Read lugbara Yeremia 17 Bible Online

Yeremia 17 - lugbara bible

Yeremia 17

¹Yi si ezata Yudani kalamu ayarusi; si eri oni ajeambosi diamonderu ma sisi, opa eri oni yi ma asiniri ma dria, azini pari yini edeta edezu ’diyi ma o’yua;

²de anzi yini pari yini edeta edezu ’diyi pi ma e’yo egaria, wura Aseraru inzile inzi pati ibiru oni izuru ma dria ’diyi ma etia ’diyi be.

³Oni mani aseari la, ma nga afa mini pi fe afa opazale lonyi mini pie, pari mini uruleru ’diyi pie dria, e’yo onzi mini ma e’yosi, angu mini ma kalati vusi dria.

⁴Azini mi adaru mi ma ngulupi nga awita ndra mani fele mi driri ku ra, azini ma nga fe mi ma nga azi ari’ba mini dri angu mini nile kuri ma alia; a’disiku emini adra mani ma ad ngapi vepi ’dani ’daniri edulerisi.

⁵Yehova ’yo ’dini: Trita ma ovu agu asi ini ’bapi ’ba ma driari ma dria, ’ba rua ari beri ’bapi wu okporu iniruri, asi erinia Yehovani kupi jari.

⁶Eri nga ovu ekile pati werea angu roko driarile; e’yo onyiru ka eca ra eri ngani eri ndre ku. Te eri nga ovu angu ’wipi ’bo roko dria ’diyile, angu a’i be ’ba kokoruria.

⁷’Ba asi ini ’bapi Yehova ma driari ma ovu asi ndriza be, ’ba Yehovani ’bapi asi teza iniruri.

⁸A’disiku eri nga ovu ekile pati sale yi tia, ola ini supi yi raza ma tiarile, eri ngani ovu urisi ewu etukanisi ku, te bini nga ovu ibiru; eri ngani ovu urisi ewu ozooni ’dizu kurisi ku indi, eri ngani vini ku efi ’yazu ku.

⁹Asi ’bani ovu lokiri be aga afa dria ra, eza i teketeke; a’di eco eri nizaruni ya?

¹⁰Ma Yehova, ma asisile ma e’yo ndru ma’i, ma asi o’bi ma’i, ma ma fe ’ba dria dri alu alu ekile geri ini vusi, ekile ’yeta erini ma efi ’yazale.

¹¹’Ba lonyi okupi te geri kililirusi kuri eri ovu ekile ali’bo, anzi erini tile ku ’diyi okupirile; yi nga eri ku ewu erini ma eselia agadua, asizaniria eri nga ovu azazaru.

¹²Pari alatararu amaniri eri oguna dizaru opini, ’bazaru uru okokele engazu e’dozaniria.

¹³Yehova asi teza Israeliniri la, ’ba dria mi kupi ’diyi nga ovu drinzasi; yi nga ’ba mi kupi ’diyi ma ru si nyakua, yini Yehova, kule rarisi.

¹⁴Mi ati ma rua, Yehova la, ma nga di ovu atizaru ani; mi pa ma, ma nga di ovu pazaru ani; mini ovule inzita manirisi,

¹⁵Mi ne, yi ’yo ma tia, E’yo ’yoza Yehovaniri ngoa ya? Eri ma emu nga!

¹⁶Te ma’i, ma ’yeni mbelembele kabilo ocezuri kuzu mi vuti bizu ku, ma leni vini o’du ocokoniri ku, mi ni ra; e’yo efupi ma tiliari ovu mi milia.

¹⁷Mi ma ovu ma dri uriuriru ku; mi ovu pari mani ma zizu o’du onzisiri’i.

¹⁸Mi fe ’ba ma inzapi ’diyi ma ovu drinzasi, te ma ma ovu drinzasi ma’i ku; yi ma asi ma oti oti, te ma asi ma oti mani ku; mi eji o’du onziri yi ma dria; mi ja yi dri, dri jaza pale iririsi.

¹⁹Yehova ’yo ma tia ’dini: Mi mu pa so anzi ’bani ma kalitilia, pari opi Yudaa ’diyini fizu azini fuzuria, mi so pa kalitile Yerusalemua ’diyia dria,

²⁰mi ’yo yi tia: Emi eri e’yo ’yoza Yehovani, emi opi Yudaa ’diyi, emi ’ba Yudani dria, emi ’ba ovupi Yerusalemua, fipi kalitile ’diyia ’diyi dria.

²¹Yehova ’yo ’dini: Emi te emi agei, emi ma ’du afa ji o’du sabatonisi aluni ku, emi ma ofi eri kalitile Yerusalemua ’diyiasi ku.

²²Emi ma ’du afa jo emini ma aliasi amve o’du sabatonisi aluni ku, emi nga azi ku indi, te emi ma mba o’du sabatoni ma ta alaru ekile mani azile emi a’bipi tiarile.

²³Te yi erini ku, yi coni vini yi ma bile ku, te yi ’ba ombe yini mbazaru yi ma eri ku ani, yi ma a’i imbata ku beni.

²⁴Te eri nga eca ’dini, emi ka ma ti eri asi driasi, Yehova ’yo ra, afa aluni ofizu aku amboru ’dori ma kalitileasi o’du sabatonisi ku, te emi ka o’du sabatoni ma ta mba alaru, azi ngazu o’du ndesi aluni ku,

²⁵ka’dini opi pi opianzi be, ’ba ripi oguna Daudiniri ma dria ’diyi nga fi geri aku amboru ’dori ma kalitileasi, yini rizu gari alia, azini akanya dria, yi’i,opianzi yini pie, ’ba Yudaa ’diyi pie, ’ba ovupi Yerusalemua ’diyi pie; aku amboru ’dori nga di adri ’dani ’dani.

²⁶Te yi nga emu engazu aku amboru Yudaa ’diyiasi, pari Yerusalemu ma ageia ’diyi pie, angu Benyaminini pie, angu eleriari pie, angu oni ruaari pie, angu Uruleruri ’ pie, yi nga edeta veza pi eji Yehova vile joa edeta azini pie, edeta, anyafurasiri pie, obiese pie, edeta awa’diforu ’diyi pie dria.

²⁷Te emi ka ma ti eri o’du sabatoni ma ta mbazu alaru, azini afa ’duzu fizu kalitile Yerusalemua ’diyia o’du sabatonisi ku, ’diniku,ka’dini manga aci edu kalitilenia, eri nga jo ambo ambo Yerusalemua ’diyi ve ra, aci nde ’ba ngani inyu ku.