Read lugbara Yeremia 4 Bible Online

Yeremia 4 - lugbara bible

Yeremia 4

¹Yehova kini, mi ka emvi, Israeli la, mi emvi ma vu, azini mi ka afa mini mani ngule onzi ’diyi onze ma miliasi ra, mi ngani ya ku;

² azini mi nga oyo so ’dini, Ekile Yehovani ovule idrirurile, e’yo adasi, azini e’yo kililirurisi, azini e’yo onyirusi; te suru ’diyi yi nga asi ndriza isu yi dri erisi, azini yi nga yi enya erisi.

³ Te Yehova ’yo ’dini ’ba Yudaa ’diyi ma tia, azini Yerusalemu ma tia indi: Emi ’ya angu emini kule eriruri, emi ma ri ori oci eselia ku.

⁴ Emi li emi Yehova do, enyiriko emi asi driliari nzezu ekile ’bani agele lilerile, emi ’ba Yudaa ’diyi azini emi ’ba adripi Yerusalemua ’diyi; adra mani kazu efuzu e’yo onzi emini ’yele ’diyisi ekile aci afa vepi okposi ’bani ecozu inyuzu kurile ku.

⁵Emi olu e’yo Yuda ma eselia, emi eku e’yo Yerusalemua indi, emi ’yo kini, Emi vu guka angu eselesi; emi oyu uru, emi ’yo, Emi oku emi tualu, ama ma fi aku kali be okporu ’diyi ma alia

⁶ Emi ’ba bendera ombani Zioni vuleru, emi nzu, emi opa emi, emi te ku; mani ngale e’yo ewaru ejile engazu angu andralerua, dri jata amboru berisi.

⁷ Kami enga asembi erini i lipi pati be truri alia, ’ba suru ndu ndu dri japiri ovu geria; eri efu pari erinia ’bo angu mini ’bazu pirini, aku mini ’diyi ezazu andruru, ’ba ma ovu alenia ani ku.

⁸ E’yo ’dirisi emi su koliba, emi ma owu, emi ga lulu indi; adra aciru Yehovanirini i ojale ama vusi kurisi.

⁹Te eri nga eca ’dini o’du ndesi, Yehova ’yo ra, asi opi pini nga ca ca opianzini be; azini atalau edeta edepi ’diyi nga osu osu, azini nabi yi nga ga cii.

¹⁰Ma nga ’yo ra kini, Opi Yehova la, adaru mi ici ’ba ’diyi ma dri tu, Yerusalemu be indi, mini ’yozu kini, Emi nga ovu asi anzuru be; de isu sei ca kpere idri yini vu.

¹¹ Ewu ndesi yi nga ’yo ’ba ’diyi ma tia azini Yerusalemu ma tia indi kini, Oli aciru engapi pari pirini uruleru roko dria ’diyiari, li cazu ’ba ma vile ’diyi ma zi vu, te emuni afa o’bizu kani ’bazu alaru ku indi;

¹²oli okporu agapi ra ’diri nga emu masi. Curu’do ma nga e’yo liza yi vu ’diyi olu indi.

¹³Mi ndre, eri tu uru ekile iritini tulerile, azini gari erini ombani ’diyi nga ovu ekile olirikole; akanya erini ’diyi aga aji ongusi Eyawaye, ama ye! ama ezaru ’bo fo!

¹⁴ Yerusalemu la, mi oji asi mini alaru e’yo onzi minisi, ’dini mi ma pa mi ani beni. Eyikiza onzi mini nga ovu mi asia izu ngopi ya?

¹⁵ A’disiku o’dukoni efu Dania e’yo oluzu, eri e’yo onzi eku oni Efiraimua ’diyi vusi.

¹⁶Emi olu suru ndu ndu ma tia; mi ne, emi eku e’yo nderi Yerusalemua indi kini, Ari’ba amba mbapi engapi angu ziria ’diyi yi ecea ra, yi ali cere o’be dri aruzu aku Yudaa ’diyi be.

¹⁷ Yi ace eri kurukuru ekile ’ba amvu agei tepi ’diyile, erini mbule ma ruaasi amverisi, Yehova ’yoni.

¹⁸Acita mini azini ’yeta mini ’diyi eji e’yo ’diyi mi driani, ’Di e’yo onzi mini, eri okangalikaru; eri eca kpere mi asia.

¹⁹ Ocoko ma ruaa, ocoko ma ruaa ’dori! Ma asini su kpere ma alia! Ma asini ombu ’bala ’bala; ma econi adrizu ciri ku; a’disiku, asi mani la, mi eri o’duko gukani alicere be ’bo.

²⁰Dri jaza eti cekokori azi i ’bo, anguni i ezale dria ’borisi. Hema mani eza yi bongo o’iza mani be, mbelekocici.

²¹Ma nga bendera ombaniri ndre izu ngopi ya? Ma nga o’duko gukani eri izu ngopi ya?

²²A’disiku ’ba mani yi ovu azazaru, yi nini ma ku; yi anzi ondua kokoru, e’yo vaza yini yo. Yi onduaru azi onzi ’yezu, te yi nini e’yo onyiru ’yezu ku.

²³Ma ndre nyaku, te mi ne, eri fi ndru piriki ’dini; azini ma lu ’bu, te dizani yo.

²⁴Ma ndre oni izuru, te mi ne, yi ya ya, azini oni were ’diyi dria yi osi osi ’dole, ’dale.

²⁵Ma lu, te mi ndre, ’ba aluni yo, azini aria ’bua ’diyi osa yi parisi ’bo.

²⁶Ma lu, te mi ndre, amvu afa kapi turi oja i rokoru ’bo, azini aku dria asu yi va Yehova ma drilia ’bo, adra erini okporu ma drilia indi.

²⁷A’disiku Yehova ’yo ’dini, Angu dria nga ovu andruru; te ti, ma ngani de teketeke ku.

²⁸E’yo ’disi nyakuni nga wu candisi, azini ’bu uru ’diyi nga ovu iniru; mani e’yo ’diri ’yole rarisi, mani asi ’bale e’yo nderi ’yelerisi; ma omvini nga ma asi ku, ma ngani ma oja vile e’yo nderi kuzu ku.

²⁹Aku dria apa ra, ididi asikari tupi akanya dria ’diyinisi, ’ba osu be ’diyini pie; yi fi mbi alia; yi tu kata dria; ku aku dria, ’ba acepi aleniani aluni yo.

³⁰Te mi’i, ’bani mi adiria ra, mi nga a’di ’ye ya? Mi ka tro bongo ekaru su mi ruaa, mi ka tro onyiafa meleru ’diyi osu, mi ka tro mi mile kala ’ba amboru erakasi ti, rua mini edezu ndrizaru eri toko; ’ba mi lepi ’diyi mi onzo onzo, yi ndru mi fuzu ra.

³¹Te ma eri o’duko ekile o’duko oku mvaazoni e’dulerinirile, suza oku aliriamva osipirinirile, eri o’duko Zioni zini erini ava ’yazu okporu, dri erini andazu, wuzu, Eyawa ma ye ma orindini ’yele avile ’ba ’ba ofupi ’diyi ma miliarisi.