Read lugbara 'Ba Levini 18 Bible Online

'Ba Levini 18 - lugbara bible

'Ba Levini 18

¹Yehova ’yo Musa tia kini,

²Mi ’yo anzi Israelini ma tia ’yozu kini, Ma Yehova Mungu eminiri’i.

³Emi ma ’ye ekile ’ba angu Misiria emini ndra ovuzu yi ma eselia ’diyini ’yelerile ku, azini vini emi ma ’ye ekile ’ba angu Kanania mani ngazu emi jizu yi vu ’diyini ’yelerile ku indio Emi ma aci azita ’yini ’diyi vusi ku.

⁴Emi ma ’ye e’yo liza mani ’diyi, emi ma mba azita mani ’diyi ma ta, acizu yi alia. Ma Yehova Mungu eminiri’i.

⁵E’yo ’disi emi ma mba azita mani ’diyi ma ta, e’yo liza mani ’diyi be, te ’ba ka yi ’ye ra eri nga idri isu ani ma Yehova’i.

⁶’Ba aluni emi eseliari ma esi ori’ba ini ogogori vu eri otruzu pililiru ku. Ma Yehova’i.

⁷Mi ma otru rua pililiru mi ati vileri ku, eri adani rua pililiru mi andriniri’i; eri mi andri’i, mi ma otru eri pililiru ku.

⁸Mi ma otru mi ati vile oku rua pililiru ku; eri ovu mi ati ma rua pililiruri’i.

⁹Mi ma otru mi amvi ma rua pililiru ku, kani ata ma mvani kani ayiamvani, kani tile akuari kani tile juruari ti; mi ma otru yi ma rua pililiru ku.

¹⁰Mi ma otru mi mvi ma zi ma rua pililiru ku, kani mi zi ma zi ma rua pililiru ku indi, a’disiku rua pililiru yini ovu rua pililiru mi ngulupiniri’i.

¹¹Mi ma otru mi amvi atani, mi atini tileri, ma rua pililiru ku; eri mi amvi’i, mi ma otru eri pililiru ku.

¹²Mi ma otru mi ati ma amvi ma rua pililiru ku; eri mi ati ma ori’ba ogogori’i.

¹³Mi ma otru mi andri ma amvi ma rua pililiru ku; a’disiku eri mi andri ma ori’ba ogogori’i.

¹⁴Mi ma otru rua pililiru mi ati ma adripi vileri ku, adani mi ma esi oku erini vu ogogo i ku; eri ovu mi andriani.

¹⁵Mi ma otru mi zia ma rua pililiru ku; eri mi mvi vile okuri’i, mi ma otru eri rua pililiru ku.

¹⁶Mi ma otru mi adri vile oku ma rua pililiru ku; eri mi i adri ma rua pililiruri’i.

¹⁷Mi ma otru oku pi ma rua pililiru zi izimandriruri be ku, mi ma ’du mvi erini izimandriru ma zi ku, kani zi erini izimandriru ma zi ku indi, yi ma rua otruzu pililiru; yi ovu ori’ba mini ogogo ’diyi; eri e’yo onzini.

¹⁸Mi ma ’du oku mini ma amvini ovuzu a’iaziru a’ya ’bazu eri be ku, mi otru eri rua pililiru de nga amvini ovuzu idriruria ku.

¹⁹Mi ma esi ogogo oku vu eri ma rua otruzu pililiru, ewu erini ovuzu ndu alatara kokoru a’bi suzurisi ku.

²⁰Mi ma ’ba ali ’ba mi jo ejeleari vile okusi, mini mi ezazu eri be ku.

²¹Mi ma fe anzi mini ma aluni ma aga aci alesi Moleki dri ku; mi ma eza Mungu miniri ma ru ku: ma Yehova’i.

²²Mi ma la agupisi ekile ’bani lale oku berile ku; e’yo nderi ovu e’yo ngule onziri’i.

²³Mi ma la anyapasi, mini mi ezazu ’dini ku; ’dinile indi oku aluni ma so vini pa anyapa drilia erini lazu isi ku: eri e’yo etiza onzikanyaruri’i.

²⁴Emi eza emi alatara kokoru e’yo ’diyi ma azisi aluni ku, a’disiku suru mani o’bele amve emi drilia ’diyi eza yi alatara kokoru e’yo ’diyisi dria ’bo;

²⁵angu eca ani ezazaru alatara kokoru, e’yo ’disi ma e’yo onzi erini omvi eri dria be, anguni ’ba ovupi alenia ’diyi ogbe ani amve ra.

²⁶Te emi ma mba azita mani piyi ma ta, e’yo liza mani ’diyi be, emi ma ’ye e’yo ngule onzi ’diyi ma azi aluni ku, kani kari’bani kani ani’bo ovupi emi eseliari ti

²⁷(a’disiku ’ba angu e’ipiru emi drilia oko ’diyi ’ye ndra e’yo ngule onzi ’diyi dria ri, angu ovu ezazaru ala tara kokoru ani);

²⁸angu kazu emi ogbezu indi ewu emini eri ezazurisi ekile erini suru emi drilia okori ogbelerile ku.

²⁹A’disiku ’ba dria alu alu e’yo ngule onzi ’diyi ma azi ’yepiri, yi nga ’ba nde ’yepi ’diyi ma dri ja o’dipi eseliasi ra.

³⁰E’yo ’disi emi mba e’yo mani azileri ma ta, ma ’ye e’yo ngule onzi adrile ’yele emi drilia aka ’diyi ma azi aluni ku, emi eza emi alatara kokoru e’ya ’diyisi aluni ku: ma Yehova Mungu eminiri’i.