Read lugbara 'Ba Levini 3 Bible Online

'Ba Levini 3 - lugbara bible

'Ba Levini 3

¹Afa ’bani fele edetaruri ka ovu edeta asi anzuruniri, ka ovu anyapa ’wara ma eselia, kani agoni kani aronini, ma fe eri nyebile kokoru Yehova ma drilia.

²Eri ma ti i ma dri edeta ini ma dri olu’bua, ma li eri hema ti ecizaniri ma tilia; te Aroni anzipi kuhaniru ’diyi ma oya arini pari edeta edezuri ma dria ageiniasi kuru.

³Edeta asi anzuruniri ma eseliasi, ma fe oso raururi pi oso dria otile fi ma ruaari be, vezu edetaru Yehova dri,

⁴azini orofi iri oso ruania gualeruri pi, aridria’bure ogu ruaari be, ma nze yi orofi be tualu.

⁵Aroni anzipi ’diyi ma ve eri pari edeta edezuria, edeta vezaru eja aciari ma driari ma dria; eri ovu edeta vele acisi, aji arikariru Yehova vuri’i.

⁶Afa erini fele edeta asi anzuruni Yehova driri ka ovu anyapa nyiri ma eselia, kani agoni kani aronini, ma fe nyebile kokoruri’i.

⁷Eri ka kabilomva fe edeta iniriru, ma fe eri Yehova ma drilia;

⁸eri ma ti i ma dri edeta ini ma dria, ma li eri hema ti ecizaniri ma drilia; te Aroni anzipi ’diyi ma oya arini pari edeta edezuri ma dria ageiniasi kuruni,

⁹Edeta asi anzuruniri ma eseliasi, ma fe osoni edeta vezaruriru Yehova dri, sobi osoru lile pi kote vu ogogori pie, oso raururi pie, oso dria otile fi ma ruaari pie,

¹⁰orofi iri ’diyi pie, oso ruania gualeruri pie, aridria’bure ogu ruaari pie, ma nze yi orofi be tualu.

¹¹Kuhani ma ve eri pari edeta edezuri ma dria; eri nyaka fele edetaru vele acisi Yehova driri’i.

¹²Edeta eriniri ka ovu ndrini, ma fe eri edetaru Yehova ma drilia,

¹³ma ti i ma dri dri olu’bua, ma li eri hema ti ecizaniri ma drilia; te Aroni anzipi ’diyi ma oya arini pari edeta edezuri ma dria ageiniasi kuru.

¹⁴Eri ma ’du eselenia oso raururi pi fezu edeta veza erini Yehova dririru, oso dria otile fi ma ruaari pie,

¹⁵orofi iri ’diyi pie, oso mania gualeruri pie, aridria’bure ogu ruaari pie, ma nze yi orofi be tualu.

¹⁶Kuhani ma ve yi pari edeta edezuri ma dria; eri nyaka fele edetaru vele acisi aji be arikariru Yehova driri’i. Osoni dria Yehovani,

¹⁷Eri nga ovu azita ’dani ’daniriru a’bianzi emini vusi, pari emini ovuzu ’diyi ma alia dria, emi ma nya oso pi ari be ku.