Read lugbara Yeremia 29 Bible Online

Yeremia 29 - lugbara bible

Yeremia 29

¹Waraga nabi Yeremiani tini pele engazu Yerusalemua ’ba ’wara ’bani jile ati’baru acepi;olokoru ’diyi pi vuri ma e’yo eri ’di; pe tini ’ba edeta edepi ’diyi pi vu indi ’ba nabiru ’diyi pie, ’ba Nebukadinezani jile ati’baru engazu Yerusalemuasi cazu Babulonia ’diyi Pie dria,

²opi Yekonia pi ka nga Yerusalemuasi andri pie, ’ba ranyaru ’diyi pie, opianzi Yudaa ’diyi pie ’bo.

³Pe waraga nderi ma ti Elasa Safani mvi pi ma dria Gemaria Hilikia mvi be, yi ’ba Zedekia opi Yudaarini ti pele Babulonia Nebukadineza vu ’diyi. Waraga kini:

⁴Yehova asikari ongulumuruni Mungu Israeliniri ’yo ’dini, ’ba dria mani fele obile ati’baru engazu Yerusalemuasi cazu Babulonia ’diyi ma tia:

⁵Emi si jo emi dri, emi la yi ma alia; emi ma ’ya amvu, emi nya afa kapi aleniari beni.

⁶Emi je oku emi dri, emi oti agupianzi ezoanzi be; emi ma je oku agupia emini ma mu agupia yi ma oti agupianzi ezoanzi be; emi ma ezu di ’dale tre beni, emi ma anu ku.

⁷Te emi ma nda aku amboru mani emi fele jizu alenia ati’baruri ma asi anzu, emi zi Yehova tia eri dri indi, a’disiku asi anzuru erini ma alia emi nga ovu asi anzu be indi.

⁸Yehova asikari ongulumuruni Mungu Israeliniri ’yo ’dini: Emi ku nabi emini ovupi emi eselia ’diyi pi ma ici emi ku, ’ba emini acife ndripi ’diyi be, emi ma eri vini orobi emini, emini fele ma obi emi ’diyi ku,

⁹yini e’yo inzoru ondrile emi tia ma rusirisi; ma peni yi ma ti ma’i ku, Yehova ’yoni.

¹⁰A’disiku Yehova ’yo ’dini kini: Eli kali aziri ka i de Babuloni dri ’bo, ma nga emi andri ra, ma nga e’yo onyiru ndra mani ’yoleri ’ye emi vu ra, fezu emi ma emvi pari ’doria ani.

¹¹A’disiku ma ni asisile mani drole emisiri ra, Yehova ’yo ra, asisile asi anzuruniri’i, te ovuni asisile e’yo onziniri’i ku, asi teza fezu emi dri ewu eminini asizuria.

¹²Te emi nga ma omve, emi nga mu e’yo zi ma tia, te ma nga emi eri ra.

¹³Emi nga ma ndru, te emi nga ma isu ra, emi ka nga ma ndru asi driasi.

¹⁴Te ma nga ma e’da, Yehova ’yo ra, azini ma nga emi omvi efuzu ati’boasi, ma nga emi oku suru dria ma eselia azini pari dria mani emi drozuriasi, Yehova ’yo ra, te ma nga emi eji dika pari ndra mani emi fezu emi jizu ati’baruria ra.

¹⁵A’disiku emi ’yo kini, Yehova fe nabi efu amani Babulonia ’bo,-

¹⁶te Yehova ’yo ’dini opi ripi oguna Daudiniri ma driari ma e’yosi, azini ’ba dria ovupi aku ambo ’dori ma alia, emi adripiru fupi mupi ati’baru emi be ku ’diyi ma e’yosi indi:

¹⁷Yehova asikari ongulumuruniri ’yo ’dini, Emi ndre, ma nga sei pima ti pe yi ma dria, liki pie, azo muani pie, ma nga yi ’ba ovuzu ekile elioefi mazaru ’bani ecole nyale ku yini ovule onzikanyaru turisi ’diyile.

¹⁸Te ma nga yi ma vuti dro sei pisi, liki pie, azo muani pie, ma nga yi fe co panyile ’dale ’dole suru angu wudrikuru dria ’diyi ma eselia, ovuzu otrinaru, azini e’yo osutaru, onzinare, azini a’danaro suru dria mani yi drozu yi vu ’diyi ma eselia,

¹⁹yini e’yo mani erile kurisi, Yehova ’yo ra; ma pe ati’ba mani nabiru ’diyi ma ti yi vu e’yonisi, mani engaria o’biti drio drio yi ti peria ti, emi leni eri ku, Yehova ’yoni.

²⁰E’yo ’disi emi ma eri e’yo Yehovani, emi ati’ba dria mani ti pele engazu Yerusalemuasi cazu Babulonia ’diyi la!

²¹Yehova asikari ongulumuruni Mungu Israeliniri ’yo ’dini Ahabu Kolaya mvi pi ma e’yosi Zedekia Maaseya mvi be, yi ’ba inzo ondripi emi tia ma rusi ’diyi, kini: Emi ndre, ma nga yi fe Nebukadreza opi Babuloniari ma dria, te eri nga yi fu emi milia ra.

²²’Ba nde ’diyi ma e’yoni nga i oja otrinaru ati’ba Yudani ovupi Babulonia ’diyi dri, kini, Yehova ma ’ba mi Zedekia pile Ahabu be, opi Babuloniarini ozole acisi ’diyile-’dini,

²³yini e’yo azazaru ’yele Israeli ma eselia, yini ali o’bale yi agyi ma oku be, yini e’yo inzoru mani azile ku ’diyi olule ma rusirisi. Ma ni e’yo ’diri ma’i, ma ndre e’yo ’diri ma eti ma’i, Yehova ’yoni.

²⁴Te e’yo Semaya Nehelamiari ma e’yosi mi nga ’yo kini:

²⁵Yehova asikari ongulumuruni Mungu Israeliniri ’yo ’dini kini: Mini waraga ma ti pele mi ngulupi ma rusi ’ba dria ovupi Yerusalemua ’diyi pi vu, Zefania Maaseya ’ba edeta edepiri mvi pie, ’ba edeta edepi ’diyi be driarisi, ’yozu kini,

²⁶Yehova ’ba ndra mi atalau edeta edepiriru Yehoyada atalau edeta edepiri ma paria, ’dini mi ma ovu ’ba drilia jo Yehovani ma alia, ’ba dria alu alu azazaru i ’bapi nabiru i drisiri ma e’yosi, mi ma eci ’ba nde ’dinile pati okalirurisi, ma o’i eri anzirikusi indi.

²⁷Te di mi egani Yeremia Anatotiou i ’bapi nabiru emi dri ’diri ma dria ku a’di e’yosi ya?

²⁸Erini ’ba ti pele ama ovupi Babulonia ’diyi vurisi kini, O’du ati’boni nga ovu izuru; e si jo emi dri, la alenia, e ’ya amvu, e nya afa aleniari ra.

²⁹Zefania atalau edeta edepiri la waraga ’diri nabi Yeremia ma bilia ra.

³⁰E’yo Yehovani nga di eca nabi Yeremia vu kini:

³¹Mi pe ’ba ti ’ba obile ati’baru ’diyi vu, kini, Yehova ’yo ’dini Semaya ’ba Nehelamiari ma e’yosi: Semayani e’yo ondrile emi tia, isu de ma peni eri ti ma’i kurisi azini erini fele emini asi; ’bazu inzo ma driarisi,

³²e’yo ’disi, Yehova ’yo ’dini: Emi ne, ma nga panga onzi fe Semaya ’ba Nehelamiari dri, anziyi be dria; ’ba erini ngani ace suru ’di ma eselia aluni ku, ngani vini afa onyiru mani ngale ’yele suru mani vuri ndre ku indi, Yehova ’yo ra, erini e’yo ’bani mbuzu Yehova ma ruaasi amveri ’yolerisi.