Read lugbara 'Ba Levini 7 Bible Online

'Ba Levini 7 - lugbara bible

'Ba Levini 7

¹Edeta ezata edezuri ma azita ’di. Eri alatararu agapi turi;

²ma li afa edetaru ezata edezuri pari yini adrizu edeta veza lizuria; eri ma oya arini pari edeta edezuri ma dria ageiniasi kuru.

³Eri ma fe osoni dria edetaru, sobi osoruri pi, oso raururi pie,

⁴orofi iri ’diyi pi oso ruania gualeruri pie, aridria’bure ogu ruaari pie, ma nze orofi be tualu;

⁵kuhani ma eve yi pari edeta edezuri ma dria, edeta edele acisi Yehova dririru; eri ovu edeta ezata edezuri’i.

⁶Kuhani agupiru ’diyi dria eco eri nyazaruni; ma nya eri pari alatararua; eri alatararu agapi turi.

⁷Edeta ezata edezuri ovu ekile edeta e’yo onzi edezurile, azitaniri alu; ma ovu kuhani e’yo onzi edepi edeta ndesiri ma afa.

⁸Kuhani ’ba azini ma edeta vezaruri edepiri ma ’du enyiriko edeta nde vezaru erini edele ’borini i ma ngulupi ma afaru.

⁹Edeta edele anyafurasi ozole furu ma alia, kani osile ajikosi, kani saani dria ’diyi dria alu alu ma ovu kuhani eri edepiri ma afa.

¹⁰Azini edeta edele anyafurasi osale odusi kani a’wiru ’diyi dria ma ovu Aroni anzipi dri dria, ’ba alu alu dri dria trotro.

¹¹Edeta asi anzuruni ’bani ngale edele Yehova dri ’diyi ma azita eri ’di.

¹²Eri ka eri ede awa’diforu, ka’dini eri ma fe edeta awa’diforu nderi be tualu mikate akufi kokoru osale odusi olizaru ’diyi pi, mikate akufi kokoru pekepeke odu trile drinia ci ’diyi pie, mikate olizaru osale odusi edele anyafura inikini oduni ofizu alenia tre trerisi ’diyi pie dria.

¹³Erini edeta erini asi anzu-runi awa’diforu ’diyi feria, eri ma fe vini mikate akufi be olizaru ’diyi edeta erini be.

¹⁴Eselenia eri ma ’du mikate alu edeta vusi alu alu, fezu edeta ’dule ururiru Yehova dri; eri ma ovu kuhani ari edeta asi anzuruni ’diyini oyapiri ma afa.

¹⁵Ma nya edeta erini asi anzuruni awa’diforu ’diyi ma za o’du erini eri edezurisi; ma ku jolokoni cazu o’bitisi aluni ku.

¹⁶Te edeta erini feleri ka ovu oyo sozani, kani afa ’bani fele avasiri’i, ma nya eri o’du erini eri edezurisi, ma nya vini jolokoni acepiri dru ra,

¹⁷te ma eve edeta nderi ma za acepi jolokoru capi o’du nasiri acisi.

¹⁸Ka edeta erini asi anzuruni ’diyi ma za ma joloko nya o’du narisi ra, ka’dini eri ngani ovu a’izaru ku, ngani vini ’ba edeta fepiri ma e’yo la ekile eri fe ra ’dinile ku; eri nga ovu afa ngule onziriru, te ’ba eri nyapiri nga e’yo onzi ini ’du i’i.

¹⁹Ma nya za afa alatara kokoruri ma rua elopiri ku; ma eve eri acisi. ’Ba dria ovupi alaru ’diyi eco yini za azini ’diyi nyazaru ra,

²⁰te ’ba edeta asi anzuruni ovupi Yehovani ’diyi ma za nyapi de eri alatara kokoruri, yi nga eri ma dri ja o’dipi ma eseliasi ra.

²¹Te vini indi, ’ba ngoni ngori ka afa ngoni alatara kokoruri elo, kani ondi ’bani, kani anyapa alatara kokori, kani afa ngule onzi alatara kokoruri ma azi, ’ba nderi ka edeta asi anzuruni ovupi Yehovani ’diyi ma za nya, ma ja ’ba nderi ma dri o’dipi ma eseliasi ra.

²²Yehova nga di ’yo Musa tia kini,

²³Mi ’yo Israeli anziyi tia kini, Emi ma nya oso ku, kani tini, kani kabiloni, kani ndrini aluni ku.

²⁴Anyapa drapi drasiri ma oso, kani nguruni eileniri ma oso, emi eco ani azi azini ’yezaru ra, te emi ma nya eri aluni ku.

²⁵A’disiku ’ba dria alu alu anyapa ’bani ani edeta edezu Yehova dri acisiri ma oso nyapiri, yi nga ’ba eri nyapiri ma dri ja o’dipi ma eseliasi ra.

²⁶Azini vini emi ma nya ari aluni ku jo emini ma alia dria, ka aria ma arini kani anyapa ma arini ti.

²⁷’Ba ari nyapiri, ka ’ba ngoni ngori ti,ma ja ’ba nderi ma dri o’dipi ma eseliasi ra.

²⁸Yehova nga di ’yo Musa tia kini,

²⁹Mi ’yo Israeli anziyi ma tia kini, ’Ba edeta ini asi anzuruni edepi Yehova driri ma eji afa feza ini Yehova dri, engazu edeta ini asi anzuruni ’diyi ma eselia,

³⁰eri ma eli edeta edele acisi ’diyi Yehova dri i ma ngulupi ma drisi; eri ma eji osoni pi agati be, ’dini agati nderi ma ovu oyazaru edeta oyale oyariru Yehova dri.

³¹Kuhani ma eve oso nderi pari edeta edezuri ma dria, te agati ma ovu Aroni pi dri anzipi be.

³²Engazu edeta emini asi anzuruni ’diyi ma eselia, emi ma fe o’du dri ndiari kuhani dri edeta ’dule ururiru;

³³Aroni anzipi ma eselia ’ba edeta asi anzuruni ’diyi ma ari fepi oso beri, o’du dri ndiari ma ovu afa eriniru.

³⁴A’disiku ma ’du agati oyale oyari pi anzi Israelini vu ’bo, o’du ’dule ururi be, edeta yini asi anzuruni ’diyi ma eselia, fezu kuhani Aroni pi dri anzipi be, azile afa yiniru ’dani ’dani anzi Israelini fele yi driri’i.

³⁵Engazu edeta edele acisi Yehova dri ’diyi ma eselia, ’diri ovu afa azile Aronini, odu osule driniari ma e’yosi, azini vini anzipi ma afaru odu osule yi ma driari ma e’yosi, erini yi e’dazu azi ngazu i Yehova dri kuhanirurisi;

³⁶Yehova azi anzi Israelini dri afa ’diri fezu yi dri, o’du erini odu osuzu yi driarisi; eri ovu afa azile yiniru ’dani ’dani a’bianzi yini vusiri’i.

³⁷’Di azita edeta vezaruri pini, edeta edele anyafurasiri pie, edeta e’yo onzi edezuri pie, edeta ezata edezuri pie, ’baza ndu alatararuri pie, edeta asi anzuruni ’diyi pieri’i,

³⁸azita nde Yehova azi ndra Musa dri oni Sinai ma dria, o’du erini anzi Israelini azizu edeta yini fezu Yehova dri angu rokoru Sinaiariarisi.