Read lugbara Yeremia 41 Bible Online

Yeremia 41 - lugbara bible

Yeremia 41

¹Eri eca ’dini mba azirisi,Isimaeli Netania Elisama mvi ma mvi, ovupi ori’ba opini ma eselia, ’ba ’ba dri cepi ambo opi ma palaari, nga emu Gedalia Ahikamu mvi vu Mizipaa, eri’i ’ba mudri azini ’diyi be, yi nga enya nya tualu ’dale Mizipaa.

²Etu ’dasi Isimaeli Netania mvi nga enga ra, ’ba mudri ovupi eri be ’diyi be, yi nga Gedalia Ahikamu Safani mvi ma mvi, opi Babuloniarini ’bale opiru angu ma driliari li seisi ra, yi nga eri fu ra.

³Isimaeli ofu vini indi ’ba Yahudini ovupi eri be ’diyi dria, adaru ’ba ovupi Gedalia be Mizipaa, ofu vini ’ba ombaru Kalideyaa ’diyi yini isule ’dale ’diyi.

⁴Te eri nga eca ’dini o’du iri erini Gedaliani fuzu ’boria, ’bani nga; e’yoni nizu kuria,

⁵’ba kali aro engapi Sekemu pia Silo pie, Samaria pie ’diyi nga eca, isu fa yi ma ti’bi, osi yi ma bongo, oli yi ma ruaa ’bo; yi eca edeta feza anyafurasi ’diyi pi be yi dria, obiese vele veri be, ejizu jo Yehovania.

⁶Isimaeli Netania mvi nga efu Mizipaarisi dri fuzu yi be, eri ji wu so erini muria geria. Eri nga eca ’dini, eri ka dri fu yi be ’bo, eri ’yo yi tia, Emi emu Gedalia Ahikamu mvi vu.

⁷Te eri nga eca ’dini, yi ka fi aku amboru ma alia agadua ’bo, Isimaeli Netania mvi ofu yi ra, o’be yi ma avu ’bilia, eri’i ’ba ovupi eri be ’diyi be.

⁸Te yi isu ’ba mudri ’ba nde ’diyi ma eselia ’diyi, ’ba nde kini Isimaeli tia, Mi ofu ama ku, te ama zi lonyi amani asea ’bo, nganu pie, anya azini pie, odu pie, anyuoso pie. ’Dini eri ku yi ra, eri ofuni yi adripi yini be tualu ku.

⁹Isu de ’bile Isimaelini ’ba erini ofule ’diyi ma avu o’bezu alenia Gedalia ma ageiari, eri ’bile nde alu ’da opi Asani gale Baasa opi Israeliniri ma urisiri’i; Isimaeli Netania mvi fe ’bile nde ga tre ’ba ofule ’diyi ma avusi.

¹⁰O’du ’dasi Isimaeli nga di ’ba nde acepi jolokoru Mizipaa ’diyi ji ati’baru dria, yi bani opi ambo ma ezopi pie, ’ba dria acepi. Mizipaa Nebuzaradani asikari opi agei tepi ’diyi ma driliarini kule Gedalia Ahikamu mvi ma dria ’diyi be. Isimaeli Netania mvi nga di yi i ati’baru, nga dri ko muzu zozu ’aa’dasi Amoni anziyi vu.

¹¹Te Yohanani Karea mvi, ’ba amboru asikari ongulumuru ma dri cepi ovupi eri be ’diyi be, ka e’yo onzi Isimaeli Netania mvini ’yele ’bori ma e’yo eri dria ’bo,

¹²yi nga ’ba ’du dria, nga mu omba ’bazu Isimaeli Netania mvi be, yi nga eri isu yi amboru Gibeoniari ma tia.

¹³Eri nga eca ’dini, ’ba dria ovupi Isimaeli be ’diyi ka Yohanani Karea mvini ndre ra, ’ba asikari ma drilia ovupi eri be ’diyi be, yi nga di ovu ayikosi.

¹⁴’Dini ’ba dria Isimaelini jile ati’baru engazu Mizipaa ’diyi nga yi oja mvi Yohanani Karea mvi vu.

¹⁵Te Isimaeli Netania mvi apa Yohanani vurisi, ’ba aro ’diyi be tuale, yi mu Amoni anziyi vu.

¹⁶O’du ’dasi Yohanani Karea mvi, ’ba asikari dri cepi ovupi eri be ’diyi be dria, nga ’ba dria acepi erini opale Isimaeli Netania mvi ma dria Mizipaa, erini Gedalia Ahikamu mvini fuzu ’boria ’diyi o’du ra, yi ’ba ombaru ’diyi, oku pie, anzi pie, ’ba onzele ranyaru ’diyi pie, erini omvile Gibeoniasi ’diyi.

¹⁷Yi nga di mu ovu Geruti Cimamu ovupi Betelehemu ma tiaria, yi ma mu fi Misiria ani,

¹⁸’ba Kalideyaa ’divi ma e’yosi; yini yi rulerisi, a’disiku Isimaeli Netania mvini Gedalia Ahikamu mvi, opi Babuloniarini ’bale opiru angu ma driliari fule ’borisi.