Read lugbara 'Ba Levini 19 Bible Online

'Ba Levini 19 - lugbara bible

'Ba Levini 19

¹Yehova ’yo Musa tia kini,

²Mi ’yo anzi Israelini ongulumuru ’diyi ma tia dria, ’yozu kini, Emi ma ovu alatararu; a’disiku ma’i Yehova Mungu mini, ma alatararu.

³Emi dria alu alu ma inzi emi ati pi emi andri be, emi ma mba sabato mani ’diyi ma ta indi ma Yehova Mungu eminiri’i.

⁴Emi oja emi wura inzile inzi ’diyi vu ku, emi ede emi dri Mungu edele aya rapi acisirisi ’diyi ku: ma Yehova Mungu eminiri’i.

⁵Emi ka afa feza asi anzuruni ’diyi ma edeta ede Yehova dri, emi ma ede eri ’dini emi ma ovu a’izaru ani beni.

⁶Ma nya eri o’du emini eri edezurisi, kani drusi; azu jolokoni ka ace cazu kpere o’du naria,ma eve eri acisi.

⁷’Ba ka eri nya o’du nasi, werea ti, eri afa ngule onziri’i; ngani eri a’i ku,

⁸te ’ba dria alu alu eri nyapiri nga e’yo onzi ini ’du i’i, a’disiku eri eza afa alatararu Yehovaniri ra; yi nga ’ba nderi ma dri ja o’dipi ma eseliasi ra.

⁹Emi ka anya angu eminia ’diyi lo, mi ma lo teketeke kpere amvu ma kalatia ku, mi ma nda anya vile anya lozu ’bori ma vutia vini ku indio

¹⁰Mi ma ti zabibu vile amvu mini zabibuniri ma alia ku, ma oku zabibu efi lupi va amvu mini zabibuniria ’diyi vini ku indi; mi ma ku yi alia pi dri ani’bo be ma Yehova Mungu eminiri’i.

¹¹Emi ogu afa ku, emi ’ye lokiri ku, emi li inzo emi eselia ku.

¹²Emi ma otri emi ma rusi inzoru, mini Mungu mini ma ru ezazu ’dini ku: ma Yehova’i.

¹³Mi ma inza ’ba mi jo ejeleari mile mbasi ku, mi ogu afa erini ku. ’Ba azi ngapi oyasiri ma oya ma la mi vu ini rra cazu o’bitisi ku.

¹⁴Mi ma o’da ’ba bile kokoru ku, mi ma ala vini kumu ’ba mile kokori ma drilia eri elizu ku indi, te mi ma ru Mungu mini: ma Yehova’i.

¹⁵Emi ma ’ye e’yo kililiru kuri e’yo liza ma alia aluni ku; mi ma ope ’ba alioru erini ovule alionirisi ku, mi ma inzi vini ’ba amboru erini ovule ambonirisi ku indi, te mi ma li ’ba mi jo ejeleari ma e’yo kililiru.

¹⁶Mi ma aci ’dale ’dole ’ba mini ma eselia ’ba ru ojizu asule ku, mi ma so pa asu suzu ’ba mi jo ejeleari ma ruaa eri ma ari adazu ku indi: ma Yehova’i.

¹⁷Mi ma ngu mi adripini onzi mi asia ku, te mi ma ega ’ba mi jo ejeleari ma dria, mi kazu ovuzu e’yo onzi be mi dria eri ma e’yosi ku.

¹⁸Mi ma ofe arioti ’ba ma ruaa ku, mi ma ti o’dipianzi ma e’yo mi asia ku, te mi ma le ’ba mi jo ejeleari mini mi ngulupi lelerile: ma Yehova’i.

¹⁹Emi ma mba azita mani ’diyi ma ta. Mi ma fe monio minini anyapa andini amvazu ku; mi ma ri ori suruti iri amvu mini ma alia ku; mi ma su mi ruaa bongo cile suruti iri osazaruri ku.

²⁰’Ba ka ali ’ba ati’bo okururisi, de isu azi eri fezu okuru ’ba azini dri ’bo, te onzeni nga eri ku, truni nga vini eri ku indi, ka’dini yi ma fe panga yi dri. Te ngani yi ofu ku, a’disiku erini ovule truzaru kurisi;

²¹te agu nde ma eji edeta ezata ini edezuri Yehova vu hema ti ecizaniri ma tilia, ada kabiloago edeta ezata edezuriru.

²²Kuhanini nga e’yo onzi erini ede Yehova ma drilia kabiloago edeta ezata edezurirurisi e’yo onzi erini ’yele ’borisi; e’yo onzi erini ’yele ’bori nga ovu ani wuzaru eri dri beni.

²³Emi ka nga fi angu nde ma alia, ka nga pati dria ma suruti ndu ndu ’diyi sa nyakaru ’bo, patiefi nde ma ovu emi dri ekile afa lile kurile; yi ma ovu emi dri afa lile kurile eli na, ma nya ku.

²⁴Eli suria patiefi yini dria nga ovu alatararu, inzita fezu Yehova dri.

²⁵Te eli towirisi emi nga pati nde ’diyi ma efi nya ra, yi ma ka ani drile drile emi dri beni: ma Yehova Mungu eminiri’i.

²⁶Emi ma nya afa aluni ma za arini be tualu ku. Emi ma nda ’ba azini ma dra eri ondrizu ku, emi ma ndri andri ku indio

²⁷Emi ma ga emi dribi ti ku, emi ma fa emi tibi ma kala ku indio

²⁸Emi ma osi emi rua imvosi ’ba drapi ’bo ’diyi ma e’yosi aluni ku, emi ma lo vini wura ecetaru emi ruaa aluni ku indi: ma Yehova’i.

²⁹Mi ma eza mi zi eri fezu fuzu awuouru ku, angu kazu fuzu ali o’bazaniru ku, angu kazu gazu tre e’yo onzisi ku.

³⁰Emi ma mba sabato mani ’diyi ma ta, ma inzi pari alatararu maniri: ma Yehova’i.

³¹Emi ma oja emi ojou adrou ma o’duko zipi ’diyi vu ku, kani ’ba ojouru ’diyi vu ku indi; emi ma nda yi, emini emi ezazu yi be ku: ma Yehova’i.

³²Mi ma enga urulesi ’ba ozoforo beri ma drilia, emi ma inzi ’ba eli be treri ma mileti, emi ma ru Mungu emini: ma Yehova’i.

³³Ani’bo ka ovu mi be angu mini ma alia, mi ma ’ye eri onzi ku.

³⁴Ani’bo ovupi emi eseliari ma ovu emi dri ekile kari’ba tile angu mini ma aliarile, mi ma le eri ekile mini mi ngulupi lelerile; a’disiku emi ovu ndra ani’baru angu Misirini ma alia: ma Yehova Mungu eminiri’i.

³⁵Emi ma ’ye e’yo kililiru kuri e’yo liza ma alia aluni ku, kani pati afa ma izu ’bezurisi, kani ratili afa ma nziza o’bizurisi, kani afazu afa o’bizurisi dria ku indio

³⁶Emi ma ovu ratili adadaru ’diyi pi be, afa nziza o’bizu adadaru ’diyi pie, afazu abakaru adadaru ’diyi pie, otekua adadaru ’diyi pie: ma Yehova Mungu eminiri, emi ofupi ejipi angu Misiriasiri’i.

³⁷Emi ma mba azita mani ’diyi ma ta dria, e’yo liza mani ’diyi be, yi ’yezu: ma Yehova’i.