Read lugbara Yeremia 27 Bible Online

Yeremia 27 - lugbara bible

Yeremia 27

¹Yehoyakimu Yosiamvi opi Yudaarini e’doria nyaria o’diru, e’yo ’diri nga eca e Yeremia vu, ’yozu kini,

²Yehova ’yo ma tia ’dini, kini: Mi ede mi dri pati kulumburu afa eri ecizu be ’diyi mi ma su eri mi ombeja.

³Mi pe ti opi Edomuari pi vu, opi Moabuari pie, opi Amoni anziyiniri pie, opi Turoari pie, opi Sidoniari pie, ojio emupi Yerusalemua Zedekia opi Yudaari vu ’diyi ma dria.

⁴Mi ma azi yi tia e’yo ’yozu ’ba yi ma drilia opiru ’diyi ma tia ’dini kini: Yehova asikari ongulumuruni Mungu Israeliniri ’yo ’dini: Emi ma ’yo ’ba emi ’drilia opiru ’diyi ma tia kini:

⁵Ma ’ba nyaku, ’ba pie, anyapa ovupi nyaku ma dria ’diyi be, okpo mani amborurisi, wu mani ejuzarurisi indi; ma fe eri ’ba mani lele eri fele yi dri ’diyi dri.

⁶Te curu’do ma fe angu ’diyi dria Nebukadineza opi Babulonia ati’bo maniri ma dria, ma fe vini anyapa asea ’diyi azi ngazu eri dri indi.

⁷Suru dria nga azi nga eri dri, mvi erini pie, mvi erini ma mva pie, de nga angu erini ma ewu ecani ku; ka eca ra, suru kakau opi amboru ’diyi be nga eri ’ba ati’bo yiniru.

⁸Te eri nga eca ’dini, suru azini kani opi nyaza azini ka le azi nga Nebukadineza opi Babuloniari dri ku, ka le yi ma ombe ’ba opi Babuloniari ma kulumbu alia ku, Yehova ’yo ra kini, ma nga suru nde ’diyi co seisi, azini abirisi, azini azo muanisi, de nga ma jani yi ma dri teketeke eri ma drisi ku.

⁹Te emi, emi ma eri nabi emini ku, kani ’ba emini acife ndripi ’diyi ku, kani orobi emini ku, kani ’ba emini ojouru ’diyi ku, kani ’ba oleru ’diyi ku, ’ba nde ’yopi emi tia, Emi ngani azi nga opi Babuloniari dri ku, ’diyi.

¹⁰A’disiku yi olu emi tia inzo, ’dini emi ofuzu emi vile anguasi re ani, mani emi drozu amve emi dri jazu.

¹¹Te suru ngapi yi ma ombe ’bapi opi Babuloniari ma kulumbu alia, azi ngapi eri driri, ma nga suru nderi ku ovuzu yi vile angua ra, yi nga angu nde ’ya ra, yi nga ovu alenia.

¹²Ma nga di ’yo Zedekia opi Yudaari ma tia e’yo ’diyi vusi dria, kini: Emi ’ba emi ombe kulumbu opi Babuloniarini ma alia, emi ma nga azi eri dri ’ba erini ’diyi be, emi ma ovu idriru ani.

¹³Emi le dra sei pisi, liki pie, azo muani pie a’disi ya, mi’i, ’ba mini’diyi be, ekile Yehovani ’yole suru lepi azi ngapi opi Babuloniari dri kuri ma e’yosirile.

¹⁴Emi ma eri nabi e’yo ’yopi emi tia kini, Emi ngani azi nga opi Babuloniari dri ku, ’diyi ma e’yo ku, te yi emi tia inzo olu.

¹⁵A’disiku ma peni yi ma ti ma’i ku, Yehova ’yo ra, te yi e’yo inzoru ondri ma rusi, ma ma dro emi amve emi ma ja dri ra beni, emi’i, nabi e’yo ondripi emi tia ’diyi pie dria.

¹⁶Indi vini ma ’yo atalau edeta edepi ’diyi ma tia ’ba ’diyi be dria kini, Yehova ’yo ’dini: Emi ma eri nabi emini e’yo olupi emi tia ’diyi ku, ’yopi kini, Emi ndre, ace nga o’du were yi nga afazu jo Yehova vile joa ’diyi omvi vile engazu Babuloniasi, ’diyi; emi ma eri yi ku a’disiku yini e’yo inzoru ondrile emi tiarisi.

¹⁷Emi ma eri e’yo yini ku; emi ma nga azi opi Babuloniari dri, emi ovu idriru ani. Aku amboru ’dori oja i andruru a’disi ya?

¹⁸Te yi ka ovu nabini, azini e’yo Yehovani ka ovu yi alia ada, onyiruni yi ma zi Yehova asikari ongulumuruni ma tia okporu, afazu acepi nga jo Yehovania, azini opi Yudaari ma joa, azini Yerusalemua ’diyi ma mu Babulonia ku beni.

¹⁹A’disiku Yehova asikari ongulumuruniri ’yo ’dini afa i’dile piri ’diyi pi ma e’yosi, otaka miriniri pie, afa etini ’bazu ’diyi pie, afazu ma joloko acepi aku amboru ’doria ’diyi pie,

²⁰Nebukadineza opi Babuloniarini ’dule ku, o’du erini Yekonia Yehoyakimu mvi opi Yudaari jizu ati’boru engazu Yerusalemuasi cazu Babulonia, ’ba amboru Yudaa azini Yerusalemua ’diyi berisi ’diyi;

²¹ada, Yehova asikari ongulumuruni Mungu Israeliniri ’yo ’dini afazu acepi nga jo Yehovania azini opi Yudaari ma joa azini Yerusalemua ’diyi ma e’yosi:

²²Yi nga yi ji Babulonia ra, ovuzu ’dale de nga ma andrini yi ku, Yehova ’yoni. O’du ’darisi ma nga yi eji yi omvizu pari ’doria.