Read lugbara 'Ba Levini 25 Bible Online

'Ba Levini 25 - lugbara bible

'Ba Levini 25

¹Yehova nga di ’yo Musa tia oni Sinai ma dria kini,

²Mi ’yo anzi Israelini ’diyi ma tia, mi kini, Emi ka nga fi angu mani fele emi driri ma alia ’boria, nyakuni nga sabato ma ta mba Yehova dri.

³Mi ma ri ori amvu mini ma alia, mi ma ede zabibu pati mini ’diyi ma rua, ma oku efini kapi ’diyi eli azia;

⁴te eli aziriri sabato ava liza inzitaniri nyaku dri, sabato Yehova driri’i; mi ma ri ori amvu minia ku, ma ede Vini zabibu pati ma rua ku.

⁵Afa engapi kapi ceni afa kaza mini ma eseliari mi ma lo ku, azini zabibu efi, zabibu pati mini ruani edele kurini kale ’diyi, mi ma oti vini ku; eri nga ovu eli ava liza inzitaniri nyakuni.

⁶Sabato nyakuni nderi nga nyaka fe emi drini; mi dri, ati’bo miniri pie, ati’bo okuru miniri pie, ati’bo mini azi ngapi oyasiri pie, ani’bo ovupi mi beri pie;

⁷ti mini ’diyi pie, anyapa dria ovupi angu minia ’diyi pie dria; efi kazani dria ma ovu yi ma nyakaru.

⁸Mi ma la mi dri sabato aziri elini, dria eli aziri pale aziri, ’dini ewu sabato aziri eliniri nga ovu mi dri eli kali su drini oromi.

⁹Mba aziri ma o’du mudririsi mi ma fe guka o’duko be ururi ma awu ma ku; o’du e’yo onzi edezurisi emi ma fe guka awu ma ku angu emini ma alia dria,

¹⁰Emi ma ’ba eli kali towiri alatararu, ma azi e’yo trutani angu ma alia dria, ’ba dria ovupi alenia ’diyi dri; eri ma ovu emi dri eli yubileru guka awuniri’i; emi dria alu alu ma mvi emi vile angua, emi dria alu alu ma mvi ’ba emini vu.

¹¹Eli kali towi nderi ma ovu emi dri eli yubile guka awuniriru; eli nderisi emi ma ri ori ku, ma lo afa engapi ceniri vini ku, ma oti zabibu efi zabibu pati mini ruani edele kurini kale ’diyi vini ku.

¹²A’disiku eri eli yubileru guka awuniri’i; eri ma ovu emi dri alatararu; emi nga afa kaza erini amvuari nya ra.

¹³’Ba dria alu alu ma mvi angu yinia eli yubileru guka awuni ’dorisi.

¹⁴Mi ka fe afa ozi mi agyi vu, kani mi ka afa je mi agyi dri, emi ma ’ye ’lokiri emi eselia ku.

¹⁵Mi ma je afa mi agyi dri eli yubileru guka awuniri ma vutia ’diyi vusi, eri ma fe afa ozizu mi dri eli nyakuni ngazu afa kazu ’diyi vusi.

¹⁶Eli ka ovu kakau mi ma fe ajeni ma ere i, te eli ka ovu were mi ma omvi ajeni ra, a’disiku agu nderi eri mi dri afa loza fe ozi kalafe elinini ovulerileni.

¹⁷Emi ma ’ye lokiri emi eselia ku, te emi ma ru Mungu emini; te ma Yehova Mungu eminiri’i.

¹⁸E’yo ’disi emi ma ’ye azita mani ’diyi, ma mba e’yo liza mani,’diyi ma ta, yi ’yezu; emi ma ovu ani angu nderi ma alia e’yo ’yaasi.

¹⁹Nyakuni nga efi ini ka, emi nga nya trazu indi, emi nga ovu alenia, e’yo ’yaasi.

²⁰Emi ka ’yo kini, Eli aziririsi ama nga a’di nya ya? emi ndre, ama ngani ori ri ku, ama ngani vini afa kaza amani lo ku.

²¹Eli aziarisi ma nga asi ndriza mani azi emi dria, eri nga ani afa ka dri fuzu eli na paria.

²²Eli arorisi emi nga ori ri emini de afa kaza oku ’dari nyaria; cazu kpere eli oromiria ’bani afa kaza o’diruri okuria emi nga afa kaza okuri nya ’dani.

²³’Ba ma fe angu ozizu ovuzu ’ba ma afaru ’dani ’dani ku, a’disiku angu nderi mani; te emi ovu ani’ba azini ’ba emupi emu ’diyi ma be.

²⁴Angu emini ma alia dria emi ma a’i ’bani angu nderi onzezu.

²⁵Alio ka mi adrini nde ra, eri ka ozi ani angu ini ma azi, ka’dini ori’ba erini ogogori ma emu, ma onze afa i adrini fele ozile ’bori.

²⁶Te ’ba azini ka ovu ’ba ecopi angu nderi onzepiri be ku, te vutinia eri ka ofu afa e’iru dika, ka afa isu fudri eri onzezu,

²⁷eri ma la eli o’depi oziza ma vutia ’diyi, ma omvi silingi agapi drile tu ’diyi ’ba ndra erini eri ozizu vuniari dri; eri ma nga, di mvi fi angu inia beni.

²⁸Te eri ka eco angu nderi omvizu i ngulupisi ku, afa erini ozile ’bori ma ovu di ’dani ’ba ndra eri jepiri ma dria cazu kpere eli yubileru guka awuniria; eli yubileru nderisi ma omvi eri ra, eri ma nga di mvi fi angu inia dika beni.

²⁹’Ba azini ka jo ovupi aku amboru abi kaliru beri ma aliari fe ozizu, eri eco eri onzezu eli alu pi o’du erini eri ozizuri ma vutia; eri ma ovu okpo be eri onzezu eli alu pi.

³⁰Ka eri onze eli alu nderi ma alia ku, ka’dini jo nde ovupi aku abi kaliru beri ma aliari ma ovu ’dani ’ba eri jepi ndrari ma afaru a’bianzi erini vusi dria; ma omvi eri eli yubilerurisi ku.

³¹Te ma la jo ovupi aku nyiri abi kaliru kokoru ’diyi ma alia ’diyi tualu amvu angu nderia ’diyi be; eco yi onzezu ra, azini ma omvi yi eli yubilerurisi.

³²Te ti, aku ambo ambo ’ba Levini, jo ovupi aku yi vile ’diyi ma alia ’diyi, ’ba Levini eco yi onzezu ewuniria dria,

³³Te ’ba azini ka afa je ’ba Levini dri, ma omvi jo fele ozileri pi, aku eri ma afaruri be, eli yubilerurisi; a’disiku jo ovupi aku ambo ambo ’ba Levini ’diyi ma alia ’diyi ove ’yi ma afaru zu anzi Israelini ’diyi ma eselia.

³⁴Te ma fe amvu angu aku ambo ambo yini ’diyi ma ageiaria ’diyi ozizu ku; a’disiku eri ovu afa yiniru ’dani’dani.

³⁵Alio ka mi adrini nde, ka eco ani i ngulupi ma aza ko i ma drisi mi be ku, mi ma ko azani mi’i; eri ma ovu mi be ekile ani’bole azini ’ba emupi emurile.

³⁶Mi ma a’i erini mari omvizu ereni be, kani orodri be drinia ku, te mi ma ru Mungu mini; mi adri ma ovu mi be ani.

³⁷Mi ma fe mari eri dri mini ereni isuzu drini ’dini ku, mi ma fe vini nyaka mini eri dri mariru orodri isuzu ani drinia ’dini ku indio

³⁸Ma ovu Yehova Mungu emini emi ofupi angu Misiriariasi, angu Kananini fezu emi dri, mani ovuzu Mungu eminiri’i.

³⁹Te alia ka mi adrini nde mi ageia, ka i fe je mi dri, mi ma fe eri ma nga azi ekile ati’bole ku,

⁴⁰te eri ma ovu mi be ekile ati’bo azi ngapi oyasirile, kani ekile ’ba emupi emurile. Eri ma nga azi mi be cazu eli yubileru guka awuniria;

⁴¹eli ndesi ma fu di mi vusi ra, eri’i i anzipi be tualu, ma mvi ’ba ini vu, mvizu angu i ma a’bipiniria indi.

⁴²A’disiku yi ovu ati’ba mani, mani ofule ndra angu Misiriariasi ’diyi; ma fe yi je ati’bale ku.

⁴³Mi ma ovu opiru eri ma drilia okposi ku, te mi ma ru Mungu miniri,

⁴⁴Te ati’ba mini agupiru ’diyi pi okuru ’diyi be, mini ngazu ovuzu yi be ’diyi ma e’yoni ’di: emi eco ati’ba agupiru pi jezaru okuru ’diyi be, suru emi ecepi kuru ’diyi ma eselia ra.

⁴⁵Emi eco vini ani’ba ovupi emi be ’diyi ma anzi ma azi jezaru, ori’ba yini ovupi emi be otile emi vile angua ’diyi ma azi indi; yi eco ovuzu afa eminiru.

⁴⁶Emi nga yi ku emi anzipi emi ma vutia ’diyi dri ra, ovuzu awuruso yiniru o’du dria; emi eco ati’ba emini isuzaru yi eselia ra, te emi ma ovu opiru adripi emini ’ba Israelini ’diyi ma drilia, ’ba aluni ovuzu i agyini ma drilia okposi, ’dini ku.

⁴⁷Ani’bo kani ’ba emupi emu ovupi mi beri ka ofu afa e’iru, re alio ka mi adrini nde eri ma ageia, eri ka i ngulupi fe je ani’bo dri kani ’ba emupi emu ovupi mi beri dri, kani ani’bo nderi ma ori’ba dri,

⁴⁸ka’dini erini i jezu ’bori ma vutia, eco ’ba azinini eri onzezaru ra; adripi erini ma azi alu eco eri onzezaru ra,

⁴⁹kani eri ma atapiru, kani eri ma atapiro ma mvi, kani ’ba dria ori’ba erini ogogori eco eri onzezaru ra; kani eri ka ofu afa e’iru, eri ceo i ma ngulupi onzezaru ra.

⁵⁰Eri ma la eli ma kalafe ’ba i jepiri be, engazu eli erini i fezu jezu eri driria cazu eli yubileruria, azini aje eri onzezuri ma ovu eli nde ’diyi ma kalafe vusi; ma la ewu erini ovuzu eri beri ekile ewu ati’bo azi ngapi oyasirinirile.

⁵¹Eli ka nga ace kakau, eri ma omvi aje eri onzeizuri engazu aje ndra eri jezuri ma leselia eli ’diyi ma kalafe vusi.

⁵²Te eli ecepi caze eli yubileruria ’diyi ka nga ace were, eri ma la e’yo eri be; eri ma omvi aje eri onzezuri eli erini vusi.

⁵³Eri ma ovu eri be ekile ati’bo azi ngapi oyasi eli vusi eli vusirile: eri ma ovu opiru eri ma drilia okposi mi milia ku.

⁵⁴Te ka eri onze geri ’diyi ma azisiku,ma otru yi eli yubilenirisi, eri’i anzipi be.

⁵⁵A’disiku anzi Israelini ’diyi ovu ’ati’baru ma dri; vi ati’ba mani, mani ofule ejile angu Misiriarisi ’diyi: ma Yehova Mungu eminiri’i.