Read lugbara Yeremia 25 Bible Online

Yeremia 25 - lugbara bible

Yeremia 25

¹E’yo ecapi Yeremia vu, ’ba dria Yudaa ’diyi ma e’yosi, eli su Yehoyakimu Yosia mvini opi nyazu Yudaarisiri, eli ’da ovu eli oko Nebukadreza opi Babuloniarini e’dozu opi nyazuri’i,

²e’yo nde ’diri nabi Yeremia olu ’ba dria Yudaa ’diyi pi ma tia ’ba dria ovupi Yerusalemua ’diyi be, kini:

³Engazu eli mudri drini na Yosia Amoni mvi opi Yudaarini opi nyazurisiria, ecazu kpere andru, eli kali iri drini na ’diyisi, e’yo Yehovani eca ma vu, azini ma olu emi tia, mani engaria o’biti drio drio, e’yo ’yoria emi tia; te emi erini ku.

⁴Yehova ope ati’ba erini nabiru ’diyi ma ti emi vu dria, erini engaria o’biti drio drio, erini yi ti peria (te emi erini ku, emi; coni emi bile e’yo erizu ku)

⁵’yozu kini, Emi emvi curu’do, emi dria alu alu, engazu geri emini onzikanyaru ’diyiasi, e’yo onzi emini ’yele ’diyi kuzu ja, emi ma adri di angu Yehovani fele emi dri emi a’bipi be, engazu drio cazu ’dani ’daniri ma alia ani;

⁶emi ma mu adrou azini ’diyi ma vutia azi ngazu yi dri ku, yi inzizu, fezu adrani engazu ma asia afa emi drini edele ’diyisi. Ka’dini ma ngani emi ’ye onzi ku.

⁷Te ti, emi erini nga ma ku, Yehova ’yoni, fezu adrani engazu ma asia ani afa emi drini edele ’diyisi, e’yo onzi ejizu emi ngulupi ruaa ani.

⁸E’yo ’disi Yehova asikari ongulumuruniri ’yo ’dini: Emini e’yo mani erile kurisi,

⁹mi ndre, ma nga ’ba ti pe ori’ba angu andraleruria ’diyi pi omvezu dria, Yehova ’yo ra, Nebukadreza opi Babulonia ati’bo maniri be, ma nga yi eji omba ’bazu angu ’dori be, ’ba ovupi alenia ’diyi pie, suru ndu ndu yi ma ageia ’diyi be; te ma nga yi ma dri ja teketeke, ma nga yi ’ba ovuzu osutaru, onziaru, andruru ’dani ’dani.

¹⁰Azini vini indi ma nga o’duko acece o’bezuri nze yi ma eseliarisi ra, o’duko ayikoni pie, o’duko izioni pie, o’duko amuruani pie, oni awu anya ’izuri pie, aci ma diza pie dria.

¹¹Te angu ’dori dria nga ovu andruru azini e’yo osutaru, te suru ’diyi nga azi nga ati’baru opi Babuloniari dri eli kali aziri.

¹²Te eri nga eca ’dini, eli kali aziri ka nga yi de ra, ma nga panga onzi fe opi Babuloniari dri e’yo onzi yinisi, suru nderi pie, angu ’ba Kalideyaa ’diyiniri pie, Yehova kini, azini ma nga eri ’ba ovuzu andruru ’dani ’dani.

¹³Te ma nga e’yo dria mani olule yi ma ruaa, e’yo dria ovupi sizaru buku ’dori ma alia, Yeremiani ondrile suru dria ma dria ’diyi eji angu ’dari ma dria.

¹⁴A’disiku suru kakau, opi amboru ’diyi be, nga yi ma ngulupi ’ba ati’baru, te ma nga yi ofe ’yeta yini vusi, azi yi ma drini ’yelerile.

¹⁵Te Yehova Mungu Israeliniri ’yo ma tia ’dini: Mi a’i okele patiefi su adraniri be ’diri ma dria, ma fe suru dria mani mi ti pezu yi vu ’diyi ma mvu eri ra.

¹⁶Yi nga eri mvu ra, yi nga aba aha ’dole azini ’dale, yi nga aza aza, sei mani ngale tini pele yi ma eseliari ma e’yosi.

¹⁷Ma nga di okele a’i Yehova ma driarisi ra, ma fe ani suru dria Yehovani ma ti pezu yi vu ’diyi ma mvu eri ra;

¹⁸yi ’di Yerusalemu pi aku amboru Yudaa ’diyi pie, opi yini pie, ’ba opiru yini ’diyi be, yi ma ovu ani andruru, e’yo osutaru, onziaru, azini otriaru, ekile erini ovule kpere andrurile;

¹⁹Farau opi Misiriari pi, ati’ba erini pie, opianzi erini pie, suru erini pie dria;

²⁰suru yi osapi tualu ’ba ’diyi pie dria, opi dria angu Uzinia ’diyi pie, opi dria angu ’ba Filisitiaa ’diyiniria ’diyi pie (Asikeloni pie, Gaza pie, Ekironi pie, ’ba acepi jolokoru Asidodia ’diyi pie);

²¹Edomu pie, Moabu pie, Amoni anziyi pie;

²²opi dria Turoa ’diyi pie, opi dria Zidonia ’diyi pie, opi angu miri ma ti ’aa’dasiria ’diyi pie;

²³Dedani pi, Tema pie, Buzi pie, ’ba dria yi ma dri’bi ti fapi kalaasi kalaasi ’diyi be;

²⁴opi dria Arabuaa ’diyi pie, opi dria suru osazaru ovupi roko dria ’diyi pie;

²⁵opi dria Zimiria ’diyi pie, opi dria Elamua ’diyi pie, opi dria ’ba Mediaa ’diyini pie;

²⁶opi dria langu andralerua ’diyi, kani ziri kani Ogogo, yi alu alu yi ma azi ’diyi be, suru dria angu wudrikuru drisi dria ovupi nyaku dria ’diyi pie. Opi Sesakiari nga mvu yi ma vutiani.

²⁷Te mi nga ’yo yi ma tia, Yehova asikari ongulumuruni Mungu Israeliniri ’yo ’dini: Emi ma Imvu, emi ma ati, emi ogbe, emi o’de va, emi ma enga dika ku, sei mani ngale tini pele emi eseliari ma e’yosi.

²⁸Te eri nga eca ’dini, yi ka ga okele ’duko mi dria mvuzu si, mi i nga ’yo yi tia, Yehova asikari ongulumuruniri ’yo ’dini: Emi nga eri mvu ecekokoru!

²⁹A’disiku, emi ndre, ma e’do e’yo onzi ’ye aku amboru omvele ma rusiri ma ruaa, te emi’i, cotani nga emi ece ra ya? Cota ngani emi ece ku, mani ngale sei omvele ’ba ovupi angu wudrikuru drisi dria ’diyi ma driarisi, Yehova asikari ongulumuruniri ’yoni.

³⁰E’yo ’disi mi ma ondri e’yo i ’diyi dria yi ma ruaa, mi ’yo yi tia: Yehovani nga one ’bua, o’duko erini nga efu pari alatararu erini adrizuriasi; eri nga no okposi lico erini ma dria, eri nga otre ekile ’ba zabibu ma patiefi su nzipi ’diyini otrelerile, ’ba oro drisi dria ’diyi ma dria.

³¹Otrenani nga ca kpere nyaku ma kala tini asizuria, Yehovani agata gale suru ndu ndu ’diyi berisi; eri nga e’yo eti nze ’ba rua ari be ’diyi be dria, te eri nga ’ba azi onzi ’yepi ’diyi fe sei sia, Yehova ’yoni.

³²Yehova asikari ongulumuruniri ’yo’dini: Mi ndre, e’yo onzini nga efu suru vusi suru vusi, akuluku amboruni nga enga angu lizu engazu nyaku ma kalati asizuria!

³³Te o’du ’dasi ’ba Yehovani ofule ’diyi nga ovu angu drisi dria engazu nyaku ma kalati aluria cazu kalati aziniria. ’Ba ngani owu yi owu ku, ngani yi oku ku, ngani vini yi sa ku; te yi nga ovu ekile zele nyaku ma dria.

³⁴Emi oga lulu, emi ’ba kabilo ocepi ’diyi, emi ovu, emi ose emi ofuta ma alia, emi kabilo ma drilia ’diyi, o’du ’bani emi ofuzurini ecale ’yeke ’borisi, azini ma nga emi onyo nyingiriki, te emi nga e’de ekile imvu a’dusirini i afulerile.

³⁵’Ba kabilo ocepi ’diyi ngani geri isu apazu ku, indi vili ’ba kabilo ma drilia ’diyi ngani vini eco yi ma idri pazu ku.

³⁶’Ba kabilo ocepi ’diyi ma o’duko awuniri, ’ba kabilo ma drilia ’diyi ma lulu dri ’doni! Yehovani yi ma nyamuko ezalerisi,

³⁷azini lico asi anzuru be ’diyi, ovu yii, adra okaru Yehovaniri ma e’yosi.

³⁸Eri ku pari erini i zizuri kamile ’bo, angu yini oja i osutaru sei ’ba inzapirini ovule yiki kokorurisi, azini erini adra ’bale okarurisi indi.