Read lugbara Yeremia 19 Bible Online

Yeremia 19 - lugbara bible

Yeremia 19

¹Yehova ’yo ’dini, Mi mu, mi je tijoa ’ba imvu sipirini sile odrisiri, mi ’du ’ba ’wara ma azi ’ba ma eselia, ba ’wara ma azi ’ba edeta edepi ’diyi ma eselia ’diyi be,

²mi fu mu e’bu Hinomu mvi vile ovupi pari ’bani fizu kalitile Harisitiari ma tiaria, mi olu e’yo mani ngale ’yole mi tia ’diyi ’dale.

³Mi ’yo, Emi eri e’yo Yehovani, emi opi Yudaa ’diyi la, ’ba ovupi Yerusalemua ’diyi be. Yehova asikari ongulumuruni Mungu Israeliniri ’yo ’dini, Emi ndre, ma nga e’yo onzi eji pari ’dori ma dria ’doni, ’dini ’ba ka e’yoni eri ra, eri ma bileni nga su su.

⁴A’disiku yini ma kule ’borisi, yini pari ’dori ojale ndururisi, yini obiese vele alenia Mungu andini yini nile yi’i ku, yi a’bipi pie, opi Yudaa ’diyi pie ’diyi dririsi; yini pari ’dori gale tre ’ba e’yo kokoru ’diyi ma arisirisi,

⁵azini yini pari uruleru ’diyi sile Baali dri agianzi yini evezu acisi afa veza edetaruriru Baali dririsi, te ma azini e’yo nderi ma’i ku, ma ’yoni vini ku, e’yo nde fini ma asia aluni ku indi;

⁶e’yo ’disi mi ndre, o’duni nga eca ra, Yehova ’yo ra, o’du ndesi yi ngani pari ’dori ma ru ’da Tofeti’i, kani Hinomu mvi vile e’buri’i dika ku, te E’bu ’Ba O’dizuri’i.

⁷Te ma nga e’yo amaza Yuda pini Yerusalemu beri oja toko pari ’dori ma alia ra, ma nga fe yi ma e’de sei sia ari’ba yini pi ma drilia, ’ba ndrupi yi fupi ’diyi be. Ma nga yi ma avu ofe nyazaru aria ’bua ’diyi pi dri anyapa nyakua ’diyi be.

⁸Azini ma nga aku amboru ’dori fe ovuzu e’yo osutaru, onzizariru; ’ba dria alu alu agapi ’dasi ’diyi nga osu tu, yi nga onzi onzi ocoko erinisi dria.

⁹Ma nga fe yi alu alu ma nya agupianzi yini pi ma za ezoanzi yini be, azini yi alu alu nga agyi yini ma za nya, o’du yi ma ari’bani azini ’ba ndrupi yi fupi ’diyini yi acezu kuru, yi omizorisi.

¹⁰O’du ndesi mi nga di tijoa nderi afu ’ba mupi mi be ’diyi ma milia,

¹¹te mi nga ’yo yi tia, Yehova asikari ongulumuruniri ’yo ’dini: Ma nga suru ’dori pi ofu aku ’dori be ’dini, ekile ’bani tijoa ’ba imvu sipirini sileri afulerile, ’dini ’ba econi eri ecizu imvuru dika ku. Yi nga ’ba ma avu sa Tofetia, de nga pari ’ba avu sazu aleniari aceni dika ku.

¹²Ma nga pari ’dori ’ye ’dini, Yehova ’yo ra, ’ba alenia ’diyi be, mani aku amboru ’dori ’bazu ekile Tofetile.

¹³jo Yerusalemua ’diyi, jo opi Yudaa ’diyini be, ’bani ezale ’diyi, nga ovu ekile pari Tofetiarile-adaru jo dria dria yini obiese aji be arikariruri vezu ongulumu ’bua ’diyi dri yi ma jo dri sende senderu ’diyi ma dria, yini edeta edele afa mvuzasi ’diyi osuzu Mungu andini dri ’diyi.

¹⁴O’du ndesi Yeremia nga di emu engazu Tofetia, pari Yehovani eri ti pezu e’yo ondrizuria; eri nga pa so jo Yehovani ma iriia, eri nga ’yo ’ba tia dria;

¹⁵Yehova asikari ongulumuruni Mungu Israeliniri ’yo ’dini, Emi ndre, ma nga e’yo onzi dria mani olule eri ma ruaari eji aku amboru ’dori ma ruaa, aku eri ma ageia ’diyi be ra, yini fele yi ma ombeni mbale ’dini yi ma eri e’vo mani kurisi.