Read lugbara Yeremia 1 Bible Online

Yeremia 1 - lugbara bible

Yeremia 1

¹E’yo ’yoza Hilikia mvi, Yeremia, ’ba edeta edepi Anatoti angu Benyamininiari ma alia ’diyi ma, azi aluni ’yole ’diyi.

²E’yo Yehovani eca eri vu ewu Yosia Amo li mvi opi Yudaarinisi, eli mudri drini na emu opi nyazurisi.

³Eri eca indi ewu Yehoyakimu Yosia mvi opi Yudaarinisi, cazu kpere eli mudri drini alu Zedekia Yosia mvi opi Yudaarinia, kpere mba towi yini ’ba Yerusalemuni ’duzu ati’baruria.

⁴Isu e’yo Yehovani eca ma vu kini,

⁵De nga ma edeni mi opojo ma alia ku, ma ni ndra mi ra, azini de nga mi efuni aliasi ku, ma ’ba mi alatararu; ma pe mi ovuzu nabiru suru ndu ndu dri ’bo.

⁶Te ma nga ’yo ra, Aka, Opi Yehova la! Mi ndre, ma econi e’yo ’yozaru ku, a’disiku mani ovule mvaanirisi.

⁷Te Yehova ’yo ma tia, Mi ma ’yo ku, Ma mvaani; a’disiku ma ka mi ti pe ’ba ngori vu ti, mi nga mu ra, azini ma ka e’yo ngori azi mi tia ti, mi nga e’yo nde olu ra.

⁸Mi ma ovu urisi yi ma e’yosi ku, a’disiku ma ovu mi be mi pazu, Yehova ’yoni,

⁹Etu ’dasi Yehova nga i ma dri eju, nga ma ti do ani; azini Yehova nga, ’yo ma tia, Mi ndre, ma ’ba e’yo ’yoza mani mi tia ’bo.

¹⁰Mi ne, ma ’ba mi andru suru ndu ndu ma drilia opi nyaza be,onzezu azini onyozu, dri jazu azini o’bezu va, sizu uru azini afa sazu.

¹¹E’yo Yehovani nga eca ma vu dika kini, Yeremia, mi a’duni ndre ya? Ma nga di ’yo ra, Ma eto pati ma arakala ndre,

¹²Yehova nga di ’yo ma tia, Mi ndre ’yeke, A’disiku ma e’yo mani eto, eri ’yezu ani.

¹³E’yo Yehovani nga eca ma vu pale iririsi, ’yozu, Mi a’di ndre ya? Te ma ’yo ra, Ma mire otaka amboru afa be alenia ovapi ovari, te ti erini ’ovu andraleru.

¹⁴Yehova nga di ’yo ma tia, Engazu woke andraleru cia e’yo ewaruni nga efu ’ba dria adripi angu ’doria ’diyi vu ra.

¹⁵A’disiku mi ne, ma nga suru dria opi nyaza angu andralerua ’diyi ma alia ’diyi omve, Yehova ’yoni; yi nga emu ra, te yi dria alu alu nga oguna yini opiniri ’ba pari ’bani fizu kalitile Yerusalemuniaria, azini abi kaliru eri ma ageia kururi vuleru, azini aku Yudaa ’diyi ma ageia dria.

¹⁶Te ma nga e’yo liza mani yi ma dria e’yo onzi yini dria ma e’yosi ’diyi ece, yini ma kule rarisi, yini obiese vele Mungu andini dririsi, yini azi yi ma dri pamvuni inzilerisi.

¹⁷E’yo ’disi mi’i, mia ’di mi opilia; mi enga, mi olu yi tia e’yo dria mani azile mi tia ’diyi. Mi asi ma oti yi ma e’yosi ku, ma kazu fezu mi asini otizu yi ma milia ku.

¹⁸Te, mi ne, ma ’ba mi andru ovuzu aku okporurini ’bo, afa ayaru pa sopi piririru, abi molaru, mini dri aruzu angu dria be, opi Yudaa ’diyi pi be, opianzi erini pie, ’ba erini edeta edepi ’diyi pie, ’ba ovupi angu nde ma alia ’diyi pie.

¹⁹Yi nga omba ’ba mi be; te yi ngani mi aga ku, a’disiku ma ovu mi be mi arizu, Yehova ’yoni.