Read lugbara Yeremia 30 Bible Online

Yeremia 30 - lugbara bible

Yeremia 30

¹E’yo ecapi Yeremia vu engapi Yehova vuri, kini:

²Yehova Mungu Israeliniri ’yo e’yo ’dini, kini: Mi ma si mini e’yo mani ’yole mi tia ’bo ’diyi dria buku ma alia.

³A’disiku, mi ne, o’duni nga eca ra, Yehova ’yo ra, o’du nde ’diyisi ma nga e’yo suru mani Israeli pini Yuda be yini ovuzu ati’baruri oja ra, Yehova ’yo ra, azini ma nga fe yi ma emvi angu mani fele yi ma a’bipi driria, te yi nga angu nderi nyani.

⁴E’yo Yehovani ’yole Israeli pi ma e’yosi Yuda beri, yi ’di:

⁵Te Yehova ’yo ’dini: Ama eri o’duko rua yaza pini, uri be, te ovuni asi anzunini ku.

⁶Emi zi curu’do, emi ne, mvaazoni adri agupi e’du ra ya? Te ma ndre agupi dria yi dri oti yi ma guagua ekile oku mvaazoni e’dulerile a’di e’yosi ya? Andreti dria oja yi forotoru a’disi ya?

⁷Wa wo! o’du nderi amboru, o’du azini erile aluni yo; ada eri o’du Yakoboni ocoko isuzuri; te eri nga ovu pazaru aleniarisi ra.

⁸Te eri nga eca ’dini o’du nde ’dasi, Yehova asikari ongulumuruniri ’yo ra, ma nga eri ma kulumbu nye mi ombelearisi, ma nga anziriku mini oce ra, te ’ba jururu ngani eri ’ba ati’boru azi ngazu yi dri dika ku.

⁹Te yi nga azi nga ati’boru Yehova Mungu yini pi dri, Daudi opi yini mani ngale engale yi driri be.

¹⁰E’yo ’disi mi ru ku, Yakobo ati’bo mani la, Yehova ’yo ra, mi asi ma oti ku, Israeli la; te mi ne, ma nga mi pa gbu angu ziria ’da, ma nga mi anziyi opa angu yini ovuzu ati’baruria. Te Yakoboni nga emvi ra, eri nga ava li asi ’yaasi, ’ba aluni ngani uri fe eri dri ku.

¹¹A’disiku ma ovu mi be mi pazu, Yehova ’yo ra; Ma nga suru dria mani mi erezu yi ma eselia ’diyi de teketeke te ma ngani ni de teketeke ku. Ma nga mi imba e’yo liza kililirurisi, ma ngani mi ku panga imbataniri kokoru ku.

¹²Te Yehova ’yo ’dini: Anyo mi ruaari atini ku, te bele mini ovu onzikanyaru tu.

¹³’Ba ngapi fipi mini e’yo eti nzezuni yo, yi ma ombe mi bile ma mile ani; aro ma a tizuru yo.

¹⁴’Ba dria mi lepi ’diyi ma dri avi misi ’bo; yi ndani mi ku; a’disiku ma ofu ari mi ruaa jurule ’bo, ma co mi ’ba yiki kokorurile indi, ezata minirini ovule amboru turisiri, e’yo onzi minirini ezule trerisi.

¹⁵Mi wu rua suza mini ma e’yosi a’disi ya? Rua suza mini econi atizaru ku Ezata minirini ovule amborui turisi, e’yo onzi minirini ezule trerisi, ma ’ye e’yo ’diri mi ruaa ani.

¹⁶E’yo ’disi ’ba dria mi nyapi ’diyi, yi nga yi nya ra, te ari’ba mini dria alu alu nga mu ovu ati’baru; yi nga ’ba afa mini opapi ’diyi ma afa opa ra, te ma nga ’ba dria afa mini aripi ’diyi fe afa arizale,

¹⁷A’disiku ma nga mi rua ’ba alaru dika, ma nga fe mi bileni ja ra, Yehova ’yo ra, yini mi omvele ’ba ’bele amveri- ’irisi, kini: Eri Zioni, ’ba aluni lele kuri’i

¹⁸Yehova yo dini: Mi ne, ma nga hema Yakoboni ’diyi ma e’yo ovuzu ati’baruri oja ra, ma asini nga ndri ndri pari erini adrizu ’diyi vu; yi nga aku amboru nderi si abi pari eriniri ma dria, jo opi vileri nga ovu ekile erini ovule ndra okorile.

¹⁹O’duko awa’difoni nga efu jo nde ’diyi ma aliasi, azini ’ba ayiko ’bapi ’diyi ma o’duko. Te ma nga yi ezu tre, yi ngani ovu were ku; te ma nga diza fe yi dri, yi ngani ovu nyiriaru ku.

²⁰Anzi yini ’diyi vini nga ovu ndra okorile, ’ba ongulumuru yini nga pa so kirikiri ma drilia; azini ma nga panga onzi ofe ’ba yi inzapi ’diyi dri dria.

²¹Yi ma azini nga ovu yi ma opiru, ’ba yi dri cepiri nga efu yi ngulupi ma eselia; te ma nga fe eri ma esi ma vu, eri nga emu ma vu ogogo, te a’di ovu ndra asi teza be esizu ma vu ogogoni ya? Yehova ’yo ra.

²²Te emi’i, emi nga ovu ’ba mani, te ma’i, ma nga ovu Mungu emini.

²³Mi ne, oliriko okporu Yehovani efuni! Adra efu ’bo, akuluku amboru; eri nga afi ’ba azi onzi ’yepi ’diyi ma dria ra.

²⁴Adra okaru Yehovaniri ngani mvi vile ku de nga eri ’yeni ku, de nga eri deni e’yo eri ma asini lele ’diyi dria ku. Ewu vilerisi emi nga e’yoni va ra.