Read lugbara 'Ba Levini 21 Bible Online

'Ba Levini 21 - lugbara bible

'Ba Levini 21

¹Yehova ’yo Musa tia kini, Mi ma ’yo Aroni anzipi kuhaniru ’diyi ma tia, ’yozu kini yi ma alu ma eza i ’ba drapi ’bo ’ba ini ma eselia ’diyi ma e’yosi ku;

²ma eza i kiri lu ori’ba ini ogogori ma e’yosi, i andri pisi, ati pie, mvi pie, zi pie, adri pie,

³amvipi aliriaru ovupi eri vu ogogori pie, a’disiku muni nga agupia ku; eri ma e’yosi eri eco i ezazaru.

⁴Eri ma eza i ku, ka tro eri ambo ori’ba ini ma eselia ti, eri ma eza i alatara kokoru ku.

⁵Yi ma fa yi ma dribi kuzu tuaru ku, ma fa vini yi ma tibi ma kala ku, ma oli vini yi rua aluni ku.

⁶Yi ma ovu alatara Mungu yiniri dri, ma eza Mungu yini ma ru ku; a’disiku yi edeta edele acisi ’diyi ede, adani Mungu yiniri ma enya; e’yo ’disi yi ma ovu alatararu.

⁷Yi ma ’du oku awuoururi, kani alatara kokoruri ku; ma ’du vini oku agupini drole rari ku indi; kuhanini ovule alatararu Mungu ini dririsi.

⁸E’yo ’disi mi ma pe eri ndu alatararu ani, a’disiku eri enya fe Mungu minirinini; eri ma ovu alatararu mi dri; a’disiku ma Yehova mi ’bapi alatararuri, ma alatararu.

⁹Te kuhani ma azi ma zamva ka i eza alisi, eri eza i ati alatara kokoruni; ma eve eri acisi.

¹⁰Kuhani ambo agapi ra adripi ini ma eselia, ’bani odu efizari osule eri ma dria, yini ’bale ndu alaru bongo suza nde ’diyi suzuri, ma ku dribi ini guraru ku, ma osi bongo ini ku indi;

¹¹eri ma fi avu vu aluni ku, ma eza i ku, ka ovu i ati’i kani andri’i ti;

¹²eri ma fu vini pari alatararuriasi ku, ma eza vini Mungu erini ma pari alatararuri ku; a’etisiku ’baza ndu alaru Mungu erini ma odu osule osuriniri ovu eri ma dria ci: ma Yehova’i.

¹³Eri ma je zamva agupi nipi nga kuri okuru.

¹⁴Te awuziou pi, oku agupini drole rari pie, oku alatara kokoruri pie, oku awuoururi pie, ’dini ’diyi ma je ku; te eri ma je zamva suru ini ma eselia agupi nipi nga kuri i ma okuru’i,

¹⁵eri ma eza i ma ori ori’ba ini ’diyi ma eselia ku; a’disiku ma Yehova eri ’bapi alatararuri’i.

¹⁶Yehova ’yo Musa ma tia kini,

¹⁷Mi ’yo Aroni ma tia ’dini, Ori i mini ma eselia a’bianzi yini vusi dria, ’ba ovupi nyebileko be i ruaari aluni ma esi ogogo Mungu ini ma enya fezuni ku.

¹⁸A’disiku ’ba nyebileko be i ruaari aluni ma esi ogogo ku: ’ba mile kokoruri, kani ’ba acozaruri, kani ’ba omvu be akpafuari, kani ’ba afani efuzu eri ma ruaa ereniruri,

¹⁹kani ’ba pa be nyozaruri, kani dri be nyozaruri,

²⁰kani ’ba ngukua ongurua beri, kani ’ba zopi ku atrupi atruri, kani ’ba mile be fularuri, kani ’ba ayiribeni nyaleri, kani ’ba bileofa be ruaari, kani ’ba otufinini drale rari;

²¹kuhani Aroni ma ori’ba ma eselia ’ba nyebileko be i ruaari aluni ma esi ogogo edeta Yehovani ’bani edele acisi ’diyi edezu ku; eri ovu nyebileko be i ruaa, eri ma esi ogogo Mungu ini ma enya fezuni ku.

²²Te nyazaruni eri nga Mungu ini ma enya nya ra, ada afa alatatararu agapi rari pi alatararuri be iri tro,

²³te eri ngani fi bongo jo ale alizuri vualeru ku, kani ma esi vini pari edeta edezuri vu ogogo ku, erini ovule nyebileko be i ma ruaarisi, eri ma eza ani pari alatararu mani ’diyi ku; a’disiku ma Yehova yi ’bapi alatararuri’i.

²⁴Musa ’yo ’dini Aroni pi ma tia, anzipi be, anzi Israelini ’diyi pie dria.