Read lugbara Yeremia 33 Bible Online

Yeremia 33 - lugbara bible

Yeremia 33

¹Azini vini e’yo Yehovani nga eca Yeremia vu pale iririsi, de eri ombezaru nga ’dani asikari opi agei tepi ’diyi ma irii dria, kini:

²Yehova eri ’yepiri ’yo ’dinile, Yehova eri edepi fepi erini pa sozuri -runi Yehova’i:

³Mi omve ma, te ma nga e’yo omvi mi tia, ma nga e’yo amboru azini ewaru mini nile ku ’diyi ece mi dri.

⁴A’disiku Yehova Mungu Israeliniri ’yo ’dini aku amboru ’diri ma jo pi ma e’yosi, opi Yudaa ’diyi ma jo pie, yini anzule va yi ma ’ba kali okporu, nyaku ari’bani okule abi kaliru ma ruaari ma e’yosi, azini sei ma e’yosi indi:

⁵Yi emu omba ’bazu ’ba Kalideyaa ’diyi be, ’ba avu ma ga ani angu nde alia tre tre beni, mani yi ofule aoko mani pisi adra aciru mani be ’diyi, azini onzi ’ba nde ’diyini dria fe mani ani ma mile zizu yisi ra ma ma ne aku amboru ku.

⁶Mi ne, ma nga emu rua ala fe eri dri rua atiza be, te ma nga yi ma rua ati ra, ma nga yi dri asi anzuru gapi treri ece e’yo ada be o’biru.

⁷Ma nga ’ba Yuda pini Israeli be, ndra bile ati’baru ’diyi omvi vile, yi sizu uru ekile ndra okorile.

⁸Azini ma nga yi ’ba alaru e’yo onzi dria yini ezale ma vu ’diyisi, ma nga e’yo onzi yini wu dria yini ma azita nyole ’diyisi.

⁹Te aku amboru ’dori nga ovu ma dri ru ayikoruni, inzitaru azini dizaru, suru dria wudrikurua ngapi e’yo onyiru dria mani ’yele yi vu ’diyi ma e’yo eripi ’diyi ma milia; yi nga ru ru, yi nga ya ya e’yo onyiru dria azini asi anzuru dria mani ngale fele eri dri ’diyi ma e’yosi.

¹⁰Yehova ’yo ’dini: Pari ’do emini e’yoni ’yole kini, Eri andruni, ’ba yo, anyapa vini yo-ri ma alia, adaru aku amboru Yudaa ’diyia geri Yerusalemua ’diyi be, ovupi andruru ’ba kokoru, ’bani ovuzu alenia yo, anyapa vini yo,

¹¹pari ’diyi ma alia yi nga o’duko ayikoni pi eri dika, o’duko nyonani be, izio ma o’duko pi amurua ma o’duko be, ’ba awa’difo fepi ’yopi: Emi fe awa’difo Yehova asikari ongulumuruniri dri, Yehovani ovule onyirurisi, te yiki erinirini ovule ’dani ’danirisi! -’diyi ma o’duko pie, ’ba edeta awa’diforu ejipi jo Yehovania ’diyi ma o’duko pie. A’disiku ma nga ati’ba anguni ’bani yi bizu ati’baruri ’diyi omvi vile ekile ndra okorile, Yehova ’yoni.

¹²Yehova asikari ongulumuruniri ’yo ’dini: ’Ba kabilo ocepi, fepi kabilo yini ma ola yi va ’diyi, nga yi ma ’boroko si pari ’do ovupi andruru ’ba kokoru azini anyapa kokoruri ma alia dika, nga vini ’boroko si aku amboru erini vusi dria indi.

¹³Aku amboru angu uruleru oni eseliaria ’diyi pi ma alia, aku amboru angu eleria ’diyi pie, aku amboru angu alaza urulerua ’diyi pie, angu Benyamininia ’diyi pie, pari Yerusalemu ageia ’diyi pie, aku amboru Yudaa ’diyi pie dria ma alia, kabilo nga aga ’ba yi ma kalafe lapiri ma dri etia dika, Yehova ’yoni.

¹⁴Mi ne, o’duni emu emu, Yehova ’yo ra, o’du ndesi ma nga e’yo onyiru mani ’yole ori’ba Israelini pi ma e’yosi ori’ba Yudani be ’bori ’ye ra,

¹⁵O’du nde ’dasi ma nga fe arakala e’yo onyiruniri ma eri zozu Daudi dri; eri nga e’yo liza kililiru ’ye e’yo onyiro be angu nde ma alia.

¹⁶O’du ndesi Yudani nga ovu pazaru, te Yerusalemuni nga adri e’yo ’yaasi. Yi nga runi ’da ’dini: Yehova onyi amaniri’i.

¹⁷A’disiku Yehova ’yo ’dini: ’Ba ngapi ripi oguŋa ori’ba Israelini ma driari ngani Daudini ece aluni ku ewule ewule;

¹⁸’ba edeta vezaru fepi ma milia, edeta anyafurasiri pie, edeta edepi zuzuri, ngani ’ba Levini edeta edepi ’diyi ece aluni ku.

¹⁹Te e’yo Yehovani nga eca Yeremia vu kini:

²⁰Yehova ’yo ’dini: Emi ka eco aziza mani etuniri pi nyozaru aziza mani ininiri be ra, ’dini etu pi ini be ma ovu di yo ewu yini vusi,

²¹ka’dini aziza mani ati’bo mani Daudi beri eco nyozaru indi, eri ma ovu mva be rizu opiru oguna erini ma dria ku beni; aziza mani ’ba Levini atalau edeta edepi ’ba azi ngapi ma dri ’diyi beri eco nyozaru indi.

²²Ekile ecole ongulumu ’bua ’diyi pi ma kalafe lazaru cinyaefi miriari be kurile, ’dini ma nga ori’ba Daudi ati’bo manirini fe ezu kakau, ’ba Levini azi ngapi ma dri ’diyi be.

²³Te e’yo Yehovani nga eca Yeremia vu kini:

²⁴Mi egani e’yo suru ’dorini ’yole ’bo kini, Ori’ba iri ndra Yehovani pele ra ’diyi, o’be yii ’bo-ri ku ya? Yi ’ba mani ede ’dini, yi ma ovu sururu yi ma drilia ku beni.

²⁵Yehova ’yo ’dini: Aziza mani etu pini ini beri ka nga pa so ku, ma ka ndra azita ’bu pini nyaku be ’diyi azi ku,

²⁶ka’dini ma nga vini ori: Yakobo pini o’be ori ati’bo mani Daudiniri be ra, ’dini ma ma ’du ori erini ma eselia ’ba azi ’ba dri cepiriru ori Iburahimu pini ma drilia Isaka pie, Yakobo be ku. Te ma nga ati’ba yini omvi ra, ma nga ovu yikisi yi vu ra.