Read lugbara Yeremia 20 Bible Online

Yeremia 20 - lugbara bible

Yeremia 20

¹Te Pasihuri Imeri mvi, atalau edeta edepi, ’ba jo Yehovani ’diyi ma dri cepiri, eri eri Yeremiani e’yo ’diyi ondriria.

²Pasihuri nga di nabi Yeremiani co ra, nga di eri eci pati okaliru ovupi kalitile uruleru Benyaminini Yehova vile joari ma alia.

³Te eri eca drusi ’dini, Pasihuri tru Yeremiani pati okaliru ma aliarisi ra. Yeremia nga di ’yo eri tia, Yehova ’dani mi ru Pasihuri’i ku, te Magori-misabibu!

⁴A’disiku Yehova ’yo ’dini, Mi ndre, ma nga mi ’ba ovuzu uriuriru mi ngulupi dri, mi agyi be dria. Yi nga e’de ari’ba yini ma sei sia, te mi nga ndre mi milesi. Azini ma nga Yudani fe dria opi Babuloniari dri, eri nga yi ii ati’baru Babulonia, yi ofuzu seisi.

⁵Azini indi, ma nga aku amboru ’dori ma lonyi pi fe dria ari’ba yini dri, orodrini pie dria, afa erini aje amborusi ’diyi pie dria, ada opi Yudaa ’diyi ma lonyi dria; ari’ba nde ’diyi nga yi ma afa opa, nga yi bi ji ati’baru Babulonia.

⁶Te mi’i, Pasihuri la, ’ba dria ovupi mi vile joa ’diyi be, emi nga mu ati’boa; mi nga ca Babulonia ra; mi nga dra ’dale, yi nga mi sa ’dale, mi’i agyi mini mini e’yo oluzu yi ma tia inzosi ’diyi be dria. Awuongo Yeremiani

⁷Yehova la, mi ici ma dri ’bo, ma’i, ma ovu icizaru ra; mi aga ma okposi ra, mi nde ma ’bo. Ma ofu oguaru ’bo; ’ba dria ’ba ma aparakaru etu dria.

⁸A’disiku paleko dria mani e’yo ’yoria, ma wu, ma otre ’dini, ’Ba fuza pi ’ba dri jaza be ’doni ya! A’disiku e’yo Yehovani oja i ma ruaa o’dataru azini ajidimararu o’du dria.

⁹Te ma ka ’yo ra kini, Ma ngani eri ma ru ’yo dika ku, ma ngani vini e’yo olu eri ma rusi dika ku, etu nderisi acini nga ve ma asia ekile aci vepi ve ovupi ombezaru falako mani ma aliarile, ma ande ma ogazu e’yo oluko si, ma econi ovu ciri ku.

¹⁰A’disiku ma eri ’ba karakarauni yini ma aji diria. Uri ovu kalaasi kuru! Emi su asu eri ruaa! Ama nga vini asu su eri ma ruaa indi! Agyi amani mile sizu yi be ’diyi dria ’yo ’dini, yi e’yoni ma ndezuri teo Kani ama nga eri ici ra, amani ngazu eri agazu ra yani, ama nga arioti ari ofe eri ma ruaa ra.

¹¹Te Yehova ovu ma be ekile ’ba okporurile azini uriurirurile; e’yo ’disi ’ba ma inzapi ’diyi nga aci parapara, yi ngani aga ku. Yi nga ovu drinzasi tu yini e’yo ’yele onduasi kurisi. Ada, yi nga drinza ’dani ’dani ’ba ma drini avizu kuri isu ra.

¹²Te Yehova asikari ongulumuruniri la, mi ’ba onyi be o’bipiri, mi asisile pi nepi asi beri, mi fe ma ma ndre mini arioti ari oferia yi ma ruaa, mani e’yo mani ecele mi dri ’borisi.

¹³Emi ngo ongo Yehova dri; emi inzi Yehovani! A’disiku erini ’ba owupi afaakosiri ma orindi arile ’ba azi onzi ’yepi ’diyi ma driarisi.

¹⁴O’du mani osizuri ma ovu trizaru! 0’du ma andrini ma osizuri ma ovu drilebaru ku!

¹⁵Agu e’yo olupi ma ati tia kini, Osi mi dri agimvani! eri fezu ovuzu ayikosi turi ma ovu trizaru.

¹⁶Agu nde ma ovu ekile aku amboru Yehovani ogule va erini asi omvizu yi vu ku ’diyile; eri ma eri awu o’bitisi, azini lulu gaza etu agaasi,

¹⁷erini ma fule mani efuria ma andri ma opojoasi kurisi; te’do ma andri ovu ma nyaazini eri te mba oporovuru ’dani.

¹⁸Ma efu opojoarisi azi okporu ndrezu candi be, mani drinza isuzu o’du mani vusi dria ’dini a’di e’yosi ya?