Read lugbara 'Ba Levini 9 Bible Online

'Ba Levini 9 - lugbara bible

'Ba Levini 9

¹Eri nga eca ’dini, o’du arorisi Musa nga Aroni pi omve anzipi pie, ’ba ’wara Israelini ’diyi be;

²eri ’yo Aroni tia kini, Mi ’du kojamva agoaru edeta e’yo onzi edezuriru, azini kabiloago edeta vezariru, yi ma ovu nyebile kokoru, mi fe yi edetaru Yehova ma drilia.

³Mi ma ’yo anzi Israelini ’diyi ma tia kini, Emi ’du ndriago edeta e’yo onzi edezuriru; emi o’du vini kojamva pi kabilomva be, yi iri tro ovupi eli be alu alu ’diyi, nyebile kokoru, edeta vezariru;

⁴emi o’du vini monio pi kabiloago be edeta asi anzuruniru, edezu Yehova ma drilia; emi ’du vini edeta edele anyafurasi osale odusiri; a’disiku andru Yehovani nga i e’da emi milia ra.

⁵Yi nga di ani afa Musani azile ’diyi eji hema ti ecizaniri ma drilia; te ’ba ongulumuru ’diyi dria nga esi ogogo, pa sozu Yehova ma drilia.

⁶Musa nga di ’yo kini, E’yo Yehovani ndra azile emi ma ’yeri eri ’di; diza Yehovanini nga i e’da emi ma milia ra.

⁷Musa nga di ’yo Aroni ma tia kini, Mi esi pari edeta edezuri vu ogogo, mi ede edeta mini e’yo onzi edezuri pi, edeta mini vezaruri be, e’yo onzi mi ngulupi pini edezu, ’ba nde ’diyiniri be; mi fe vini edeta ’ba nde ’diyini, mi ede ani e’yo onzi yini; ekile Yehovani azilerile.

⁸’Dini Aroni nga di esi pari edeta edezuri vu ogogo, nga kojamva edeta e’yo onzi edezurini li, ovupi eri ngulupi ma e’yosiri’i.

⁹Aroni anzipi nga arini fe eri dri, eri nga ani i ma drileju su ari nde ma alia, nga eri o’ba pari edeta edezuri ma o’yu ma dria, nga di ari nderi osu pari edeta ’edezuri ma ndua;

¹⁰te eri eve edeta e’yo onzi edezuri ma oso pi pari edeta edezuri ma dria, orofi pie, aridria’bure ogu ruaari pie, ekile Yehovani azile Musa tiarile.

¹¹Eri eve zani pi acisi enyiriko be pari ’bani hema asozuri ma tia amve.

¹²Eri nga edeta vezaruri li;Aroni anzipi nga di arini fe, eri nga eri oya pari edeta edezuri ma dria i ageiniasi kuru.

¹³Yi nga edeta vezaruri fe eri dri, yini eri opile eselesi eselesi ’borile, drini be; eri nga yi eve pari edeta edezuri ma dria.

¹⁴Eri nga fini pi oji yisi pani pie, nga yi eve acisi edeta veza pari edeta edezuri ma driari ma dria.

¹⁵Vutinia eri fe edeta ’ba ongulumuruni, eri nga ndri edeta e’yo onzi edezu ovupi ’ba nde ’diyi driri bi, nga eri fu, nga eri fe edetaru e’yo i onzi ma e’yosi, ekile okorile.

¹⁶Eri nga di edeta vezaruri fe, nga eri ede ’ekile azitani ’yolerile.

¹⁷Eri nga vini edeta edele anyafurasiri fe, nga ndi i driega aluria tre, nga eri eve pari edeta edezuri ma dria, edeta vezaru o’bitisiri ma aziru.

¹⁸Eri oli vini monio pi kabiloago be, edeta asi anzuruni ovupi ’ba nde, ’diyi driri; Aroni anzipi nga di arini fe, eri nga eri oya pari edeta edezuri ma dria ageiniasi kuru,

¹⁹fe vini monio pi ma oso kabiloagoni be, sobi osoruri pi, oso raururi pie, orofi pie, aridria’bure ogu ruaari pie;

²⁰yi nga osoni ’ba agati ma dria, nga di osoni eve pari edeta edezuri ma dria,

²¹te Aroni nga di agati pi oya o’du ,dri ndiari be edeta oyale oyariru Yehova ma drilia; ekile Musani azilerile.

²²Aroni nga di i ma dri eju ’ba ongulumuru ’diyi vu, nga asi ndriza fe yi dri; eri nga esi va erini edeta e’yo onzi edezuri pi fezu ’boria, edeta vezaruri pie, edeta asi anzuruni ’diyi i be.

²³Musa pi nga fi hema ti ecizaniri ma alia Aroni be; yi nga efu ra, nga asi ndriza fe ’ba ongulumuru ’diyi dri, te diza Yehovani nga i e’da ’ba ongulumuru ma milia dria.

²⁴Te aci nga efu Yehova ma driliasi, nga edeta vezaruri pi ve oso be pari edeta edezuri ma dria; ’ba dria ka eri ndre ra, yi otre uru, nga yi eco o’bukuru va.