Read lugbara Yeremia 21 Bible Online

Yeremia 21 - lugbara bible

Yeremia 21

¹E’yo engapi Yehova vu, ecapi Yeremia vu, o’du opi Zedekiani Pasihuri Malikiya mvi pi ma ti pezu eri vu kuhani Zefania Maaseya mvi berisiri eri ’di, kini,

²Mi zie’yo Yehova tia ama dri, ma matu ’ba mi vu, Nebukadreza opi Babuloniarini omba ’bale ama berisi; kani Yehovani nga ama ’ye ’yeta erini osutaru ’diyi dria vusi yani, fezu eri ma ku ama ra.

³Yeremia nga di ’yo yi tia:

⁴Emi ma ’yo Zedekia tia ’dini kini, ’Yehova Mungu Israeliniri ’yo ’dini: Emi ndre, ma nga afa ombani emini dria, emini omba ’bazu opi Babuloniari pi be ’ba Kalideyani emi acepi kuru ovupi abi kaliru ma ageia amveleru ’diyi be ’diyi oja vile; azini ma nga ’ba ’diyi oku aku amboru ’dori ma alia.

⁵Ma ma pini nga a’di ’di emi be ma’i, dri ejuzasi azini wu okporusi, aokosi, asi vezasi, azini adra okarurisi.

⁶Te ma nga ’ba ovupi aku amboru ’dori ma alia ’diyi oco ra, ’ba piyi anyapa pie; yi nga odra dra amboru muarurisi.

⁷Ye-hova ’yo ra, Te vutinia ma nga Zedekia opi Yudaari pi, ati’ba erini pie, ’ba erini pie, adaru ’ba acepi aku amboru ’dori ma alia azo muaruri pini kule sei pie, tiki pie ’diyi fe Nebukadreza opi Babuloniari pi ma dria, ari’ba yini pie, ’ba ndrupi yi fupi ’diyi pie. Eri nga yi oli sei sisi; eri ngani yi ku ku, ngani ovu yikisi ku, ngani vini ovu asi ndrizasi yi vu ku indi.

⁸Te mi nga ’yo ’dini suru ’diri tia: Yehova ’yo ’dini kini: Emi ndre, ma ’ba emi drilia geri idriniri pi geri drataniri be.

⁹’Ba ovupi aku amboru ’doriari nga dra seisi, azini likisi, azini azo muarurisi; te ’ba fupi amve fipi ’ba Kalideyani emi acepi kuru ’diyiruri nga ovu idriru, idri eriniri nga ovu eri vu ekile afa erini opale omba aliarile.

¹⁰A’disiku ma ’ba ma mile aku amboru ’dori vu eri ’yezu onzi, te eri ’yezu onyiru ku, Yehova ’yo ra: eri nga ovu fezaru opi Babuloniari ma dria, azini eri nga eri eve acisi ra.

¹¹Te ori’ba opi Yudaarini ma e’yosi, emi ma eri e’yo Yehovani,

¹²Emi ori’ba Daudini la! Yehova ’yo’dini: O’bitisi emi ma li e’yo liza kililiru, emi ma ari ’ba yini yi ma afa opale ’diyi ’ba yi inzapi ’diyi ma driarisi, asi veza mani kazu efuzu acile ku, eri kazu vezu ku de ’ba inyupini yo, ’yeta emini onzikanyaru ’diyi ma e’yosi.

¹³Mi ne, ama dri ri mi be ra, mi ’ba ovupi e’bua azini kata angu senderuriari la Yehova kini; emi ’ba ’yopi, A’dini nga esi omba ’ba ama beni ya? kani, A’dini nga efi pari amani adrizu ’diyiani ya?

¹⁴Te ma nga panga onzi ofe emi dri ’yeta emini ’yeleri ma efi vusi Yehova ’yoni; te ma nga aci edu eri ma ocea, eri nga afa dria ovupi eri ma ageiari ve ra.