Read lugbara Yeremia 39 Bible Online

Yeremia 39 - lugbara bible

Yeremia 39

¹Te eri nga eca ’dini, yini, Yerusalemuni ’duzu ’boria, (eli oromi ma mba mudri Zedekia opi Yudaarini opi nyazurisi, Nebuka-’dreza opi Babuloniari emu asikari ongulumuru erini pie dria, omba ’bazu Yerusalemu be, yi ace eri kuru;

²eli mudri drini aluri ma mba su ma o’du oromi Zedekiani opi nyazurisi, yi olu di aku amboru nde ma abi talaa hu hu),

³’ba opiru opi Babuloniari vile ’diyi efi dria, ri va kalitile agaduaria: yi Nerigali-sareza pi, Samigari-nebo pie, Sarisekimu Rabisarisiruri pie, Nerigali-sareza Rabimagiruri pie, ’ba opiru opi Babuloniari vile ’diyi ma azi pie dria.

⁴Te eri nga eca ’dini, Zedekia opi Yudaari ’ba ombaru ’diyi pie dria ka yi ndre ra, yi apa ra, yi fu akuarisi amve inisi, geri opi ma amvuarisi, kalitile abi iri ma eseliarisi; eri fu geri Arabaarisi.

⁵Te asikari ongulumuru ’ba Kalideyaa ’diyini nzuria yi ma vutia, isu Zedekiani angu senderu Yerikoaria raj ka eri bi ’bo, yi ji eri furu Nebukadreza opi Babuloniari vui Ribila angu Hamatiniaria; eri li e’yo ’drini a’daa.

⁶O’du ’dasi opi Babuloniari ofu anzi Zedekia vile ’diyi Ribilaa, va eri ma milia ra; opi Babuloniari ofu vini ’ba ’wara Yudani dria indi.

⁷Vutinia oso Zedekia ma mile ra, oti eri anzirikusi, ji eri Babulonia.

⁸’Ba Kalideyaa ’diyi eve opi ma jo acisi, jo ’bani indi, yi asu abi kaliru Yerusalemuari va.

⁹O’du ’dasi Nebuzaradani, ’ba asikari opi agei tepi ’diyi ma driliari, ji ’ba acepi jolokoru aku amboru ma alia ’diyi ati’baru Babulonia, ’ba mbupi amve ’diyi yi ojapi eri vu ’diyi pie, ’ba nde acepi jolokoru ’diyi pie.

¹⁰Te Nebuzaradani ’ba asikari opi ma agei tepi ’diyi ma driliari nga ’ba alioru, ’ba ma eselia ovupi afa kokoru ’diyi, ku angu Yudania ’dani, fe vini amvu zabibuni yi dri amvu azini be o’du ’dasi.

¹¹Isu Nebukadreza opi Babuloniari nga e’yo azi Nebuzaradani ’ba asikari opi ma agei tepi ’diyi ma driliari ma tia e’yo Yeremianisi, kini,

¹²Mi ’du eri, mi te eri agei onyiru, mi ’ye eri onzi ku, te mi ma ’ye eri vu erini ngale ’yole mi tiarile.

¹³’Dini Nebuzaradani nga ’ba ti pe eri’i, Nebusazibani ’ba Rabisarisirisiruri pie, Nerigali-sareza ’ba Rabimagiruri pie, ’ba amboru ’ba dri cepi opi Babuloniari vile ’diyi pie dria,

¹⁴yi pe ’ba ti, Yeremiani e’duze asikari opi agei tepi ’diyi ma irii driasi, eji eri fe Ahikamu Safani mvi ma mvi Gedalia dri, eri ma ji eri akua ani. ’Dini eri ovu ’ba ma eselia.

¹⁵Te e’yo Yehovani nga eca Yeremia vu, de isu eri ovu ombezaru asikari opi agei tepi ’diyi ma irii dria aruru, kini:

¹⁶Mi mu, mi ’yo Ebedi-meleki ’ba Etiopiani ma tia kini, Yehova asikari ongulumuruni Mungu Israeliniri ’yo ’dini: Mi ndre, ma nga e’yo mani ’yoleri ji aku amboru ’dori ma dria, e’yo onzi ejizu, te e’yo onyiru ejizu ku, te e’yo nde ’diyi nga yi ’ye mi milia o’du nde ’dasi.

¹⁷Te o’du nde ’dasi ma nga mi ari ra, Yehova ’yo ra, te mi ngani ovu fezaru ’ba nde mini rule ’diyi ma dria ku.

¹⁸A’disiku ma nga mi pa ada, mi ngani dra sei ma sia ku; te mi nga mi idri pa afa pale ombaarile, mini mi asi ’bale ma a’izurisi, Yehova ’yo ra.