Read lugbara Yeremia 3 Bible Online

Yeremia 3 - lugbara bible

Yeremia 3

¹Yi ’yo kini, ’Ea ka oku erini anzu ra, oku nde ka mu ra, ka eca agupi azini ma okuru, agu nde nga emvi oku nde vu dika ya? Angu nde ngani eca onzikanyaru tukuya? Te mi oja mi ovuzu oku mileari beriru ’ba kakau mi lepi ’diyi be; te ti, mi nga emvi ma vu dika ra ya? Yehova ’yoni.

²Mi enga mile, mi lu oni ovupi dri be pirini ’diyi vu, mi ndre! Pari ’bani lazu misi kuniri ngoa ya? Mi ri yi dri te geri tia ekile ’ba Arabuni roko driarile. Mi eza angu teketeke ali o’baza mini pisi ezata mini ’diyi pie.

³E’yo ’disi ga ozoo feko si, azini ozoo ayini ’dini ku; te mi andreti ovu ekile oku ali o’bapiri ma andretile, mi ga ovuko drinzasi si.

⁴Engazu curu’do mi ngani wu ma vu kini, Ata mani, mi ce ndra ma dri ewu mani ovuzu ’ba o’dirurisi, ’dini ku ya?

⁵Eri nga i bi aoko ini be ’dani ’dani ya? eri nga eri ma ta mba kpere asiria ya? Mi ndre, mi ’yo ’bo, te mi ’ye onzi ekile mi ngulupini lelerile.

⁶Yehova ’yo vini ma tia, ewu Yosiani opi nyazurisi: Mi ndre e’yo Israeli asipi vilerini ’yeleri ra ya? Eri tu oni izuru dria ma dria, azini pati ibiru ma etia dria, ’dale eri o’ba ali.

⁷Te eri ka e’yo ’diyi ’ye dria ’bo, ma ’yo ra kini, Eri ma nga emvi ma vu; te eri emvini ku, azini Yuda amvipi erini lokiri beri ndre e’yo nderi indi.

⁸Azini ma ndre ma ka Israeli asipi vileri ayi, ka waraga eri anzuzuri fe eri dri ali o’baza erini ma e’yosi ’bo; te ti, amvipi erini Yuda lokiri beri ovuni urisi ku, te eri mu vini ali o’bazu indi.

⁹Eri nga eca ’dini, ali o’baza erinini ovule eri ma milia tokorisi, angu dria eca ani onzikanyaru, eri o’ba ali oni pisi pati pie.

¹⁰Te ka tro e’yo ’diyi ’ye yi ra ti, amvipi erini Yuda lokiri beri emvini ma vu asi driasi ku, te lokirisi, Yehova ’yoni.

¹¹Te Yehova ’yo ma tia kini, Israeli asipi vileri e’da i ovuzu onyiru aga Yuda lokiri beri ra.

¹²Mi mu, mi olu e’yo ’diyi angu andraleruri vu, ’yozu kini, Mi emvi, mi Israeli asipi vileri, Yehova ’yoni. Ma ngani lu mi vu adrasi ku, mani ovule yiki berisi, Yehova ’yoni; ma ngani ovu adrasi ’dani ku.

¹³Te kiri mi ma ofu e’yo onzi mini, mini ezale Yehova Mungu mini vuri’i, azini mi o’ba geri tre ’ba jururu ’diyi dri pati ibiru dria ma etia, azini mi erini o’duko mani e’yoni ’yezu ku, Yehova ’yoni emi anzi asipi vile

¹⁴Emi emvi,’diyi, Yehova ’yoni; a’disiku ma ovu agupi emini; ma nga emi o’du ’ba alu aku amboru vosi, kani ’ba iri ori’ba vosi, ma nga emi eji Zionia ra.

¹⁵Te ma nga ’ba emi ocepi ’diyi fe, ekile ma asini lelerile, yi nga nyaka fe emi gazu nitasi azini e’yo vazasi indi.

¹⁶Eri nga eca ’dini, emi ka emi ere ezuzu tre angu nde ma alia, o’du nde ’diyisi, Yehova ’yoni, yi ngani ’yo kini, Sanduku aziza Yehovanirini, ’dini dika ku. Yi ngani asisile dro drinia ku, ngani vini e’yo nde ega ku, yi ngani asi erisi ku; ngani vini eri ede dika ku.

¹⁷Te o’du nde ’diyisi yi nga Yerusalemuni omve oguna Yehovaniri’i, azini suru dria nga yi oku eri vu, ru Yehovani vu Yerusalemua; te yi ngani asi onzi yini ma vuti bi ambosi dika ku.

¹⁸O’du nde ’diyisi ori’ba Yudani nga aci tualu ori’ba Israelini be, yi nga efu tualu, engazu angu andraleruria cazu angu mani fele emi a’bipi dri awitaruria.

¹⁹Te ma ’yo ra, Ma ni ma nga mi ofi ngoni ngoniru anzi eselia ra, ma nga vini angu onyiru fe mi dri, awita ndrizaru suru ndu ndu vileri. Te ma ’yo ra, mi ma nga ma omve, Ma ati’i; azini mi ngani mi oja ma kuzu ma vuti bikokoru ku.

²⁰Ada, ekile okuni agupi erini kule lokirisirile, emi ’ye ma be lokirisi ’dini indi, emi ori’ba Israelini la! Yehova ’yoni.

²¹Yi eri o’duko oni dri pirini ’diyi ma dria, anzi Israelini ’diyi ma awu, matu ’baza yini be, yini geri yini ojale onzirurisi, yini Yehova Mungu yiniri avilerisi.

²²Emi emvi, emi anzi asipi vile ’diyi, ma nga asiza emini asizu vileri ati ra. Mi ndre, ama emu mi vu; mini ovule Yehova Mungu amanirisi.

²³Ada, e’yo oni driari ovu toko, otreza oni driari vuni toko indio Ada, pata Israelini ovu Yehova Mungu amaniri ma alia.

²⁴E’yo drinzaruri eri nya azi ama a’bipi ma dri pamvunini, engazu ewu amani ovuzu ’ba o’dirurisi, kabilo yini pie, ti yini pie, agianzi yini pie, ezoanzi yini pie.

²⁵Onyiru ama ma la va drinza amanisi, ajidira amani ma a’bu ama ci; amani ezale Yehova Mungu amani vurisi, ama’i ama a’bipi be, engazu o’du amani ovuzu ’ba o’dirurisi ecazu kpere andru; ama erini o’duko Yehova Mungu amanirini e’yoni ’yezu ku.