Read lugbara Yeremia 15 Bible Online

Yeremia 15 - lugbara bible

Yeremia 15

¹Vutinia Yehova ’yo ma tia, Musa pi Samueli be ka tro pa so ma milia ti, ma econi ma asi ’bazaru suru ’dori vu onyiru ku. Ma o’be yi ma miliasi amve, emi ku yi ma fu ’dale!

²Te eri nga eca ’dini, yi ka ’yo mi tia, Ama fu muzu ngoa ya? mi nga di olu yi ma tia, Yehova ’yo ’dini: ’Ba opele drani ’diyi ma mu draa, seini ’diyi ma mu sei sia; opele likini ’diyi ma mu liki vu, opele ati’baru ’diyi ma mu ovu ati’baru.

³Te ma nga suruti ope su yi dria, Yehova ’yo ra: sei ’ba olizu, oce ’ba ocizu, aria ’bua ’diyi pi nguru nyakua ’diyi pie, yi ocizu azini yi ma dri jazu.

⁴Te ma nga fe ’ba ma o’be yi ’dile azini ’dole suru nyaku dri dria ’diyi ma eselia, Manase, Hezekia mvi opi Yudaari ma e’yosi, e’yo erini ’yele Yerusalemuarisi.

⁵Yerusalemu la, ’ba ngapi yiki ’bapi mi vuri a’di’i ya? A’dini nga mi awuni ya? A’dini nga i oja kalaa zizu mi ovu ngonirini ya?

⁶Mi ga ma si ’bo, Yehova ’yo ra, mi asi vile ra; e’yo ’disi ma eju ma dri dri aruzu mi be’bo;- ma ande ma asi omvizasi ’bo.

⁷Ma ndri yi kobisi ’bo angu nde ma kalitilia; ma fe anzi yini dra ma dria ra, ma la ’ba mani ma dri ’bo; te yi kuni geri yini emvizu ku.

⁸Awuzi yini ezu karakarau aga cinya mirini ra; etu agaa biri ma eji ’ba dri japi ’diyi karile ma andripi ma dria; ma fe candi uriuriruri e’de yi ma dria coti mbelekocici.

⁹Oku anzi aziri osipiri ma okpo deru ’bo; mile erini ni ni; etu erini ’de drinia pi angu emve be’dani; eri isu drinza asi otiza be ’bo. Ma nga ’ba joloko acepi ’diyi fe seise ari’ba yini ma drilia, Yehova ’yoni.

¹⁰Candi mani, ma andri la, mini ma osile ’ba a’di ’dipi azini agata gapi nyaku dri driari’irisi! Ma feni mari ku, ma nyani vini mari ku ’ba azini ’diyi vu fo, te yi dria alu ale ma o’da o’da.

¹¹Yehova ’yo ra, Ada, ma nga okpo fe mi dri mi ’yezu onyiru; ada, ma nga fe ari’ba ma ’ba matu mi vu ewu e’yo ewaru pini ecazu mi vu inzata berisi.

¹²’Ba eco aya, adaru aya engapi angu andraleruari pi nyozaru mola be ra ya?

¹³Ma nga afa mini ovuzu yi be ’diyi pi fe afa opazale aje kokoru, lonyi mini be; ma nga ’ye ’dini kala mini dria ma alia, e’yo onzi mini dria ma e’yosi.

¹⁴Azini ma nga fe yi ma aga ari’ba mini be tualu angu mini nile kuria; adra mani ngapi dipi mi driari ma acini ti kole ’borisi.

¹⁵Yehova la, mi ni ra; mi ma ega ma, mi andri ma, mi ma ofe arioti mani ’ba ma inzapi ’diyi ma ruaa. Asi teza minisi mi ma nze ma ’dale ku; mi ma ni kini yi o’da ma e’yo minisi ra.

¹⁶E’yo mini ’yole ’diyi e’da yi ra, ma nya yi, e’yo nde ’diyi ovu ma dri ayikoru, fe ma asi ovu ayikosi tu; yini ma omvele ru minisirisi, Yehova Mungu asikari ongulumuruniri la!

¹⁷Ma rini mira ’ba yi okupi ayiko toko toko ’bapi ’diyi ma eselia ku, ma oguni ku indi; ma ri a’dulesi, dri mini ma e’yosi, mini ma gale tre adrasirisi.

¹⁸Ma ruani su ’dani a’di e’yosi ya? Bile ma ruaari leni ja ku a’disi ya? Eri ga atiko si a’disi ya? Mi nga ovu ma dri ekile yi raza ’ba icipiriru, yi ovupi ’dani ku nzupi ra rariru ya?

¹⁹E’yo ’disi Yehova ’yo ’dini: Mi ka emvi ra, ma nga di mi eji dika, mi ma so pa ma drilia ani. Mi ka afa aje amborusiri nze afa onzikanyaru ’diyi ma eselia mi nga di ovu ekile ti manile. Yi nga emvi mi vu, te mi ngani mvi yi vu ku.

²⁰Azini ma nga fe mi ma ovu suru ’dori dri ekile abi kaliru molasirile; yi nga omba ’ba mi be te yi ngani mi aga ku, a’disiku ma ovu mi be mi pazu, mi arizu, Yehova ’yoni.

²¹Azini ma nga mi ari ’ba onzi ma dria, ma nga mi onze ’ba uri fepi ’diyi ma dria indi.