Read lugbara Yeremia 22 Bible Online

Yeremia 22 - lugbara bible

Yeremia 22

¹Yehova ’yo ’dini: Mi si andra ’dale opi Yudaari ma joa, mi ’yo e’yo ’diri ’dale,

²mi ’yo, Mi eri e’yo Yehovani, opi Yudaari la, ripi oguna Daudini ma driari, mi’i ati’ba mini ’diyi pie, ’ba mini fipi jotile ’diyiasi ’diyi pie.

³Yehova ’yo ’dini: Emi li e’yo liza kililiru, azini e’yo onyiru, azini emi ma ari ’ba yini yi ma afa opazu ra ’diyi ’ba yi inzapi ’diyi ma driasi. Emi ma ’ye ’ba onzi ku, emi ma ecocua ani’bo pi okposi ku, imvoa pie, awuzio pie, emi ma ada ’ba e’yo kokoru ’diyi ma ari pari ’dori ma alia ku.

⁴A’disiku emi ka e’yo ’diyi ’ye adadaru, ka’dini opi ripi oguna Daudini ma dria, tupi gari dria azini nzupi akanya ma dria ’diyi nga efi jo ’dori ma tilia ra, eri’i ati’ba erini pie, ’ba erini ’diyi pie.

⁵Te emi ka e’yo mani ’yole ’diyi eri ku, ma ma ngulupini oyo so ma rusi, Yehova ’yo ra, kini jo ’dori nga eca andruru.

⁶A’disiku Yehova ’yo ’dini ori’ba opi Yudaarini ma e’yosi: Mi si ma dri Gileadile, azini Lebanoni ma drile, te ndi, ma nga mi ’ba ovuzu rokoru, azini aku amboru ’ba kokoru ’diyiru.

⁷Azini ma nga ’ba ’ba dri japi ’diyi ede a’di ’dizu mi be, yi dria afa yini ombani ’diyi be a’dule a’dule; yi nga pari marioni mini onyiru tu ’diyi oga, yi nga yi o’be ada.

⁸Suru kakau nga aga aku amboru ’dori ageiasi, yi alu alu nga ’yo ’ba yi ma jo ejelea ’diyi ma ria kini, Yehova ’ye aku amboru ’dori ’dini a’disi ya?

⁹Yi nga di e’yoni omvi kini, Yini Yehova Mungu yini ma aziza kule, yini Mungu andini inzile, azi ngazu yi dririsi.

¹⁰Emi ma owu ’ba drapi rarisi mindresi ku, emi oga lulu erisi ku indi; te emi ma wu okposi ’ba mupi angu andiarisi, erini ngale emvile dika ku, ngale i ma ngulupi ma angu ndrele dika kurisi.

¹¹A’disiku Yehova ’yo ’dini Salumu Yosia mvi opi Yudaari, opi nyapi ati Yosia ma paria, fupi pari ’doriasiri ma e’yosi: Eri ngani emvi ’de ku,

¹²te eri nga dra pari yini eri jizu ati’boruri ma alia, eri ngani angu ’dori ndre dika ku.

¹³Candi ’ba i ma jo sipi e’yo onyi kokorusiri dri, azini eri ma jo aliza ’diyi sipi e’yo liza kililirisi kuri dri; ’ba i ma jo eseliari ayuzu azia oyakokoru, eri ofeni oya erini ku;

¹⁴’yopi kiru, Ma nga mani ma jo si walaru, jo aliza be amboru-ri; eri olu derisani indi, eri ede jo aliza nde ma mile mario patisi, e’bura vini eri kabulo ekarusi indi.

¹⁵Mi opi nya mini o’bile agale mario pati tre ’diyisirisi ya? Mi ati nyani nyaka, mvuni afa mvuza, lini e’yo kililiru, ’yeni onyiru ku ya? Ka’dini e’yo erini ovu ndra drilebaru ani.

¹⁶Eri li ndra alio pi ma e’yo kililiru ’ba owupi afasi ’diyi be; o’du ’dasi e’yo ovu ndra ’yeke. E’yo ma nizuri ovuni ’dini ku ya? Yehova ’yoni.

¹⁷Te mile mini asi mini be ’yeni afa azini ku, eri lu li ’bazu, ’ba e’yo kokoru ’diyi ma ari adazu, ’ba ecandizu azini ’ba ’yezu eganasi,

¹⁸E’yo ’disi Yehova ’yo ’dini Yehoyakimu Yosia mvi opi Yudaari ma e’yosi: Yi ngani owu erisi ku, ’yozu, Eyawaye! ma adri ma ye! kani, Ma amvi leu! Yi ngani wu erisi ku kini, Eyawaye! opi leu kani, Diza erini de i ’do ye

¹⁹Yi nga eri ma avu sa ’bani akanya salerile; yi nga eri se ’be Yerusalemu ma kalatilia amve.

²⁰Mi tu uru Lebanonia, mi ga lulu, mi enga mi o’duko uru Basania; mi ga lulu engazu Abarimua, ’ba mi lepi ’diyini dri jale driarisi.

²¹Ma ’yo mi tia ewu e’yo minini ovuzu dria drilebarurisi ra, te mi kini, Ma erini ku. Adriza mini gbu mvasi ecazu andru eri ’dini ’di, mi adrini ma ti eri ku.

²²Olini nga ’ba ocepi ’diyi oceni, ’bami lepi’diyi nga mu ati’boa; o’du ’dasi mi nga ovu drinzasi, mi nga aba aba e’yo onzi minisi dria.

²³Mi ’ba ovupi Lebanonia jorovu sipi mario pati siari la, ’ba nga ovu taisi ambo ngopi ya rua suza ka nga mi bi ekile oku mvaazoni e’dulerile!

²⁴Mani ovule idrirurile, Yehova ’yo ra, Konia Yehoyakimu opi Yudaari mvi ka te ovu driadriamva eceta be ruaa ma dri ndiari ti, ma te mi nze ’diarisi ra;

²⁵ma nga mi fe ’ba ndrupi mi fupi ’diyi ma dria, ’ba mini rule ’diyi, adaru Nebukadreza opi Babuloniari pi ma dria ’ba Kalideyani ’diyi be.

²⁶Te ma nga mi ’be amve mi andri mi osipiri be, angu azini mini osizu alenia kuria; emi nga odra ’dale.

²⁷Te yi ngani emvi angu yi ma asini lele mvizuria ku.

²⁸Agua Koniaru ’dori eri imvu irikoru ’bani onzole onzori’i ya? Eri imvu ayiko fepi ’ba dri kuri’i ya? Eri’i ori’ba erini be, o’be yi angu yini nile kuria a’disi ya?

²⁹Nyaku la, nyaku la, nyaku la, mi eri e’yo Yehovani fo!

³⁰Yehova ’yo ’dini: Mi si agu ’diri ’ba anzi kokorurile, ’ba ngapi drileba isupi o’du erinia kuriru; a’disiku ori’ba erini ma eselia ’ba aluni ngani ovu drileba be ku rizu oguna Daudiniri ma dria, opi nyazu Yudaa dika ku.