Read lugbara Yeremia 28 Bible Online

Yeremia 28 - lugbara bible

Yeremia 28

¹Eri nga eca ’dini, eli nde ’dasi, Zedekia opi Yudaarini e’doria opi nyaria, eli su ma mba towirisi, Hanania Azuri mvi nabi ovupi Gibeoniari nga e’yo ’yo ma be jo Yehovani ma alia, ’ba edeta edepi ’diyi pi ma drilia ’ba dria be, kini,

²Yehova asikari ongulumuruni Mungu Israeliniri ’yo ’dini kini: Ma nye opi Babuloniari ma kulumbu ’bo.

³De nga eli iri deni yi dria ku, ma nga afazu Yehova vile joa Nebukadineza opi Babuloniarini opale pari ’dori ma aliarisi jile Babulonia ’diyi omvi pari ’doria dria ra.

⁴Ma nga vini Yekonia Yehoyakimu mvi opi Yudaari eji dika pari ’doria, ’ba Yudaa ndra obile ati’baru mupi Babulonia ’diyi be dria, Yehova ’yo ra, a’disiku mani ngale opi Babuloniari ma kulumbu nyolerisi.

⁵Etu ’dasi nabi Yeremia nga ’yo nabi Hanania ma tia, ’ba edeta edepi ’diyi pi ma milia ’ba pa sopi Yehova vile joa ’diyi be dria;

⁶nabi Yeremia ’yo, Amena! Yehova ma ’ye ’dini fo; Yehova ma ’ye e’yo mini ondrile ’diyi fo, afazu Yehova vile joa ’diyi pi omvizu Babuloniasi ejizu pari ’doria, ’ba ’bani ndra obile ati’baro ’diyi be dria.

⁷Te di, mi ma eri curu’do e’yo mani ’yole mi bilia azini ’ba dria ma bilia ’diri.

⁸Nabi andra ma drilia azini mi drilia oko ’diyi, yi ondri e’yo angu kakau ma dria, azini suru ambo ambo ’diyi ma dria, e’yo omba pinisi e’yo onzi pie, azo muani pie.

⁹Nabi e’yo asi anzuruni ondripiri, e’yo nabi nderini ka nga i ’ye ra, ’ba nga nabi nde ni kini ada Yehova epe tininiri ndo.

¹⁰Vutinia nabi Hanania nga pati kulumbururi tru nabi Yeremia ma ombelekoarisi, nga eri nye ra,

¹¹Hanania nga di ’yo ’ba nde ma drilia dria kini, Yehova ’yo ’dini: De Inga eli pi pi iri deni yi ku, ma nga kulumbu Nebukadineza opi Babuloniarini nye ’dinile, suru dria ma ombelekoarisi ra, Nabi Yeremia nga di mu i parisi ra.

¹²Etu ’dasi e’yo Yehovani nga di eca Yeremia vu, nabi Hananiani pati kulumbururi te ovupi nabi Yeremia ma ombelekoari anyozu ’boria, kini:

¹³Mi mu, mi olu e’yo Hanania tia kini: Yehova ’yo ’dini: Mi nyo kulumbu patiruri ’bo, te parinia mi nga afa kulumbu ayaruni ede’i.

¹⁴A’disiku Yehova asikari ongulumuruni Mungu Israeliniri ’yo ’dini: Ma ’ba kulumbu ayaru suru ’diyi ma ombelea dria, yi ma nga azi Nebukadineza opi Babuloniari dri ani, te yi nga azi nga eri dri ra, ma fe anyapa asea ’diyi eri dri indi.

¹⁵Nabi Yeremia nga di ’yo nabi Hanania ma tia, Mi eri nga te, Hanania, Yehova peni mi ti ku, te mi fe suru ’dorini asi ’bazu e’yo inzoruri ma dria.

¹⁶E’yo ’disi Yehova ’yo ’dini: Mi ndre, ma nga mi ofu nyaku ma driarisi ra, Mi nga dra eli ’dosi, mini e’yo ’bani ani mbuzu Yehova ma ruaasi amveri ’yole’irisi.

¹⁷Ka’dini nabi Hanania dra di eli nde ma mba aziririsi ra,