani’boni ti, ma oji bongo suza ini, ma oji i rua yisi, ma ovu alatara kokoru cazu kpere ondresi; eri nga di ovu alaru ndo.

¹⁶Te eri ka bongo nde oji ku, ka i rua oji vini ku, ka’dini eri nga e’yo onzi ini ’du i’i.