Read lugbara Yeremia 2 Bible Online

Yeremia 2 - lugbara bible

Yeremia 2

¹E’yo ’yoza Yehovani nga eca ma vu, kini,

²Mi ma mu wu Yerusalemu ma bilia ’yozu kini, Yehova ’yo ’dini, Ma ega e’yo mini ndra ovuzu asi onyirusi ewu mini ovuzu ’ba o’dirurisiri, leta ni amani ama azizu nu berisi; mini ma vuti bizu angu roko driaria, angu ’bani afa sazu alenia kuri ma alia.

³Israeli ovu ndra alatararu Yehova dri, orioko anya dri eriniri. ’Ba dria eri nyapi ’diyi nga ovu e’yo be; e’yo ewaruni nga ca yi ma dria, Yehova ’yoni.

⁴Emi eri e’yo Yehovani, emi ori’ba Yakoboni la, emi ori’ba dria suru Israelini eselia ’diyi be.

⁵Yehova ’yo ’dini: Emi a’bipi isu e’yo onzi ngori ma yini ngazu ma vusi ziri, yini e’yo toko ma vuti bizu, yini yi ojazu toko aniri ya?

⁶Yi ’yoni ndra ku kini, Yehova ama ejipi uru engazu angu Misiria, ama dri cepi roko ma driasi angu yi kokoru azini ’bile beri ma aliasi, angu etukaru dra ma endrilendrini ovuzu alenia, angu ’bani agazu aleniasi ku, ’ba aluni ovuzu alenia kuri ma aliasiri eri ngoa ya?

⁷Te ma eji emi angu efi ’yapi turi ma alia, efi erini pi nyazu onyi erini be. Te emi ka fi ’bo, emi eza angu mani, emi ’ba awita mani afa ngule onziriru.

⁸’Ba edeta edepi ’diyi ’yoni ndra vini ku kini, Yehovani ngoa ya? ’Ba azita drilia ’diyi nini ma ku; ’ba ’ba dri cepi ’diyi eza e’yo mani ra; ’ba nabiru ’diyi olu e’yo Baalisi, yi aci e’yo orodri fepi kuri ma vutia.

⁹E’yo ’disi ma nga emi etu nga ’dani,yehova yoni ma nga vini anzi emini ma anzi etu indi.

¹⁰Emi ma zo kpere angu i lipi miri alia Kitimua ’diyia, te emi ndre, emi ma pe ’ba ti Kedaria, te emi ega e’yere; emi ndre kani drio e’yo azini ’dinileri indi ya?

¹¹Suru azini oja adrou yini ’diyi yi ka ovu adrou toko ti ra ya? Te suru mani oja diza yini afa orodri fepi kuri ’bazu parinia.

¹²Emi ma osu e’yo ’dirisi fo, emi ’bu la! Emi ma ru tu, emi ma ovu Yehova ’yoni,

¹³a’disiku ’ba mani eza ezata iri: yi ku ma yi a’di idrirurini ’bo, yi ga yi dri ’bile ra, te ’bile eti yi lupi ’bo ecopi yi ta mbapi ku ’diyi.

¹⁴Israeli ati’boni ya? Osi ndra eri akua ati’boru ya? A’di e’yosi eri ecea afa pazaru ya?

¹⁵Kamianzi ono eri dria, yi owu okposi. Yi fe angu erini ovu andruru ’bo; odu aku erini amboru ’diyi ’bo, ’ba alenia aluni yo.

¹⁶Memifisi anziyi pi Tapanihesi anziyi be yi lu mi ma olubu ra.

¹⁷Te mi ejini e’yo ’diyi mi ngulupi dria mi’i mini Yehova Mungu mini kule pari erini mi dri cezu geriasiria ku ya?

¹⁸Te curu’do mi a’di ’ye geri mupi Misiriaria yi Nilini mvuzu ya? Kani mi a’di ’ye geri mupi Asuriaria yi Yi Ara Ufirateni mvuzu ya?

¹⁹E’yo onzi mi ngulupini nga mi imbani, azini e’yo mini asizu vile ’diyi nga tre mi dria. E’yo ’disi mi ma ni di e’yo mini Yehova Mungu mini kuzuri ovu e’yo onzikanyaru okangalikaru indi; te ruta mini ma ruzuri ovuni mi alia ku, Opi Yehova asikari ongulumuruni ’yoni.

²⁰Te ewu driorisi ma nyo pati kulumburu mini azini ma oce afa mi ombezuri ra; te mi ’yo ra, Ma ngani ’ye ku. Te oni izuro dria ma dria azini pari ibiru dria ma etia, mi adri mi avu ekile oku ali o’bapirile.

²¹Te isu ma sa ndra mi pati zabibuni onyiruri, ori pi baru. Mi oja di mi ma dri pati onzikanyaru, pati aseariru ngoni ngoni ya?

²²Te ka tro mi oji ofutasi, kani sabuni ndu ndusi ti, e’yo onzi mini ovu nga ma milia ’dani, Opi Yehova ’yoni.

²³Mi eco ’yozaru ngoni ngoni ya kini, Ma ovuni ondiru ku, ma bini Baali pi ma vuti ku? Mi ndre pamvu geri minini e’bu aliari; mi ma ni e’yo mini ’yele rarimi ovu ekile ngamia asi la la be, acipi pamvu ini drisirile;

²⁴ekile akanya i sipi roko be, afa aji ongupi ava ruanisirile! Erini ovuzu ava be ’dini, a’di eco eri ojazuni ya? ’Ba eri ndapi ’diyi ngani ande erisi ku; te mba erini ma alia yi nga eri isu ra.

²⁵Mi ma ku pa mini ma ovu enyiriko kokoru ku, oliko mini ma anga yi avijosi ku indio Te mi ’yo ra, E’yo ’yele ’diniri oye; yo, ma le ’ba jururu ’diyi ’bo, te ma nga yi ma vuti bi’i.

²⁶Ekile ’ba oguoururini drinza isule ’bani eri biriarile, ori’ba Israelini ovu drinza be ’dinile yi’i, opi yini pi, opianzi yini pie, ’ba yini edeta edepi ’diyi pie, nabi yini ’diyi pie,

²⁷’yopi pati tia kini, Mi ma ati’i, azini oni tia kini, Mi ti ma mi’i, ’diyi. Te yi oja yi ma nguku ma vu, te mile yini’i ku. Te o’du yini candi isuzurisi yi nga di ’yo ra, Mi enga ama pazu fo!

²⁸Te Mungu toko mini edele ’bo ’diyi yi ngoa ya? Onyiru yi ma enga, yi ka eco mi pazaru, o’du mini ovuzu candisiria ra; te ekile aku ambo ambo mini ’diyi ma kalafe vusi, adrou mini ’diyi ovu ’dinile, Yuda la

²⁹Emi ma etu a’di e’yosi ya? Emi dria eza ma vu ’bo, Yehova ’yoni.

³⁰Ma oco anzi emini ti te yi ga imbata nderi si; sei emi ngulupini ofu nabi emini ’diyi ’bo ekile kami ’ba dri japirile.

³¹Emi ’ba ewu ’dosi ’diyi la emi eri e’yo Yehovani. Ma si ekile rokole Israeli dri ra ya? kani angu inicicirile ra ya? ’Ba mani ’yo ’dini a’disi ya, kini, Ama tru ama ’bo; ama ngani emu mi vu dika ku?

³²Aliria ma onyiafa tani avi eri dri ra ya? kani amurua indi afa suza erinisi ra ya? Te ’ba mani ’diyi dri ma ma ta avi o’du karakarau lakokoru.

³³Mi ede geri mini leta ndazu ’doni ya E’yo ’disi mi imba e’yo mini adrile ’yele ’diyi oku onzi ’diyi dri.

³⁴Azini bongo mini ma tia yi isu ’ba ali kokoru alioru ’diyi ma avuari indi; ma isuni yi fizu aliru ku; te eri e’da e’yo nde ’diyisi dria.

³⁵Te mi ’yo ra kini, Ma ’yeni onzi ku; ada adra erini oja i ma vusi ’bo. Mi ndre, ma nga e’yo mini li, mini ’yole kini, Ma ezani ku-risi.

³⁶Mi onzu ’dole azini ’dile ’dini, geri mini ojazu, a’disi ya? Mi nga ovu drinzasi Misirisi indi ekile mini ovule ndra drinzasi Asuriasirile.

³⁷Mi nga fu eri vurisi indi dri be dria, a’disiku Yehovani ’ba mini asi mini ’bazu yi ma dria ’diyi gazurisi, azini mi ngani drileba isu yi be ku.