Read lugbara Yeremia 12 Bible Online

Yeremia 12 - lugbara bible

Yeremia 12

¹Yehova la, mani agata garia isu mi ovu mini kilili; te ti, ma le nga e’yo nze mi be. ’Ba azi onzi ’yepi ’diyi ma geri ovu drilebaru a’disi ya? ’Ba lokiri ’yepi tu ’diyi dria ovu ’yaa a’disi ya?

²Mi sa yi ra, ada yi ma ola fi ’bo; yi zo ra, ada yi ’ya efi ra; yi ma tiani, mi ogogo, te yi ma asiruri beni, mi ziri.

³Te mi ni ma ra, Yehova la; mi ndre ma, mi ma asi O’bi’i kani eri ovu mi vu ngoniru ya. Mi ofu yi amve eki1e kabilo ’bani ngale olilerile, azini mi oti yi o’du ’bani ngazu yi olizurisi.

⁴Anguni nga owu azini ase angu dria ma aliari nga ’wi kpere ngopi ya? Ezata ’ba ovupi angu nde ma alia ’diyinirisi anyapa pi ja dri aria pie ’bo, yini ’yole, Eri ngani asiza amani ndre ku-risi.

⁵Mi ka nzu ’ba nzupi pasi ’diyi be, yi ka fe mi ande ani ra, mi eco nzuzu akanya be ngoni ngoni ya? Azini mi ka tro ovu e’yere angu asi anzuruniri ma alia ti, te mi nga a’di ’ye pari Yoridanini tizuria ya?

⁶Ka tro mi adripi, azini ’ba engapi mi ati vile joa ’diyi ti, yi’i yi ’ye mi vu lokirisi; yi’i yi otre mi vutia o’duko urusi; mi ma a’i yi ku, yi ka tro e’yo onyiru ’yo mi vu ti.

⁷Ma ku jo mani ’bo, ma ’be awuruso mani ’bo; ma fe ’ba ma asini lele turi ari’ba erini ma dria ’bo.

⁸Awuruso mani oja i ma dri ekile kami oce aliarile, eri owu ma dri aruzu; e’yo ’disi ma ngu eri onzi.

⁹Awuruso mani ovu ma dri ekile aria za nyapi wura be korekorerile ya? Aria za nyapi ’diyi oku yi eri ma ageia kurukuru dri aruzu eri be ra ya? Mi mu, mi oku anyapa asea ’diyi dria; mi eji yi, ’dini yi ma nya ra.

¹⁰’Ba ’ba ocepi ’diyi karakarau eza amvu mani zabibuni ’bo, yi oro angu mani va pasi, yi ’ba angu onyiru mani ovuzu roko piriniriru ’bo.

¹¹Yi fe eri ovuzu andruru; eri wu ma vu erini ovuria androru ’dinirisi. Angu dria ovu di andruru, ’ba alunini e’yoni ’bale i asia kurisi.

¹²’Ba afa opapi ’diyi eca pari uru dri be pirini roko driaria ’diyi ma dria dria; sei Yehovanirini ’ba nyale engazu angu ma kalati aluria kpere angu ma kalati aziniriarisi; ’ba rua ari be asi anzuru isupini aluni yo.

¹³Rizuruni, ri anyani, te lozaruni lo oci’i, yi ecandi yi ma ngulupi ti, te yi isuni orodri ku. Yi nga ovu drinzasi afa kaza yini ma e’yosi adra okporu Yehovanirisi.

¹⁴Yehova ’yo ’dini ’ba onzi ma ma ejelea dria, awuruso mani fele suru mani Israeli driri elopi ’diyi ma dri aruzu: Mi ndre, ma nga yi onze angu yiniarisi, ma nga ori’ba Yudani onze yi ma eseliasi indi.

¹⁵Te eri inga eca ’dini, ma ka yi onze ’bo, ma inga emvi yiki ’bazu yi vu, ma nga yi cii dika, ’ba dria alu alu awita yiniri vu, ’ba dria alu alu angu yini vu.

¹⁶Te eri nga eca ’dini, yi ka suru mani ma geri oni asi driasi, oyo sozu ma rusi kini, Ekile Yehovani ovule idrirurile, ’dini, ekile ndra yini suru mani imbale oyo sozu Baali ma rusirile, ka’dini yi nga ovu edrezaru suru mani ma eselia,

¹⁷Te yi ka ga eriko si, nzezuni ma nga suru nde nze ra, drini jazu ra, Yehova ’yoni.