Read lugbara 'Ba Levini 26 Bible Online

'Ba Levini 26 - lugbara bible

'Ba Levini 26

¹Emi ma ’ba emi dri wura inzile, inziri aluni ku, ma edre wura edele aya akapi acisirisiri ku uru vini ku, kani afa inzile inzi pa sopi piriruri ku indi, emi ’ba oni wura opale ruania ciri angu eminia aluni ku, emini avuzu ani va yi drilia; a’disiku ma Yehova Mungu eminiri’i.

²Emi ma mba sabato mani ’diyi ma ta, emi ma inzi pari mani alatararuri: ma Yehova’i.

³Emi ka aci e’yo aziza mani ’diyi ma alia, ka azita mani ’diyi ma ta mba yi ’yezu,

⁴ma nga ozoo fe emini ewu erini vusi, nyakuni nga afa kaza erini ka ani, azini pati amvua ’diyi nga efi ’ya beni.

⁵Anya emini coleri nga ca kpere zabibu tiza ma tia, zabibu tiza emini nga ca ewu emini ori rizuri ma tia; emi nga enya nya emini trazu, ovuzu angu emini ma alia e’yo ’yaasi.

⁶Ma nga e’yo anzuru fe angua, emi nga ola va, te ’ba aluni ngani uri fe emi dri ku; ma nga fe nguru onzi ’diyi ma asi angu ndeasi ra, sei ngani vini ali angu emini ma aliasi ku.

⁷Emi nga ari’ba emini ’diyi ma vuti dro, yi nga ani o’de va emi drilia seisi.

⁸’Ba emini towi yi nga ’ba turu odro ra, azini ’ba emini turu yi nga ’ba alifu mudri ’diyi odro; ari’ba emini yi nga o’de va emi drilia seisi.

⁹Ma nga e’yo emini ega, ma nga fe emi ma ti tu, ezuzu tre, ma nga fe aziza mani azile emi beri ma so pa ci.

¹⁰Emi nga vini nyaka oku emini tani mbale ewu izuri nya’i, emi nga nyaka okuri ofu ewicazu nyaka o’dirusi.

¹¹Ma nga bere mani ’ba emi eselia, asi mani ngani emi ngu onzi ku.

¹²Ma nga aci emi eselia ra, ma nga ovu Mungu emini, emi nga ovu ’ba mani.

¹³Ma Yehova Mungu emini, emi ofupi ejipi angu Misiriariasi, emi ma ovu ani ati’ba yini ku beniri’i; ma onyo kulumbu pati emini alazaru ’diyi ’bo, ma fe emini pa sozu kililiru acizu ’bo.

¹⁴Te emi ka ga bile coko ma vu si, lezu azita ’diyi ’yezu dria ku,

¹⁵emi ka e’yo azizaru mani ’diyi ga si, asi emini ka vini e’yo liza mani ’diyi ngu onzi, emini ani lezu azita mani ’diyi ’yezu dria ku, te emi eza aziza mani,

¹⁶ka’dini ma’i ma nga e’yo ’ye emi vu ’dinile: ma nga e’yo uriuriruri ti pe muzu emi dria, ada, noi pi, rua driza be, ngapi fepi ’ba mileni o’dezu yini oyizu kai kairi’i. Emi nga ori emini ri oye, a’disiku ari’ba emini nga nyani;

¹⁷ma nga ma mile ’ba dri aruzu emi be, emi nga ovu ndezaru ari’ba emini dri; ’ba emi ngupi onzi ’diyi nga opi nya emi drilia, te emi nga apa ceni de ’ba emi dropini yo.

¹⁸Te ka tro e’yo ’diyisi ti, emi ka nga ga ma eriko si ’dani, ma nga emi co imbataru pale aziri dika e’yo onzi eminisi.

¹⁹Ma nga ambo emini ma okpo nyo, ma nga ’bu emini ’ba ovuzu ayale, nyaku emini ovuzu vini molale;

²⁰emi nga emi okpo eza toko, angu emini ngani afa kaza erini ka ku, pati angua ’diyi ngani vini efi yini ’ya ku indio

²¹Te emi ka ri ma dri aru ’dani, ka nga ga ma erika si, ma nga dra maturu eji emi dria, e’yo onzi emini vusi pale aziri.

²²Ma nga nguru asea ’diyi ma ti pe emi eselia, yi nga anzi emini opa emi dria, yi nga anyapa emini akua ’diyi dri ja, nga fe kalafe emini ma emvi ovuzu were; te geri emini nga eca ovuzu ’ba kokoru.

²³Te emi ka emi oja o’diru e’yo ’diyisi ma vu ku, te acita emini ka ri ma dri aru ’dani,

²⁴ka’dini ma nga aci dri aruzu emi be ma’i, azini ma ma ngulupini nga emi co e’yo onzi emini vusi paleko aziri.

²⁵Ma nga vini sei ngapi aziza nderi ma arioti ofepiri eji emi dria; te emi nga emi oku tualu aku emini ambo ambo ’diyi ma alia, ma nga dra muaru ma ti pe emi eselia, yi nga emi fe juru emini ma dria.

²⁶Ma ka nga anya ovupi kali emi atipiriruri onyo, oku mudri ’diyi nga mikate emini ozo atiliku alu ma alia, yi nga vini mikate o’bi emi dri ratilisi dika; emi nga nya ra ’bo, te ti emi ngani tra ani ku.

²⁷Te ka tro e’yo ’diyisi dria ti, emi ka ga ma eriko si, te acita emini ka ri ma dri aru ’dani,

²⁸ka’dini ma nga aci dri aruzu emi be adrasi ma’i, te ma ma ngulupini nga emi co e’yo onzi emini vusi paleko aziri.

²⁹Emi nga agianzi emini ma za nya ra, emi nga vini emi ezopi ma za nya indio

³⁰Ma nga vini pari uruleru emini ’diyi eza, ma nga wura emini etuni ’diyi oli va, ma nga emi ma avu o’be wura inzile emini ’diyi ma avu ma dria; orindi mani nga emi ngu onzi tu.

³¹Ma nga vini aku ambo ambo emini ’diyi ’ba andruru, ma nga pari alatararu emini ’diyi ’ba ovuzu ’bakokoru, ma ngani aji arikariru emini ’diyi ma aji se ku.

³²Ma nga angu emini eza teketeke ovuzu ’ba kokoru, ’dini ari’ba emini ovupi alenia ’diyi nga osu e’yo nderisi osu osu.

³³Ma nga emi ere suru ma eselia, ma nga vini sei mani enze emi vuti drozu; angu eminiri nga ovu ezazaru ’ba kokoru, aku ambo ambo emini ’diyi nga ovu andruru.

³⁴Ewu nde ’darisi anguni nga ovu ayikosi sabato erini ’diyisi, ewu erini ovuzu ’ba kokoru emini ovuzu ari’ba emini ma anguarisi dria; anguni nga di ava li, ovuzu ayikosi sabato erini ’diyisi.

³⁵Ewu erini ovuzu ’ba kokorurisi dria eri nga ava li ’dani, ava liza nde erini ndra nga lile ku sabato eminisi emini ovuria nga angu nde ma aliari’i.

³⁶Te ’ba acepi emi eselia jolokoru ’diyi ma e’yoni ’di, ma nga fe asi yini ma ovu okpo kokoru angu ndu ndu yi ma ari’bani ’diyi ma alia; ebiko olini ’duleri ma awuni nga yi dro ra, yi nga apa ani ekile ’bani apale seisirile, yi nga vini o’de va de ’ba yi ma vuti dropini aluni yo.

³⁷Yi nga o’de adrozaru yi agyi dria yi agyi dria, ekile sei ma driliarile, de ’ba yi vuti dropini yo; emi ngani ovu okpo be pa sozu ari’ba emini ma drilia aluni ku.

³⁸Emi nga dri ja suru ma eselia, azini ari’ba emini ma anguni nga emi oki ra.

³⁹’Ba emi eselia acepi jolokoru ’diyi nga oyi kai kai ari’ba emini ma angua, e’yo onzi yinisi; yi nga vini oyi kai kai yi a’bipi ma e’yo onzisi yi be tualu.

⁴⁰Te yi nga e’yo onzi yini e’da, ’yi a’bipini be, ezata yini ezale ma vuri e’dazu, vini kini yini acile ma dri aruzu ’borisi,

⁴¹ma vini alu aci yi ma dri aruzu ma’i, yi ejizu ari’ba yini ma angua; te di asi yini lile kui ’diyi ka yi do e’yere e’ya onzi yini ma panga a’izu ra,

⁴²ka’dini ma nga aziza mani azile ndra Yakobo beri pi ma e’yo ega, aziza mani Isaka beri pie, ma nga vini aziza mani Iburahimu beri ma e’yo ega; ma nga vini angu nderi ma e’yo ega indio

⁴³Te yi nga angu nderi ku ra, angu nderi nga ovu ayikosi sabato ini ’diyi ma e’yosi, erini de ovuria andruru ’ba ’diyi kokoru; te yi nga e’yo onzi ’yini ma panga a’i ra; a’disiku yini e’yo liza mani ’diyi gale sirisi, yi ma orindini e’yo aziza mani ’diyi ngule onzirisi.

⁴⁴Te ka tro e’yo ’diyi ’be dria ti, ma ngani yi ga yini ovuria rari’ba yini ma angua ku, ma ngani yi ngu onzi mani ani yi dri jazu teketeke, mani ani aziza mani azile ndra yi beri nyozu, ’dini ku; a’disiku ma Yehova Mungu yiniri’i;

⁴⁵te yi ma e’yosi ma nga aziza azile ndra yi a’bipi beri ma e’yo ega, a’bipi nde mani ofule ejile angu Misiriariasi suru ndu ndu ma milia ’diyi, mani ovuzu ani Mungu yiniru: ma Yehova’i.

⁴⁶’Diyi e’yo aziza piyi, e’yo liza pie, azita pie, Yehovani ndra azile i ma eselia anzi Israelini ’diyi be oni Sinaiari ma dria, fele Musa ma driarisi ’diyi.