Read lugbara Yeremia 37 Bible Online

Yeremia 37 - lugbara bible

Yeremia 37

¹Zedekia Yosia mvi, Nebukadreza opi Babuloniarini ’bale opiru angu Yudani ma alia, nga opi nya Konia Yehoyakimu mvi ma i paria.

²Te eri’i, ati’ba erini pie, ’ba ovupi angu ndea ’diyi pie, yi erini e’yo Yehovani ’yole nabi Yeremia ma tisiri ku.

³Opi Zedekia nga Yehukali Selemia mvi pi ma ti pe Zefania Maaseya ’ba edeta edepiri ma mvi be nabi Yeremia vu, kini, Mi zi Yehova Mungu amaniri ama dri fo!

⁴Isu de Yeremiani adri efi azini fu ’ba ma eselia, a’disiku yi ’bani nga eri arujoa ku.

⁵Azini isu asikari ongulumuru Farauni ’diyi efu Misiriarisi ’bo; te ’ba Kalideyaa Yerusalemuni acepi ombasi ’diyi ka e’yo kuza yini eri ra, yi ku omba ’bazu Yerusalemu be ja.

⁶O’du ’dasi e’yo Yehovani nga eca nabi Yeremia vu kini:

⁷Yehova Mungu Israeliniri ’yo ’dini: Emi ma ’yo ’dini opi Yudani emi ti pepi e’yo zizu ma tiari ma tia, kini, Mi ndre, asikari ongulumuru Farauni, efupi emi aza kopi ’diyi, nga mvi Misiria yi vile angua.

⁸Azini ’ba Kalideyaa ’diyi nga emu dika omba ’bazu aku amboru ’dori be; yi nga eri bi, evezu acisi ra.

⁹Yehova ’yo ’dini, Emi ici emi ngulupi, ’yozu kini, ’Ba Kalideyaa ’diyi nga nga ama vurisi ra-’dinini ku, a’disiku yi nga ni nga emivurisiku.

¹⁰A’disiku emi ka tro asikari ongulumuru ’ba Kalideyaa ’diyini omba ’bapi emi be ’diyi oco dria ra, ka ace yi ma eselia kiri ’ba osole ebiru ’diyi a’dule ti, yi te enga dria alu alu hema Yini ma alia, aku amboru ’dori evezu acisi ra.

¹¹Te eri eca ’dini, asikari ongulumuru ’ba Kalideyaa ’diyini ka ku omba ’bazu Yerusalemuni be ’bo, asikari ongulumuru Farauni ma urisu,

¹²Yeremia nga fu Yerusalemuasi muzu angu Benyamininia, esele awale eriniri a’izu ’dale ’ba nde ma eselia.

¹³Te erini ovuria nga kalitile Benyamininiri ma alia, isu asikari amboru ’ba angu agei tepi ’diyi ma driliari ’dale indi, runi Iriia, Selemia Hanania mvi ma mvi’i; eri bi nabi Yeremiani ci, kini, Mi mbu ama ruaarisi ’ba Kalideyani ’diyi vu.

¹⁴Te Yeremia nga ’yo, Inzoni; ma mbuni emi ruaarisi ’ba Kalideyani ’diyi vu ’de ku fo, Te rija erini eri ku, ’dini eri bi di Yeremiani ra, nga eri ii ’ba opiru ’diyi vu.

¹⁵’Ba opiru ’diyi ovu ani aokosi Yeremia vu, co eri ra, ’ba eri aruru Yonatani ’ba waraga sipiri vile joa, yini jo nde ojale arujorurisi.

¹⁶Yeremia ka di fi ’bile gale arujoru ma alia, kpere angu valerua ’bo, te Yeremia ka la ’dale o’du kakau ’bo,

¹⁷opi ambo Zedekia nga ’ba ti pe eri ejizu; te opi nga eri zi oyokolosi jo erini ma alia, nga ’yo ra kini, E’yo azini engapi Yehova, vuni indi ya? Yeremia nga e’yo omvi kini, Indi. Eri ’yo vini indi kini, Yi nga mi fe ati’boru opi Babuloniari ma dria ra.

¹⁸Yeremia nga ’yo dika opi Zedekia ma tia kini, Ma eza mi vu a’di e’yoni, kani ati’ba mini ’diyi vu, kani suru ’diri vu, emini ani ma ’bazu arujoa ya?

¹⁹Nabi emini mira e’yo ondripi kini, Opi Babuloniari ngani emu lomba ’bazu emi be, azini angu ’diri Ibe ku-’dini ’diyi ngoa ya?

²⁰Te curu’do mi eri ma, ma matu ’ba mi vu opi mani opi amboruri la! Kirikiri mi eri matu ’baza mani fo Mi fe ma mvi Yonatani ’ba waraga sipiri vile joa ku, ma kazu drazu ’dale ku.

²¹Opi Zedekia nga di e’yoni azi, yi nga di Yeremiani fe ovuzu asikari opi agei tepi ’diyi ma irii dria; yi adri drinia etuzu etuzu enya olemi fe alu alu nyazu, engazu ’ba enya ovapi ’diyi vile geriasi, de nga enya deni i aku amboruasi dria ku. ’Dini Yeremia ovu di ’dani asikari opi agei tepi ’diyi ma irii dria.