Read lugbara Yeremia 40 Bible Online

Yeremia 40 - lugbara bible

Yeremia 40

¹E’yo ecapi Yeremia vu, engapi Yehova vuri, e’yo nde eca Nebuzaradani asikari opi agei tepi ’diyi ma driliarini eri truzu Ramaarisi ’boria, erini eri jizu ’izaru anzirikusi ’ba Yerusalemua azini ’ba Yudaa, yini obile jile ati’baru Babulonia ’diyi dria ma eselia.

²’Ba asikari opi agei tepi ’diyi ma driliari nga Yeremiani ’du ’yo tinia kini, Yehova Mungu miniri azi e’yo onzi ’dori pari ’dori ma dria;

³te Yehova eji e’yo nderi ’bo, eri ’ye erini ’yelerile ra. Emini e’yo ezale Yehova vurisi, emini eri ma ti erile kurisi, e’yo ’disi e’yo ’diri eca emi ruaa ani.

⁴Curu’do mi ne, ma lanziriku mi driari tru. Ka ovu mi milia onyiru muzu ma be Babulonia, mi emu, te ma nga mi agei te onyiru; te ka ovu mi milia onzi muzu ma be Babulonia, mi mu ku. Mi ndre, angu dria ovu mi drilia; pari ovupi mi milia onyiru kani kililiru muzuri ka ovu ngoa ngoa ani ti, mi mu ’dale.

⁵Te de nga eri mvini ku, eri ’yo ra, Mi mvi Gedalia Ahikamu Sefani mvi ma mvi, opi Babuloniarini ’bale ’ba ’ba dri cepi aku Yudaa ’diyi ma ’driliari vu, mi ovu eri be ’ba nde ’diyi ma eselia; ka’dini ku, mi eco muzaru pari ovupi onyiru mi milia mini muzuria. ’Dini ’ba asikari opi agei tepi ’diyi ma driliari fe nyaka eri dri, afa feza be, ku eri mu ra.

⁶’Dini Yeremia nga di mu ani Gedalia Ahikamu mvi vu Mizipaa, nga ovu eri be ’ba ecepi angu nde ma alia ’diyi ma eselia.

⁷Te ’ba asikari ovupi asea ’diyi ma dri cepi ’diyi, yi’i ’ba yini pie, ka eri kini opi Babuloniari ’ba Gedalia Ahikamu mvini opiru angu nde ma drilia ’bo, azini kini eri fe agupi piyi oku be anzi pie eri dri ’bo, yi ’ba alioru tu angu ndea yini jile ati’baru Babulonia ku ’diyi,

⁸yi nga di eca Gedalia vu Mizipaa-yi Isimaeli Netania mvi pi, Karea anzipi Yohanani pi Yonatani be, Seraya Tanumeti mvi pie, anzi Efai ’ba Netofatiarini ’diyi pie, Yezania ’ba Maakatiari ma mvi pie, yi’i ’ba yini ’diyi pie.

⁹Te Gedalia Ahikamu Safani mvi ma mvi nga oyo so yi be, ’ba yini ’diyi pie, kini, Emi ru ku azi ngazu ’ba Kalideyaa ’diyi dri. Emi ma ovu angu nde ma alia, emi ma nga azi opi Babuloniari dri, emi nga di ovu drileba be ani.

¹⁰Te ma’i, ma nga mani adri Mizipaa, ma ma so pa ’ba Kalideyaa ngapi emupi ama vu ’diyi ma drilia ani; te emi’i, emi oku emini patiefi su pi, patiefi kapi elisi ’diyi pie, odu pie, emi ma ’ba yi afazu eminia, emi ovu di aku amboru emini bile eminiru ’bo ’diyi ma alia.

¹¹’Dinile indi ’ba Yahudini ovupi Moabua ’diyi pi, ’ba ovupi Amoni anziyi ma eselia ’diyi pie, ’ba Edomua ’diyi pie, ’ba ovupi angu dria ma eselia ’diyi pie, ka eri kini opi Babuloniari ku ’ba Yudaa azini ’diyi jolokoru ’bo, azini kini eri ’ba Gedalia Ahikamu Safani mvi ma mvini yi ma drilia ’bo,

¹²etu nderisi ’ba Yahudini dria nga enga pari dria ’bani yi odrozu ’diarisi, yi nga emu angu Yudaaria Mizipaa Gedalia vu, yi oku patiefi su, patiefi kapi elisi ’diyi be tre. E’yo Isimaelini otule Gedalia ma ruaari

¹³Azini vini Yohanani Karea mvi pi, ’ba asikari ovupi asea ’diyi ma dri cepi ’diyi be dria, yi nga eca Gedalia vu Mizipaa,

¹⁴yi ’yo tinia kini, Mi nini kini Baalisi opi Amoni anziyiniri epe Isimaeli Netania mvi ma ti mi fuzu ’bori ku ya? Te Gedalia Ahikamu mvi a’ini e’yo yini ’yoleri ku.

¹⁵Yohanani Karea mvi nga ’yo Gedalia tia Mizipaa oyokolosi kini, Mi fe ma mu, ma zi mi tia, ma nga Isimaeli Netania mvini fu ra, te ’ba aluni ngani e’yo nderi ni ku. Eri ma fu mi, ’ba Yahudini dria yi okupi mi vu ’bo ’diyini yi erezu, azini ’ba Yudaa acepi jolokoru ’diyini dri jazu ani ra a’disi ya?

¹⁶Te Gedalia Ahikamu mvi ’yo Yohanani Karea mvi ma tia kini, Mi ma ’ye e’yo ’diri ku, te mi inzo li Isimaeli ma dria.