Read lugbara Yeremia 10 Bible Online

Yeremia 10 - lugbara bible

Yeremia 10

¹Emi eri e’yo Yehovani ’yole emi tiari, emi ori’ba Israelini la.

²Yehova ’yo ’dini: Emi ma oni geri ’ba jururu ’diyini ku, emi asi ma oti eceta efupi ’bua ’diyisi ku a’disiku ’ba jururu ’diyi ma asini oti oti eceta nde ’diyisi,

³a’disiku e’yo ’ba jururu ’diyini adrile ’yele ’diyi yi toko. Te yi adri pati oce talaari ga; eri onduouni ’yele drisi azini ogarasiri ma dripamvu’i.

⁴’Ba yi a’bu eri ma rua dahabu pisi mele be; yi eci eri musumari odile opaasi ’diyisi, eri ma oya i ku beni.

⁵’Ba opa yi, yi si ekile pati itunile, te yi ’yoni e’yo ku; ’ba yi ’du yi ’du ’du yini ecole acile kurisi. Emi ma ru yi ku, yi econi ’yezaru onzi ku, eri ovuni yi alia e’yo onyiru ’yezu ku indi.

⁶Te ’ba azini i sipi mileni yo fo, Yehova la Mi ovu amboru, ru miniri ovu amboru okpo be.

⁷’Ba ngapi mi rupi kuri a’di’i ya, mi Opi amboru suruniri la? A’disiku e’yo ’dirini mi sile sirisi; te ’ba dria onduaru ’ba suruni ma eselia ’diyi ti, kani opi nyaza yini ma alia dria ti, ’ba aluni mileni yo.

⁸Te yi ovu dria anyapale azazaru; imbata wura siribaruniri ’ovu pati duluti tokoni!

⁹Yi eji dahabu ’bani dile di aya walarileri engazu Tarisisia, azini mele engazu Ufazia. Yi dripamvu onduou pini ’ba mele dipi okaari beri’i; bongo yini wura blururi pisi wura okalakokalaruri beri; yi dria ovu dripamvu onduouni.

¹⁰Te Yehova eri Mungu adaruri’i; eri Mungu idriruri’i, Opi ’dani ’daniri’i. Te adra erinisi nyakuni ya ya, suru econi pa sozaru adra erini ma milia ku.

¹¹Emi ma ’yo yi tia kini: Mungu ’bu pi ’bapi nyaku be ku ’diyi nga dri ja nyakuarisi, ’bu etiasi indi.

¹²Eri’i, eri ’ba ndra nyaku okpo inisi, eri fe wudrikuruni pa sozu ondua inisi, e’yo vaza inisi eri aja ’bu walaru ra,

¹³Erini i o’duko ofuria, yi osa i awu be ’bua, azini eri fe apurusani enga uru engazu nyaku ma kalatini asizu’diyia. Eri ede ovi ozoo dri, eri oli ofu engazu pari ini afa ta mbazu ’diyia.

¹⁴’Ba dria alu alu eca anyapale e’yo vaza kokoru; onduou mele dipi okaa ’diyi alu alu dria isu drinza wura toko yini edele ayasi ’diyisi; a’disiku wura toko yini edele aya rapi acisiri ovu e’yo inzoru, ava yi ma alia yo.

¹⁵Yi afa tokoni, afa ’ba icizuri’i; o’du yi cozurisi yi nga dri la ra.

¹⁶Te lonyi Yakoboniri ovuni afa ’diyile ku, a’disiku eri ’ba afa dria ’bapiri’I, te Israeli ovu suru eri ma yilaniri’i; ru erini Yehova asikari ongulumuruniri’i. Angu Yudani ’bazu andruru

¹⁷Mi oku afa oziza mini engazu angu ma aliarisi, mi ovupi pari acele ombasi kururi ma aliari!

¹⁸A’disiku Yehova ’yo ’dini, kini: Mi ndre, o’du ndesi ma nga ’ba ovupi angu nde ma alia ’diyi o’be amve, ma nga yi dri candi fe, ’dini eri ma etumu yi ani.

¹⁹Eyawa ma yet ma rua su su ’doni ya! Bile mani ovu onzi tu. Te ma ’yo ra, ’Di candi mani ada, ma di ma asi imba ani ’dani.

²⁰Hema mani eza i ’bo, baka mani dria oce yi ’bo; anzi mani ku ma ’bo, yi yo; ’ba hema mani ajapi dikani yo, ’ba bongo mani o’ipi uruni yo.

²¹A’disiku ’ba kabilo ocepi ’diyi oja yi anyapale ’bo, yi zini e’yo Yehova ria ku; e’yo ’disi yi isuni drileba ku, kabilo o’biru yini ere yi dria ’bo.

²²O’duko e’yo kuzani! Mi ndre, eri emu ra!- iyikiyii amboru engazu angu andraleruria aku amboru Yudaa ’diyi ezazu andruru, yi ’bazu pari obalokoni ovuzuriru.

²³Yehova la, ma ni ra geri ’bani ovuni i ngulupi ma alia ku, eri ovuni ’ba acipi aciri ma alia i ma acita otizuni ku.

²⁴Yehova la, mi co ma imbazu, te aga tu ku; adrasi ku, mi kazu ma inizu ku.

²⁵Mi ma osu adra mini suru mi nipi ku ’diyi ma dria, ori’ba mi ru omvepi ku ’diyi ma dria indi; yini Yakobo ma dri jale ’borisi; ada, yi ja eri dri ’bo, yi ini eri teketeke, yi eza pari erini ovuzuri andruru ’bo.