Read lugbara 'Ba Levini 24 Bible Online

'Ba Levini 24 - lugbara bible

'Ba Levini 24

¹Yehova ’yo Musa tia kini,

²Mi fe azita anzi Israelini ’diyi dri, yi ma eji mizeitu odu ’bani dile diri diza ma e’yosi, talani dizu ani ’dani ’dani beni.

³Aroni ma ede eri ’dani engazu ondresi cazu o’bitisi Yehova ma drilia, bongo jo ale alizu e’yo eti nzezaniri ma kala amveleruria, hema ti ecizaniri ma alia; eri ma ovu azitaru emi dri ’dani ’dani a’bianzi emi vusi dria.

⁴Eri ma ede tala ’diyi, talapati edele mele alarurisiri ma dria, Yehova ma drilia ’dani ’dani.

⁵Mi ma ’du anyafura inikiniru, ma ede erisi mikate olizaru mudri drini iri; anyafura afazu abakaru ma alia esele mudri ma azi iri ’diyi ma ovu mikate oliza nde ma alia alu alu.

⁶Mi ma oti yi dri sozaru iri, dri soza alu alu ma alia mikate azia azia, ma o’ba yi mesa alaruri ma dria Yehova ma drilia.

⁷Mi ma ’ba obiese alaru dri soza alu alu ’diyi ma dria, eri ma ovu ani mikate nde be e’yo rile egale egariru, edeta edele acisiri Yehova dri.

⁸O’du sabatoni vusi dria Aroni ma oti eri kilili Yehova drilia ’dani; eri ovu azita ’dani ’daniri anzi Israelini ’diyi dri.

⁹Eri ma ovu Aroni pi ma afaru anzipi be, yi ma nya eri pari alatararuri ma alia, a’disiku eri ovu edeta vele acisi Yehova dri ’diyi ma eselia afa alatararu tu agapi rari’i, azita azile ’dani ’danirisi.

¹⁰Oku azini Israeliniri ma mvi, atini ’ba Misirini, eri fu aci anzi Israelini ’diyi ma eselia; oku Israelini ma mvi nderi ofu yi ’ba Israelini be pari ’bani hema asozuria,

¹¹te oku Israelini ma mvi nderi o’da Runi, otri ra. Yi eji eri Musa vu. Andri erini ma ru Selomiti, Debiri zi, suruti Danini.

¹²Ombe eri ’bazu ani arujoa, yi ma nga ani e’yo efupi Yehova ma tiliari eri raka beni.

¹³Yehova nga di ’yo Musa tia kini,

¹⁴Mi eji ’ba atria otripi nderi pari ’bani hema asozuri ma tia amve; mi fe ’ba dria e’yo erini ’yoleri eripi ’diyi ma ’ba yi dri eri ma dri olu’bua, mi fe ’ba ongulumuru dria ma o’be eri onisi.

¹⁵Mi ’yo anzi Israelini ’diyi ma tia kini, ’Ba azini ka Mungu ini otri, ’ba nderi nga i e’yo onzi ini ’du i’i.

¹⁶’Ba Yehova ma ru o’dapiri, ma fu ’ba nderi ecekokoru; ’ba ongulumuru ’diyi dria ma o’be eri onisi ecekokoru; ’ba ru Yehovani o’dapiri, ka ovu ani’boni, kani kari’bani ti, ma fu eri ra.

¹⁷Ma fu vini ’ba ’ba fupi kairi ecekokoru.

¹⁸’Ba anyapa fupi kairi ma ofe ariotini, idri pi ma fu dri idri be.

¹⁹’Ba azini ka i agyi ruaa ebi ’ba, ma ’ye agu nde ekile emi ’yele i agyi vurile,

²⁰fala pi ma fu dri fala be, milefi pi milefi be, si pi si be, ma fu eri ekile erini ebi ’bale ’ba azini ma ruaarile.

²¹’Ba anyapa fupiri ma ofe ariotini; ’ba ’ba ’dipiri, ma fu eri kai.

²²Emi ma ovu azita be alu ani’bo pi dri kari’ba be trotro; a’disiku ma Yehova Mungu eminiri’i.

²³Te Musa nga ’yo anzi Israelini ’diyi ma tia; yi nga ’ba otripiri ji pari ’bani hema asozuri ma tia amve, nga eri o’be onisi. Anzi Israelini ’diyi ’ye di ekile Yehovani azile Musa tiarile.