Read lugbara Yeremia 31 Bible Online

Yeremia 31 - lugbara bible

Yeremia 31

¹Ewu’dasi, Yehova ’yo ra, ma nga ovu Mungu Israeli ma ori’ba drianiri’i, yi’i yi nga ovu ’ba mani.

²Yehova ’yo ’dini: ’Ba dria acepi seini kule ’diyi isu asi ndriza angu roko driaria; ada, Israeli’i, mani ndra murialiari ava liza feria eri dri.

³Yehova e’da i andra ma vu drio,’yozu, Ada ma le mi leta ’dani ’danirisi ’bo; i e’yo ’disi ma ese mi ma vu ale yiki berisi ’bo.

⁴Ma nga mi si uru dika, mi nga di ovu sizaru ani, aliria Israeliniri la! Mi nga mi osu dika arimva were mini ’diyisi, mi nga efu ongo tuzu ’ba ayiko ’bapi ’diyi be indi.

⁵Mi nga zabibu isi dika amvua oni Samariaa ’diyi ma dria; ’ba zabibu ma pati isipi ’diyi nga isi ra, yi nga ovu ayikosi pari ndeni! ’yalerisi.

⁶O’duni nga eca ra, o’du ndesi ’ba angu ndrepi oni were Efiraimua ’diyi ma dria ’diyi nga oyu uru: Emi enga, ama tu mu Zionia, Yehova Mungu amaniri fo!

⁷Te Yehova ’yo ’dini: Emi ngo ongo ayikosi Yakobonisi, emi oyu uru suru amboru suru azini agapi rari ma e’yosi; emi eku e’yoni, emi inzi, emi ’yo, Yehova la, mi pa ’ba mini acepi jolokoru Israeliniri fa!

⁸Mi ndre, ma nga yi eji engazu angu andraleruria, ma nga yi oku engazu nyaku ma kalatini asizuria, ’ba ’diyi ma eselia ’ba mile kokoro ri pi tualu ’ba acozaruri pie, oku oporovururi pie, oku mvaazoni e’duleri pie dria; yi ma emvi ’dole o’bi.

⁹Yi nga emu pi awu be, ma nga yi dri ce pi matu ’baza be, ma nga fe yi ma aci yi ara ma tiasi, geri kililiru yini ecole abazo ani kuri ma alia; a’disiku ma ata Israelini, te Efiraimuni ma mva okori’i.

¹⁰Emi suru ndu ndu ’diyi la! emi eri e’yo Yehovani fo, emi ma olu e’yoni angu miri ma tia ziri ’diyia; emi ma ’yo, Eri’i ndra Israelini erepiri nga eri okuni, eri nga eri ma ta mba ekile ’ba kabilo ocepirini i ma kabilo o’bi ’diyi ma ta mbalerile.

¹¹A’disiku Yehovani Yakoboni onzele, erini eri jele dika ’ba eri agapi okposi rari ma dria ’borisi.

¹²Te yi nga emu ra, yi nga ongo ngo angu uruleru Zioniaria, yi nga ra me me me onyi Yehovani pi vu, anya pie, patiefi su pie, odu pie, kabilo aluduru ’diyi pie, ti aluduru ’diyi be; orindi yini nga ovu ekile amvu anzulerurile, te yi ngani candi nya dika aluani ku.

¹³Etu ’dasi aliria nga ovu ayikosi ongo tuza ma alia, azini karile yi nga ovu ayikosi mbaza be tualu, A’disiku mani ngale awu wuza yini ojale ayikorurisi, ma nga yi ma asi omi ra, ma nga fe yi ma ovu di ayikosi candi yini ma vutia.

¹⁴Ma nga fe ’ba edeta edepi ’diyi ma asi ma tra ososi, onyi manini nga dri fu ci ’ba mani ma milia, Yehova ’yo ra.

¹⁵Yehova ’yo ’dini: Yi eri o’duko Ramaa, lulu gaza pi awu okporu be. Rakeli eri wu anzi erini ma e’yosi; eri ga asi omiza e’yosi, yini ovule yorisi.

¹⁶Te Yehova ’yo ’dini: Mi ku o’duko mini awu wuzuri ja, mindre ma ra mi miliari ’dini ku; a’disiku yi nga azi mini ma oya ofe, Yehova ’yoni, te yi nga emu dika engazu ari’ba ma anguarisi ra,

¹⁷Asi teza indi ewu-minirini ria, Yehova ’yo ra anzi mini nga eca dika angu yi vile ma lokiria.

¹⁸Ada, ma eri Efiraimuni awu, wuria i ma e’yosi, kini, Mi fe panga imbataniri ma dri ’bo, te ma isu panga nde ra, ekile kojaa kulumbuni sile nga kurile; mi oja ma, te ma nga ovu ojazaru ani, mini ovule Yehova Mungu manirisi.

¹⁹Ada, ojaza mani ma vutia, ma iri ra; ka ma imba ’bo, ma sa ma: o’dufesi mva mva; ma ovu drinzasi, ada ma aba aba, a’disiku ma a’du a’daŋa ma ruaa e’yo onzi mani ’yele anzi milesirisi.

²⁰Efiraimuni eri mva mani lele: turi’i ya? Eri mva ayiko fepiri’i ya? Paleko dria mani e’yo ’yoria eri ma ruaa, ma e’yo erini ega ma asi driasi ’dani. E’yo ’disi ma asi ota eri ma e’yosi; ma nga ovu yikisi eri vu ada, Yehova ’yo ra.

²¹Mi ’ba mini afa ecetaru geria ci, mi ma ede mi dri pati ecezu ’diyi; mi ’ba mi asi gboko vuleru, ada gboko nde ndra mini muzuri’i. Mi oja mi dika, mi zamva aliriaru Israeliniri la! Mi oja mi dika aku amboru mini ’diyi vuleru.

²²Mi nga mu ’dile azini ’dole ewu ngopi ya, mi zamva asipi vileri la? Te Yehovani afa o’diru ’bale nyakua ’borisi: okuni nga agupi ma kala ace kuru.

²³Yehova asikari ongulumuruni Mungu Israeliniri ’yo ’dini: Ma ka nga yi omvi engazu ati’ba yiniarisi, ’boria, yi nga e’yo ’yoza ’diri ’yo dika angu Yudani pi ma alia aku erini amboru ’diyi be, kini: Yehova ma fe asi ndriza mi dri fo, mi pari e’yo liza kililiruniri la, mi oni e’yo alatararuniri la!

²⁴Yuda pi aku erini amboru ’diyi be dria nga adri alenia tualu, ’ba amvu ’api ’diyi pi ’ba acipi kabilo yini ocezu ’diyi be.

²⁵A’disiku ma fe ’ba andepiri ma ale tra ra, ma fe nyaka ’ba dria ovupi candisi ’diyi dri ’bo

²⁶E’yo ’diri ma vutia ma oru jo’duarisi ra, te ma ndre o’du koza ’mani ovu aluzaru.

²⁷Mi ne, o’du yi nga eca ra, Yehova ’yo ra, ma nga ori’ba Israelini piyi fa ori’ba Yudani be, ’ba ma orisi azini anyapa ma orisi.

²⁸Azini eri nga eca ’dini, ekile ndra mani Yi lule okposi yi onzezu amve, yi onyozu, yi ozezu va, yi dri jazu azini yi inzazurile, ’dinile ma nga yi lu okposi yi sizu uru, azini isizu nyakua, Yehova ’yo ra.

²⁹O’du ’dasi yi ngani ’yo kini: Atapi mbe zabibuefi okangalikaru ’diyi’i, te anzipi ma si eca etrikitriru ani, ’dinini dika ku.

³⁰Te ’ba dria alu alu nga dra e’yo onzi i ma ngulupini ma e’yosi; ’ba dria alu alu zabibuefi okangalikaru mbepi ’diyi ma si nga eca etrikitriru ani.

³¹Mi ne, o’duni nga emu ra, Yehova ’yo ra, o’du nde ’diyisi ma nga aziza o’diru azi ori’ba Israelini pi dri ori’ba Yudani be,

³²ekile ndra mani azile yi ma a’bipi tia o’du mani yi ma dri bizu yi ofuzu angu Misiriarisi ’dirile ku, te aziza mani ’diri yi nyo ra, ka tro ma ovu agupi yini ti, Yehova ’yo ra.

³³Te aziza mini ngale azile ori’ba Israelini be o’du ’dayi ma vutiari eri ’di’i, Yehova ’yo ra: Ma nga aziza mani ’ba yi ma alia, ma nga eri si yi ma asia; ma nga ovu Mungu yini, yi nga ovu ’ba mani.

³⁴Yi alu alu ngani ’ba yi ma jo ejelea ’diyi imba ku, yi alu alu ngani vini adripi yini imba ku, kini, Mi ma ni Yehovani; a’disiku mi driani ma nilerisi, engazu ’ba were turi vu cazu ’ba ’wara agapiri vu, Yehova ’yo ra; mani ngale yi ma e’yo onzi wulerisi, te ma ngani yi ma ezata ega dika ku.

³⁵Yehova ’yo ’dini, eri’i etu fepi dizu etusi, azita fepi mba pi dri ’bi’bio be dizu inisi, miri osapi yi mbupi mbu ’diyini ngazu nozu aniriruni Yehova asikari ongulumuruniri’i:

³⁶Azita nde ’diyi ka nga ma driliarisi ra, Yehova ’yo ra, ka’dini ori Israelini nga vini ku ovuzu sururu ja ma drilia ’dani ’dani.

³⁷Yehova ’yo ’dini: Ka eco ’bu uru o’bizaru, ka eco nyaku eti va eleri ndazaru ra, ka’dini ma nga ori Israelini o’be amve indi e’yo onzi yini ’yele ’diyi ma e’yosi dria,

³⁸Mi ne, o’du yi nga eca ra, Yehova ’yo ra, o’du ndesi aku amboru nga ovu sizaru Yehova dri engazu jo izuru Hananeli vileria cazu kalitile abi kaliru ma ojiaria.

³⁹Baka angu o’bizuri nga fu engazu ’dale drile kilili cazu oni Garebua, eri nga di i oja cazu Goaa ndo.

⁴⁰E’bu ’ba avu pini ofuta beri dria, azini amvu dria cazu yi ara Kidronia, kpere Kalitile Akanya vile etuni efurialeruriari vu, nga ovu alatararu Yehova dri, Yi ngani eri nze amve ku, ngani vini eri ze va dika ’dani ’dani ku.