Read lugbara Yeremia 46 Bible Online

Yeremia 46 - lugbara bible

Yeremia 46

¹E’yo Yehovani ecapi nabi Yeremia vu suru jururu ’diyi ma e’yosiri.

²Misiri ma e’yosi. E’yo asikari ongulumuru Farau Neko opi Misiriarinisi, yi asikari ndra ovupi yi ara Ufiratesi ma tia Karikemisia, Nebukadreza opi Babuloniarini ofule eli su Yehoyakimu Yosia mvi opi Yudaarini opi nyazurisi ’diyi:

³Emi ede emi dri enyi pi gombere be ngonde, emi si omba tia ogogo!

⁴Emi osu enyi akanya ruaa; emi tu yi ma dria, emi ’ba nzupi akanya dria ’diyi la! Emi ma so pa otizaru biri ayaru be emi dria, emi mve aju ma rua alaru, emi su bongo ayaru ombaniri emi ruaa!

⁵Ma ndre e’yo nderi a’di e’yosi ya? Yi ovu urisi, yi co ti ngukualeru. Ogba ’ba yini okporu ’diyi va ’bo, yi apa ongusi ’bo; yi luni vile kuuri amboru kalaasi dria ci Yehova’yoni.

⁶’Ba ongu beri ma nzu ku, ’ba okpo beri ma apa ku indi; kala andraleru yi ara Ufiratesi ma tiaria yi ari parapara, yi o’de va ’bo.

⁷’Ba ’di tipi tre yi raza Nilileri a’di’i, yinirini ombuzu ombu ombu ekile yi razaleniri ra?

⁸Misiri ti ekile Nilile, yiniri ombu ombu ekile yi razale. Eri ’yo ra, Ma nga ti ra, ma nga nyaku dri a’bu ci, ma nga aku ambo ambo ’diyi ma dri ja, ’ba ovupi alenia ’diyi be ra,

⁹Emi tu uru, emi akanya, emi onzu atriru, emi gari ombani ’diyi la! ’Ba okporu ’diyi ma fu mu: Kusi pi Puti be, gombere supi yi ma ruaa ’diyi, ’ba Ludia osu nzopi gbipi ’diyi be.

¹⁰A’disiku o’du nde ’dari eri ovu o’du Opi Yehova asikari ongulumuruniri, eri o’du arioti ofezuri’i, eri ma ofe ani arioti erini ma ruaa. Seini nga nya, eri nga tra ra, ari mvuza yinini nga eri di ra. A’disiku Opi Yehova asikari ongulumuruniri ovu edeta be angu andralerua yi ara Ufiratesi ma tia,

¹¹Mi tu Gileadia, mi ’du aro efiza, mi Misiri za aliriaruri la! Mi aro kakau mvu ti; mi rua atini ku.

¹²Suru ndu ndu eri drinza mini ’bo, angu wudrikuru ga tre mi awusi; ’ba okporu erini i sile agyi berisi; yi e’de iritro va.

¹³E’yo Yehovani ’yole nabi Yeremia ma tia, e’yo Nebukadreza opi Babuloniarini ngazu emuzu angu Misirini cozuri ecezuri:

¹⁴Emi olu e’yoni Misiria, emi eku e’yoni Migidolia; emi eku Nofu pia Tapanihesi be; emi ’yo, Mi so pa otizaru, emi ovu di ngonde, seini ’ba nyale mi ageia ’borisi.

¹⁵We ’ba mini okporu ’diyi ji amve a’disi ya? Yi soni pa ku, Yehovani yi drole rarisi.

¹⁶Eri fe ’ba kakauni acizu parapara, ada yi o’de va yi agyi ma dria; te yi ’yo ra, Ama ma nga, ama mu dika ’ba amani ’diyi vu, angu yini ama osizuria, sei ama inzapiri ma e’yosi.

¹⁷Yi wu ’daa kini, Farau opi Misiriari eri e’yo ’yo avurumaru; eri ku o’du pele ’borini agazu toko.

¹⁸Mani ovule idri berile, Opi ambo runi Yehova asikari ongulumuruniri ’yo ra, ekile oni Tabori oni azi ’diyi ma eseliarile, azini ekile Karimeli miri ma tiarile, eri nga emu ’dini.

¹⁹Mi zamva adripi Misiriari la, mi ede mi ngonde muzu ovuzu ati’boru! A’disiku Nofuni nga ofu andruru, eri nga ovu vezaru, ’ba ngani ovu alenia ku.

²⁰Misirini tikari ndrizaru turi, te dri jaza efu kala andraleruriasi, eca di ’bo.

²¹’Ba erini azi ngapi oyasi ’diyi ovu eri eselia ekile kojaanzi mbapi licoa ’diyile; a’disiku yi’i yi oja yi vile indi, yi dria apa tualu, yi soni pa ku; o’du yini ocoko nizurini ecazu yi vu ’borisi, eri ewu yi andrizuri’i.

²²O’duko erini nga ndri ekile gala’bani ndrilerile; a’disiku yi nga aci agupile asikari ongulumurule, yi nga emu eri vu ogara be, ekile ’ba pati gapi ’diyile.

²³Yi nga pati erini oceru ’diyi oga dria Yehova ’yo ra, ka tro oce nde ma talate trikitriki ti, a’disiku yi ovu o’biru lakokoru, aga ombi ra.

²⁴Misiri zani nga drinza isu, yi nga eri fe ’ba andraleru ’diyi ma dria.

²⁵Yehova asikari ongulumuruni Mungu Israeliniri ’yo ra: Mi ndre, ma nga panga onzi fe Amoni engapi Noari pi dri, Farau pie, Misiri adrou erini ’diyi pie, opi amboru erini ’diyi pie; ada ma nga panga fe Farau pi dri ’ba a’ita ’bapi eri vu ’diyi be.

²⁶Ma nga yi fe ’ba ndapi yi fupi ’diyi ma dria, Nebukadreza opi Babuloniari pi ma dria, ati’ba erini be. Te vilerisi ’ba yi nga adri alenia ekile andra okorile, Yehova ’yo ra.

²⁷Te mi ru ku fo, Yakobo ati’bo mani la, mi asi ma oti ku fo, Israeli la; te mi ne, ma nga mi pa angu ziria ’daa, ma nga ori’ba mini pa angu ’bani yi jizu ati’baruria ra. Te Yakoboni nga emvi ra, eri nga ovu ’yaa ava lizu, te ’ba ngapi uri fepi eri drini yo.

²⁸Mi ru ku fo, Yakobo ati’bo mani la, Yehova ’yo ra, mani ovule mi berisi. A’disiku ma nga suru dria mani emi drozu yi vu ’diyi fe de teketeke ra, te ma ngani mi fe de teketeke ku. Te ma nga mi imba e’yo liza kililirusi, te ma ngao mi ku cokokoru ku.